ខេត្តកំពង់ឆ្នាំង ៖ ដោយសារតែអាជីវករនៅមុខផ្សារលើនៅតែបន្តលក់ប្រជែងគ្នានៅលើផ្លូវកៅស៊ូសាធារណៈធ្វើអោយកកស្ទះចរាចរណ៍ និងធ្វើអោយបាត់បង់សណ្តាប់ធ្នាប់ និងសោភ័ណភាពរបស់ក្រុងកំពង់ឆ្នាំងជារៀងរាល់ថ្ងៃធ្វើអោយមានប្រតិកម្មពីអាជ្ញាធរខេត្តផងនោះ ទើបប៉ុន្មានថ្ងៃនេះសមត្ថកិច្ចចម្រុះបានចុះរៀបចំសណ្តាប់មុខផ្សារលើជារៀងរាល់ព្រឹក ។
លោក មាស ម៉េងហួត នាយការិយាល័យនគរបាលសណ្ដាប់ធ្នាប់នៃស្នងការដ្ឋាននគរបាលខេត្តកំពង់ឆ្នាំងបានឲ្យដឹងថា តាមគោលការណ៍របស់អាជ្ញាធរខេត្តគឺមិនអនុញ្ញាតអោយមានការលក់ដាក់ទំនិញលក់ដូរនៅលើផ្លូវសាធារណៈមុខផ្សារលើឡើយ ។ ប៉ុន្តែកន្លងមកសមត្ថកិច្ចពិនិត្យឃើញមានអាជីវករលក់បន្លែ លក់ត្រី លក់សាច់ជ្រូក មួយចំនួនដែលមានទីតាំងលក់ដូរនៅខាងក្នុងផ្សារហើយ បែរជាមកលក់ដូរនៅលើផ្លូវកៅស៊ូមុខផ្សារទៅវិញ បូករួមទាំងអ្នកមកពីជនបទដាក់បន្លែបង្កាលក់ដូរបន្ថែមទៀតនោះ ការលក់ដូរបានហៀរពេញទ្រូងផ្លូវយ៉ាងអនាធិបតេយ្យ ។
លោកបានបញ្ជាក់ទៀតថា សមត្ថកិច្ចចម្រុះធ្លាប់បានហៅអាជីវករមួយចំនួននោះមកធ្វើកិច្ចសន្យាបញ្ឈប់ការលក់ដូរអនាធិបតេយ្យបែបនេះជាច្រើនលើកច្រើសាររួចមកហើយ ប៉ុន្តែពួកគេនៅតែមិនគោរពគោលការរបស់ខេត្តមិនគោរពកិច្ចសន្យារបស់ខ្លួន ។
ជាក់ស្ដែងនៅព្រឹកថ្ងៃទី១២ ខែកញ្ញា ឆ្នាំ២០១៨ អាជីវករលក់សាច់ជ្រូកម្នាក់បានឈ្លោះជាមួយ ក្រុមចម្រុះ និងរកវាយគ្នាទៀតផងដោយបានលើកឡើងថា បើអ្នកផ្សេងៗមកដាក់ឥវ៉ាន់លក់បានគាត់ក៏លក់បានដូចគ្នា និងសុំមើលផងនៅផ្សារឧត្តុង្គ ផ្សារត្រីព្រែកភ្នៅ មិនដែលឃើញគេដេញអ្នកលក់ដូរទេ មានតែខេត្តកំពង់ឆ្នាំងទេ ម៉េចក៏ខ្លាំងម្ល៉េះ គឺចុះមកដល់កំទេចប្រមូលយកដឹកឥវ៉ាន់លក់ដូរឡើងឡានតែម្តង ។ ករណីនេះក្រុមចម្រុះថា នឹងធ្វើរបាយការណ៍ជូនលោកអភិបាលក្រុងកំពង់ឆ្នាំងបើម្បីមានវិធានការ ។
ដោយឡែកលោក ក្រូច ម៉ារ៉ា អភិបាលរងក្រុងកំពង់ឆ្នាំងដែលចុះមកធ្វើការរៀបចំសណ្តាប់ធ្នាប់ជាមួយក្រុមចម្រុះបានឲ្យដឹងថា តាមគោលការណ៍របស់អាជ្ញាធរក្រុង និងអាជ្ញាធរខេត្ត មិនអនុញ្ញាតឲ្យអាជីវករលក់ដូរនៅលើផ្លូវកៅស៊ូឡើយ គឺអោយលក់ត្រឹមតែលើខឿនមុខផ្សារលើតែប៉ុណ្ណោះ ប៉ុន្តែកន្លងមកបើគ្មានសមត្ថកិច្ចមករៀបចំជាប្រចាំនោះទេ គឺពួកគាត់នៅតែដាក់ទំនិញលក់ដូរលើផ្លូវកៅស៊ូមុខផ្សារជារៀងរាល់ថ្ងៃ ។
ដូច្នេះចំពោះវិធានការក្នុងពេលនេះសមត្ថកិច្ចចម្រុះនឹងបន្តចុះមករៀបចំសណ្តាប់ធ្នាប់ជារៀងរាល់ថ្ងៃបើអ្នកលក់ដូរណាមិនគោរពការណែនាំទេនោះក្រុមចម្រុះ និងដកហូតឥវ៉ាន់ និងទំនិញលក់ដូរយកទៅរក្សាទុកនៅសាលាក្រុងកំពង់ឆ្នាំងដើម្បីធ្វើការអប់រំ និងផាកពិន័យ ៕
ចែករំលែកព័តមាននេះ