ខេត្តកណ្តាល ៖ ដោយមើលឃើញពីភាពអនាធិបតេយ្យនៃការលក់ដូររបស់បងប្អូនអាជីវករនៅតាមដងផ្លូវសាធារណៈជុំវិញផ្សារគគីរធំ ហៅផ្សារព្រែកថ្មី ភូមិគគីរធំ ឃុំគគីរធំ ស្រុកកៀនស្វាយ ខេត្តកណ្តាល នាព្រឹកថ្ងៃទី១៣ ខែកញ្ញា ឆ្នាំ២០១៨ លោក ពៅ គឹមលី អភិបាលរងស្រុកកៀនស្វាយបានដឹកនាំកម្លាំងនគរបាលចរាចរណ៍ស្រុក អាជ្ញាធរភូមិ-ឃុំ នគរបាលប៉ុស្តិ៍និងកម្លាំងប្រជាការពារភូមិបានចុះរៀបចំសណ្តាប់ធ្នាប់ដើម្បីជួយសម្រួលដល់ការធ្វើដំណើររបស់បងប្អូនប្រជាពលរដ្ធជាពិសេសគោលបំណងកែលម្អសោភ័ណភាពផ្សារឲ្យបានល្អ ។
ក្រុមអាជីវករបានប្រាប់អ្នកយកព័ត៌មាន កោះសន្តិភាព ថាតាមពិតពួកគាត់ក៏មិនចង់មកអង្គុយលក់ដូរនៅលើដងផ្លូវសាធារណៈនេះដែរ ក៏ប៉ុន្តែធ្វើម៉េចបើគ្មានកន្លែងលក់ ព្រោះដីនៅក្នុងផ្សារត្រូវគេលក់ឲ្យទៅបុគ្គលឯកជនសាងសង់សំណង់រឹងផ្ទះថ្មយ៉ាងណែនតាន់តាប់អស់ហើយ ។
អាជីវករបន្តទៀតថា កាលពីមុនពួកគាត់នាំគ្នាទៅអង្គុយលក់ដូរនៅតាមចិញ្ចើមថ្នល់ខាងមុខផ្សារ ហើយត្រូវអាជ្ញាធរចុះមកដេញរៀបចំមិនឲ្យលក់ដោយខ្លាចមានឡានដាច់ហ្វ្រាំងឬរថយន្តរ៉េចង្កូតចូលមកនាំឲ្យមានគ្រោះថ្នាក់ដោយយថាហេតុ ។ ទើបពួកគាត់សម្រេចចិត្តនាំគ្នាមកដាក់អង្គុយលក់នៅលើផ្លូវលំក្រាលខ្សាច់ភ្នំមាត់ព្រែកខាងត្បូងផ្សារឡើងហៀររហូតដល់ថ្នល់ជាតិតែម្តង ។
អាជីវករបន្តថា ការលក់នេះគឺពួកគាត់បានបង់លុយឲ្យតាមមុខផ្ទះគេទៅឲ្យម្ចាស់ផ្ទះក្នុងមួយថ្ងៃម្នាក់ 3000៛, 4000៛ ឬ5000រៀល និងបានបង់ឲ្យភាស៊ីក្នុងម្នាក់មួយថ្ងៃ១០០០រៀលផ្សេងទៀត ។ ហើយពួកគាត់សូមថ្លែងអំណរគុណដល់អាជ្ញាធរដែលតែងតែបានចុះមករៀបចំសណ្តាប់ធ្នាប់ជាបន្តបន្ទាប់នៅផ្សារគគីរធំនេះ និងសូមសំណូមពរឲ្យអាជ្ញាធរមេត្តាជួយរកកន្លែងឲ្យពួកគាត់បានអង្គុយលក់ស្រួលបួលផងព្រោះមុខរបរពួកគាត់មានតែការលក់ដូរបន្តិចបន្តួចប៉ុណ្ណឹងគ្រាន់ចិញ្ចឹមជីវិត ។
លោក ពៅ គឹមលី អភិបាលរងស្រុកបានចុះរៀបចំសណ្តាប់ធ្នាប់ណែនាំឲ្យបងប្អូនអាជីវករទាំងអស់លក់ដូរកុំឲ្យហៀរមកលើប៉ះពាល់ដល់ផ្លូវសាធារណៈព្រោះផ្លូវមានទំហំតែ៤ម៉ែត្រទេ ដើម្បីទុកឲ្យអ្នកធ្វើដំណើរចេញចូលបានស្រួលផង ។ ជាពិសេសដាច់ខាតកុំអង្គុយលក់ដូរហៀរមកនៅលើចិញ្ចើមផ្លូវថ្នល់ជាតិឲ្យសោះ ព្រោះខ្លាចមានគ្រោះថ្នាក់ដល់អាយុជីវិត ៕
ចែករំលែកព័តមាននេះ