ខេត្តកំពង់ឆ្នាំង៖ មានការភ្ញាក់ផ្អើលមួយបានកើតឡើងកាលពីវេលាប្រមាណម៉ោង៤ល្ងាចថ្ងៃទី១៣ ខែកញ្ញា ឆ្នាំ២០១៨ ដោយសារតែលោកយាយ លោកតាដែលសម្រាកសុំសីលនៅក្នុងវត្តមានការងឿងឆ្ងល់ ព្រោះព្រះគ្រូចៅអធិការវត្ត ដែលសឹងនៅក្នុងកុដិពេញមួយយប់និងមួយថ្ងៃទៅហើយ មិនឃើញនិមន្តចេញមកឆាន់ចង្ហាន់សោះ។
ពេលនោះ លោកយាយ លោកតា បាននាំគ្នាគាស់ទ្វារកុដិមើលទើបដឹងចៅអធិការវត្តបានសុគតបាត់ទៅហើយ មិនដឹងមកពីមូលហេតុអ្វី។ ហេតុការណ៍នេះបានកើតឡើង នៅក្នុងវត្តទេពធីតារាម ( ហៅវត្តយាយ
ទេព ) ស្ថិតនៅក្នុងភូមិផ្សារឆ្នាំង សង្កាត់ផ្សារឆ្នាំង ក្រុងកំពង់ឆ្នាំង ។
លោក ម៉ា យន្ត អធិការរងនគរបាលក្រុងកំពង់ឆ្នាំងបានអោយដឹងនៅព្រឹកថ្ងៃទី១៤ ខែកញ្ញា ឆ្នាំ២០១៨ ថាព្រះចៅអធិការវត្តយាយទេព ដែលបានសុគតខាងលើមានព្រះនាម ព្រហ្ម នរៈសិដ្ឋ ព្រះជន្ម៤១ព្រះវស្សា ជាព្រះគ្រូចៅអធិការវត្តផង និងជាព្រះវិន័យធរក្រុងកំពង់ឆ្នាំង។
លោកបានបន្តថា តាមការចុះស្រាវ ជ្រាវ និងការចុះធ្វើកោសល្យវិច្ច័យរបស់សមត្ថកិច្ចចំរុះបានអោយដឹងថាព្រះចៅអធិការវត្តខាងលើបានសុគតដោយព្រះរោគគាំងបេះដូង តាំងពីពាក់កណ្តាលយប់មកម៉្លេះ តែគ្មានអ្នកណាដឹងឡើយ។
តាមប្រភពមួយទៀតបានប្រាប់សមត្ថកិច្ចថា កាលពីរសៀលថ្ងៃទី១២ ខែកញ្ញា ព្រះអង្គបាននិមន្តមកពីព្យាបាលព្រះរោគស្ពៀតសរសៃបេះដូងនៅក្រុងភ្នំពេញ ហើយនៅពេលយប់ព្រះអង្គបានចូលសឹងនៅក្នុងកុដិ តាំងពីវេលាម៉ោង៨ ឬ៩យប់មកម៉្លេះ ។ លុះព្រឹកឡើងចាស់ៗនៅក្នុងវត្តបានរៀបចង្ហាន់សំរាប់លោកឆាន់ដូចធម្មតា ទុកនៅមុខកុដិ ប៉ុន្តែមិនឃើញលោកចេញមកឆាន់ឡើយ ។
លុះដល់ពេលថ្ងៃត្រង់ ចាស់ៗក្នុងវត្តបានរៀបចង្ហាន់ប្រគេនលោកនៅមុខកុដិម្តងទៀត ក៏មិនឃើញព្រះអង្គនិមន្តចេញមកឆាន់ដែរ ទើបដល់វេលាម៉ោងប្រមាណ៤ល្ងាច ចាស់ៗនាំគ្នាគាស់ទ្វារកុដិចូលមើល ទើបដឹងថា ព្រះអង្គបានសុគតបាត់ទៅហើយ ។
លោកយាយឈ្មោះ សោម វណ្ណា អាយុ៧០ឆ្នាំ ត្រូវជាញោមព្រះគូចៅអធិការវត្តខាងលើបានអោយដឹងថា ព្រះគ្រូចៅអធិកា រដែលសុគតជាកូនទី៣ (កូនពៅ) ក្នុងគ្រួសារ ដែលមានទីលំនៅក្នុងភូមិថ្លាន់ សង្កាត់ស្នោរ ខណ្ឌសែនសុខ រាជធានីភ្នំពេញ ព្រះអង្គបានបួសតាំងពីអាយុ១៣ឆ្នាំនៅក្នុងវត្តពោធិ៍នៅក្នុងខណ្ឌពោធិសែនជ័យ ក្រុងភ្នំពេញ រហូតមកដល់ពេលនេះលោកបានបួសចំនួន២៨ឆ្នាំហើយ ។
ដោយឡែកលោក សៀង អុីម ប្រធាន គណៈកម្មាការវត្តយាយទេព បានអោយដឹងថា ព្រះអង្គ ព្រហ្ម នរៈសិដ្ឋ ជាព្រះគ្រូចៅអធិការវត្ត បានគង្គនៅក្នុងវត្តយាយទេពចំនួន១០ឆ្នាំមកហើយ និងបានឡើងធ្វើជាព្រះគូចៅអធិការវត្តយាយទេព រយៈពេល៥ឆ្នាំមកហើយ ។
សពចៅអធិការវត្តនឹងប្រារព្វធ្វើបុណ្យនៅក្នុងវត្តយាយទេព រយៈពេល៣ថ្ងៃ ឬ៧ថ្ងៃ នៅមិនទាន់កំណត់នៅឡើយទេ តែការបាត់បង់ព្រះជន្ម របស់ព្រះអង្គ គឺជាការបាត់បង់យ៉ាងធំធេង ដែលញាតិញោម សិស្សគណ និង ពុទ្ឋបរិស័ទរបស់ព្រះអង្គមានការសោកស្តាយយ៉ាងក្រៃលែង៕
ចែករំលែកព័តមាននេះ