ខេត្តបន្ទាយមានជ័យ ៖ ជំនន់ទឹកភ្លៀងចាស់មិនទាន់ស្រកអស់ផង វេលាទាបភ្លឺព្រឹកថ្ងៃទី១៤ ខែកញ្ញា ឆ្នាំ២០១៨ នេះស្រាប់តែព្រះភិរុណបានបង្អុរយ៉ាងចាស់ដៃមួយមេធំថែមទៀតធ្វើឲ្យហេដ្ឋារចនាសម្ព័ន្ធមួយចំនួនដូចជាដងផ្លូវទាំងជាតិ និងបេតុង និងសាលារៀនមួយចំនួនក្នុងក្រុងប៉ោយប៉ែតរងការជន់លិចលើសដើម ។
សូម្បីតាមបុរីសំណង់ផ្ទះល្វែងមួយចំនួនក៏ត្រូវអ្នកស្រុកនាំគ្នាយកការ៉ុងច្រកខ្សាច់ឬដីដើម្បីទប់ស្កាត់ទឹកហូរចូលបន្ទប់រៀងខ្លួនៗ ។ ផ្លូវជាតិលេខ៥ ម្តុំមុខផ្លូវចូលអគារថ្មីរហូតដល់មុខបុរី សុខស្រេង ប្រហែល២០០ម៉ែត្រមានជំនន់ទឹកភ្លៀងហូរកាត់ផ្លូវ ហើយអ្នកដំណើរត្រូវបើកបរកាត់ទឹកគ្រប់គ្នាតែម្តង ។
ចំពោះផ្លូវមួយចំនួនក្នុងសង្កាត់ប៉ោយប៉ែតដោយសារមានទឹកជ្រៅកន្លែងខ្លះធ្វើឲ្យម៉ូតូអ្នកស្រុករលត់កណ្តាលទឹកហើយតាមលំនៅដ្ឋានគេឃើញអ្នកស្រុកច្រកខ្សាច់ក្នុងការ៉ុងទប់តាមមុខផ្ទះ ។
យ៉ាងណាក៏ដោយចំណតរថយន្តក្រុងពុំមានជំនន់ទឹកភ្លៀងទេ ព្រោះតែមានម៉ាស៊ីនបូមទឹកចេញ ។
បើទោះជាមានជំនន់ទឹកភ្លៀងលិចលង់ទីតាំងមួយចំនួនក្នុងក្រងប៉ោយប៉ែតក្តី ប៉ុន្តែអូរព្រំដែនពេលនេះនៅមិនទាន់មានទឹកពេញប្រៀបនៅឡើយទេ ហើយករណីខាងលើក៏មិនទាន់មានរបាយការណ៍ពីគ្រោះធម្មជាតិណាមួយកើតឡើងចំពោះពលរដ្ឋនោះដែរ ៕
ចែករំលែកព័តមាននេះ