ខេត្តព្រះសីហនុ ៖ ខេត្តព្រះសីហនុជាប៉ូលសេដ្ឋកិច្ចដ៏សំខាន់មួយ ក្នុងចំណោមតំបន់សេដ្ឋកិច្ចសំខាន់ៗទាំង៣ នៃព្រះរាជាណាចក្រកម្ពុជា ហើយក៏ជាខេត្តដែលមានសក្តានុពលខ្លាំង ខាងវិស័យទេសចរណ៍ផងដែរ បន្ទាប់ពីខេត្តសៀមរាប ព្រោះខេត្តនេះពាក់កណ្តាលជាតំបន់មាត់សមុទ្រដែលមានឆ្នេរខ្សាច់ដ៏ស្រស់ស្អាតយ៉ាងវែង មិនត្រឹមតែប៉ុណ្ណោះ ខេត្តនេះក៏សំបូរទៅដោយតំបន់ទេសចរណ៍ធម្មជាតិច្រើនកន្លែងថែមទៀត ។
លោកសោម ចិន្តា ប្រធានមន្ទីរទេសចរណ៍ខេត្ត បានឱ្យដឹងថា នៅលើទឹកដីខេត្តព្រះសីហនុ មានតំបន់ទេសចរណ៍សំខាន់ៗសរុប២២កន្លែង ក្នុងនោះមានឆ្នេរចំនួន៧កន្លែង គឺឆ្នេរឯករាជ្យ ឆ្នេរជ័យជំនះ ឆ្នេរអូរឈើទាល ឆ្នេរអូរត្រេះ ឆ្នេរលំហែកាយ ឆ្នេរព្រៃត្រែង និងឆ្នេរសុខា និងមានកោះចំនួន៩ មានកោះរ៉ុង កោះរ៉ុងសន្លឹម កោះតាគៀវកោះចន្លុះ កោះត្រេះ កោះថាស កោះឫស្សី កោះពស់ និងកោះដែកគោល ។ ក្រៅពីនោះទៀត មានតំបន់ទឹកធ្លាក់ក្បាលឆាយ សួនឧទ្យានជាតិរាម ព្រែកទឹកសាប ផ្ទះបណ្តែតទឹក អូរត្រេះ ភ្នំសមាធិ និងតំបន់ទេសចរណ៍កែច្នៃរ៉ូវលីងរីសត សេនធើរអេនកុងហ្វោរេន ។ លោកបន្តទៀតថា ក្នុងចំណោមតំបន់ទេសចរណ៍ទាំង២២នេះ កន្លែងទេសចរណ៍មានប្រជាប្រិយភាពជាងគេគឺឆ្នេរអូរឈើទាល ឆ្នេរលំហែកាយ តំបន់ទឹកធ្លាក់ក្បាលឆាយ កោះតាគៀវ កោះរ៉ុងសន្លឹម និងកោះឫស្សី ។
លោកប្រធានមន្ទីរបានបន្តដោយសុទិដ្ឋិនិយមថា ដោយសារតែខេត្តព្រះសីហនុ ជាច្រកសេដ្ឋកិច្ចដ៏សំខាន់ ជាតំបន់ឆ្នេរទេសចរណ៍ធម្មជាតិដ៏ល្អឯក មានកោះដ៏ស្រស់ស្អាត មានកំពង់ផែអន្តរជាតិនោះ ទើបធ្វើឱ្យភ្ញៀវទេសចរពីមួយឆ្នាំទៅមួយឆ្នាំកើនឡើងឥតឈប់ឈរ ។ ជាក់ស្តែង គិតត្រឹម៨ខែ ដើមឆ្នាំ២០១០នេះ ចំនួនភ្ញៀវទេសចរសរុបមាន៤១៩.៥៧៧នាក់ កើនឡើង១៣,៣៤% ក្នុងនោះភ្ញៀវជាតិសរុប៣២៤.៣៩០នាក់ កើនឡើង១៥,២៦% ភ្ញៀវអន្តរជាតិសរុប៩៥.១៨៧នាក់ កើនឡើង៧,២៦% ។ ខេត្តព្រះសីហនុ មានសណ្ឋាគារចំនួន៤៥ ស្មើនឹង១.៧៧១បន្ទប់ ផ្ទះសំណាក់១១៥ ស្មើនឹង១.៦៧៨បន្ទប់ ។ ដោយមើលឃើញកំណើនភ្ញៀវទេសចរកើនឡើង ពីមួយឆ្នាំទៅមួយឆ្នាំ និងដើម្បីប្រកួតប្រជែងទីក្រុងស្អាតនោះ មន្ទីរទេសចរណ៍បាននិងកំពុងរៀបចំផែនការជាច្រើន ដើម្បីឱ្យគោលដៅទេសចរណ៍នានា រក្សាបាននូវបរិស្ថាន និងអនាម័យសំរាប់បងប្អូនទៅកំសាន្ត ៕
ចែករំលែកព័តមាននេះ