ទីក្រុងបាងកក ៖ យោងតាមរបាយការណ៍រួមរបស់វិទ្យាស្ថាន China Tourism Academy និងក្រុមហ៊ុនទេសចរណ៍Ctrip បានឲ្យដឹងថា ប្រទេសថៃបន្តជាទីតាំងទេសចរណ៍លេខមួយសម្រាប់ជនជាតិចិនដែលចង់ធ្វើដំណើរទៅកាន់បរទេសកាលពីឆមាសទី១នាឆ្នាំនេះ ។…
ទីក្រុងបាងកក ៖ យោងតាមរបាយការណ៍រួមរបស់វិទ្យាស្ថាន China Tourism Academy និងក្រុមហ៊ុនទេសចរណ៍Ctrip បានឲ្យដឹងថា ប្រទេសថៃបន្តជាទីតាំងទេសចរណ៍លេខមួយសម្រាប់ជនជាតិចិនដែលចង់ធ្វើដំណើរទៅកាន់បរទេសកាលពីឆមាសទី១នាឆ្នាំនេះ ។
របាយការណ៍ខាងលើបានឲ្យដឹងទៀតថា មានភ្ញៀវទេសចរជនជាតិចិនប្រមាណ៧១,៣លាននាក់បានធ្វើដំណើរចេញពីក្រុងចំនួន២០០ក្នុងប្រទេសចិនទៅកាន់គោលដៅចំនួន១៣០ប្រទេសកាលពីឆមាសទី១កន្លងមកនេះ ខ្ពស់ជាងឆ្នាំមុន១៥% ។
លោក Dai Bin ប្រធានវិទ្យាស្ថានខាងលើបាននិយាយថា ទីតាំងដែលមានប្រជាប្រិយភាពជាងគេមានប្រទេសថៃ ជប៉ុន វៀតណាម កូរ៉េខាងត្បូង សិង្ហបុរី ឥណ្ឌូណេស៊ី ម៉ាឡេស៊ី រុស្ស៊ី សហរដ្ឋអាមេរិក និងប្រទេសកម្ពុជា ។
លោក Dai បានបន្តថា ៖« ក្នុងចំណោមទីតាំងទេសចរណ៍មានប្រជាប្រិភាព ប្រទេសថៃបន្តជាទីតាំងទេសចរណ៍លេខ១សម្រាប់ភ្ញៀវទេសចរចិនក្នុងឆមាសទី១នាឆ្នាំនេះ »។
ក្រសួងទេសចរណ៍ និងកីឡារបស់ប្រទេសថៃបានឲ្យដឹងថា ប្រទេសថៃទទួលភ្ញៀវទេសចរបានប្រមាណ១៩,៤លាននាក់កាលពីឆមាសទី១កន្លងមក ឬច្រើនជាងឆ្នាំមុន១២%។ ក្នុងនោះ ភ្ញៀវទេសចរជនជាតិចិនជាប់ចំណាត់ថ្នាក់លេខមួយ ឬមាន៥,៩លាននាក់ និងច្រើនជាងឆ្នាំមុនដល់ទៅ២៦% ។
ក្រសួងគិតថា ចំនួនភ្ញៀវទេសចរចិនទៅកាន់ប្រទេសថៃនឹងកើនដល់១០លាននាក់ក្នុងឆ្នាំនេះបើទោះជាមានឧបទ្ទវហេតុទូកនៅPhuket កាលពីខែកក្កដាដែលបង្កឲ្យជនជាតិចិនចំនួន៤២នាក់បាត់បង់ជីវិតពិតមែនក្តី ។
កាលពីថ្ងៃចន្ទកន្លងមក រដ្ឋមន្ត្រីពាណិជ្ជកម្ម Weerasak Kowsurat បានធ្វើដំណើរទៅកាន់ Phuket ដើម្បីពិនិត្យពីស្ថានការណ៍ទេសចរណ៍ និងវិធានការសុវត្ថិភាពចាប់តាំងពីកើតមានឧបទ្ទវហេតុមក ។
លោកWeerasakបានឲ្យដឹងថា រដ្ឋាភិបាលបានបញ្ជាឲ្យបង្កើនប្រសិទ្ធភាពផ្នែកសុវត្ថិភាព និងសន្តិសុខលើកោះនេះ និងតាមទីតាំងទេសចរណ៍ដទៃទៀត ដើម្បីទទួលបានជំនឿជឿជាក់ពីភ្ញៀវទេសចរវិញ ។
រដ្ឋមន្ត្រីរូបនេះបានបន្ថែមទៀតថា រដ្ឋាភិបាលមានគម្រោងទាក់ទាញភ្ញៀវទេសចរទៅកាន់ Phuket តាមរយៈឆ្នេរស្អាតៗ និងវប្បធម៌ដែលខុសប្លែកពីតំបន់ដទៃ ៕
ចែករំលែកព័តមាននេះ