ទីក្រុងសេអ៊ូល ៖ កាលពីថ្ងៃពុធកន្លងមកនេះ រដ្ឋមន្ត្រីពាណិជ្ជកម្មប្រទេសកូរ៉េខាងត្បូងបានបង្ហាញក្ដីកង្វល់ពីការលូតលាស់នៃការនាំចេញរបស់ប្រទេសខ្លួនអាចនឹងអន់ថយនៅខែកញ្ញានេះ ព្រោះតែការនាំចេញ និងចំនួនថ្ងៃធ្វើការឆ្នាំនេះ មានតិចជាងឆ្នាំមុន ។
លោក Kim Hyun-chong រដ្ឋមន្ត្រីរូបនេះ មានសុទិដ្ឋិនិយមទៅលើការនាំចេញក្នុងឆ្នាំនេះ ប៉ុន្តែលោកនិយាយថា ការលូតលាស់នៃការនាំចេញក្នុងខែនេះអាចនឹងអន់ថយ ព្រោះតែចំនួនថ្ងៃធ្វើការមានតិចជាងមុន ដោយសារតែបុណ្យរដូវរំហើយ និងការនាំចេញដ៏ខ្ពស់កាលពីខែកញ្ញាឆ្នាំមុន ។
លោកបាននិយាយក្នុងកិច្ចប្រជុំជាមួយនឹងអ្នកតំណាងភ្នាក់ងារលើកតម្កើងការធ្វើពាណិជ្ជកម្ម និងសមាគមឧស្សាហកម្មធំៗថា ៖« ប្រាក់ចំណូលបានពីការនាំចេញសរុបកាលពី៨ខែដំបូងនាឆ្នាំនេះមានកម្រិតដ៏ខ្ពស់ ហើយប្រសិនបើនិន្នាការនេះនៅតែបន្ត កូរ៉េខាងត្បូងអាចរកប្រាក់ចំណូលបាន៦០០ប៊ីលានដុល្លារពីការនាំចេញជាលើកដំបូងក្នុងឆ្នាំនេះ »។
លោកបានបន្តថា ៖« ប៉ុន្តែខ្ញុំមានកង្វល់ជាច្រើនពីទិន្នន័យខែកញ្ញា បើធៀបនឹងឆ្នាំមុនព្រោះតែឥទ្ធិពលនៃឆ្នាំមុន និងចំនួនថ្ងៃធ្វើការដែលតិចជាងមុន »។
លោក Kim បានសន្យាថា នឹងខិតខំជួយដល់អ្នកនាំចេញក្នុងស្រុកបន្ថែមដើម្បីត្រៀមខ្លួនសម្រាប់ការប្រែប្រួលក្នុងទីផ្សារហិរញ្ញវត្ថុ ខណៈដែលសហរដ្ឋអាមេរិកបង្កើនអត្រាការប្រាក់, ភាពចលាចលនៃរូបិយវត្ថុនៅទីផ្សារកំពុងលូតលាស់លឿន និងជម្លោះពាណិជ្ជកម្មរវាងសហរដ្ឋអាមេរិក និងប្រទេសចិន ។
លោក Kim បានបន្ថែមថា ៖« ពួកយើងត្រូវការវិធានការជាច្រើន ដើម្បីដោះស្រាយបញ្ហាទាំងនេះទាំងក្នុងស្រុក និងនៅបរទេស »។
លោកបានបន្តទៀតថា រដ្ឋាភិបាលនឹងពង្រីកការធានាប្រាក់កម្ចី និងធានារ៉ាប់រងសម្រាប់អ្នកនាំចេញតូចៗ រួមទាំងក្រុមហ៊ុនបង្កើតថ្មីផងដែរដើម្បីជួយដល់ពួកគេក្នុងការឆ្លងកាត់ឧបសគ្គរយៈពេលខ្លី ។
ក្នុងរយៈពេលវែង លោក Kim បានសន្យាថា នឹងបង្កើនការខិតខំប្រឹងប្រែងផ្សព្វផ្សាយ និងបង្កើតជាកញ្ចប់ហិរញ្ញវត្ថុជាច្រើនសម្រាប់ទីផ្សារកំពុងលូតលាស់លឿននិងសំខាន់ដូចជា ឥណ្ឌា, ឥណ្ឌូណេស៊ី, រុស្ស៊ី និងប្រេស៊ីលជាដើម ដើម្បីស្វែងរកកត្តាជំរុញដល់ការលូតលាស់ថ្មី ៕
ចែករំលែកព័តមាននេះ