រាជធានីភ្នំពេញ ៖ បុរស២នាក់បានជិះម៉ូតូមួយគ្រឿងចុះពីលើស្ពានអាកាសស្ទឹងមានជ័យជ្រុលទៅបុកខឿនចិញ្ចើមផ្លូវ បណ្តោយអោយរងរបួសធ្ងន់ម្នាក់ និងស្រាលម្នាក់ ហេតុការណ៍នេះដែរបានកើតឡើង នៅវេលាម៉ោង៩និង១០នាទី យប់ថ្ងៃទី១៣ ខែកញ្ញា ឆ្នាំ២០១៨ ចំនុចគល់ស្ពានអាកាសស្ទឹងមានជ័យ ត្រើយខាងជើង ផ្លូវ២៧១ សង្កាត់បឹងសាឡាង ខណ្ឌទួលគោក ។
តាមសម្តីអ្នកឃើញហេតុការណ៍បានឱ្យដឹងថា មុនពេលកើតហេតុ គេបានឃើញបុរស២នាក់ដែលជាសន្តិសុខឯកជនដែលជាសន្តិសុខក្រុមហ៊ុនឯកជន មិនដឹងថាចេញពីផឹកស៊ីនៅកន្លែងណានោះ គឺបានជិះម៉ូតូមួយគ្រឿងម៉ាកហុងដាវ៉េវ ពណ៌ក្រហម ពាក់ស្លាកលេខ បន្ទាយមានជ័យ ១D-៧៣៩៩ ធ្វើដំណើរឆ្លងកាត់ស្ពានអាកាសស្ទឹងមានជ័យ ក្នុងទិសដៅពីត្បូងទៅជើង ឆ្ពោះទៅផ្លូវ២៧១ ។
ប្រភពដដែលបានបន្តថា លុះជិះម៉ូតូចុះពីលើស្ពានក្នុងល្បឿនលឿន ហើយណាមួយអ្នកបើកម៉ូតូស្រវឹងផងនោះ ទើបធ្វើអោយម៉ូតូជ្រុលទៅបុកខឿនចិញ្ចើមផ្លូវ ក្រោមស្ពានអាកាសស្ទឹងមានជ័យ បណ្តាលអោយ ដួលម៉ូតូ ខ្ទាតទាំងមនុស្សជិត២០ម៉ែត្រ ធ្វើអ្នកបើកបរម៉ូតូរងរបួសបែកក្បាល និងបាក់ដៃខាងឆ្វេងធ្ងន់ ចំណែកអ្នកអង្គុយខាងក្រោយរងរបួសរលាត់ដៃរលាត់ជើងតិចតួច ភ្លាមៗនោះដែរជនរងគ្រោះ ដែលរងរបួសធ្ងន់ ត្រូវបានរថយន្តសង្គ្រោះបានមកដឹកជនរងគ្រោះយកទៅនៅគ្លិនិក ឯកជន ។ រីឯម៉ូតូបានរងការខូចខាតផ្នែកខាងបន្តិចបន្តួច ។
ក្រោយពេលកើតហេតុ បុរសដែលរងរបួសស្រាលបានជិះទៅតាមរថយន្តសង្គ្រោះពីក្រោយផងដែរ ៕
ចែករំលែកព័តមាននេះ