រាជធានីភ្នំពេញ ៖ ប្រមុខដឹកនាំប្រទេសចំនួន៣ កម្ពុជា វៀតណាម និងឡាវ បានពិភាក្សាគ្នា ដើម្បីរកចំណុចអាទិភាពមួយចំនួនសម្រាប់គម្រោងអាទិភាពនៃការអភិវឌ្ឍតំបន់ត្រីកោណឲ្យក្លាយជាតំបន់ប្រកបដោយការអភិវឌ្ឍជានិរន្តរភាព ខាងសេដ្ឋកិច្ច និងពាណិជ្ជកម្ម…
រាជធានីភ្នំពេញ ៖ ប្រមុខដឹកនាំប្រទេសចំនួន៣ កម្ពុជា វៀតណាម និងឡាវ បានពិភាក្សាគ្នា ដើម្បីរកចំណុចអាទិភាពមួយចំនួនសម្រាប់គម្រោងអាទិភាពនៃការអភិវឌ្ឍតំបន់ត្រីកោណឲ្យក្លាយជាតំបន់ប្រកបដោយការអភិវឌ្ឍជានិរន្តរភាព ខាងសេដ្ឋកិច្ច និងពាណិជ្ជកម្ម ។
នេះបើយោងតាមបណ្តាញសង្គមហ្វេសប៊ុកសម្តេចតេជោបានឲ្យដឹងថា នៅព្រឹកថ្ងៃទី១៣ កញ្ញា ឆ្នាំ២០១៨នេះ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានអញ្ជើញពិសាអាហារពេលព្រឹកជាមួយនាយករដ្ឋមន្ត្រីឡាវ ថង លួនស៊ីសូលីត និងនាយករដ្ឋមន្ត្រីវៀតណាមលោក ង្វៀន សួនហ្វុក ដែលជំនួបនេះត្រូវបានធ្វើឡើងនៅទីក្រុងហាណូយ ប្រទេសវៀតណាម ក្នុងឱកាសនៃការចូលរួមក្នុងវេទិកាសេដ្ឋកិច្ចពិភពលោកលើកទី២៧ ។ ក្នុងពិធីទទួលទានអាហារពេលព្រឹកការងារនេះប្រមុខរដ្ឋាភិបាលនៃប្រទេសទាំងបីកម្ពុជា ឡាវ វៀតណាម បានធ្វើការពិភាក្សាគ្នាយ៉ាងយកចិត្តទុកដាក់ទៅលើការរិតចំណងសាមគ្គីភាព និងកិច្ចសហប្រតិបត្តិការនៃប្រទេសទាំងបី ពិសេសការរិះរកគ្រប់មធ្យោបាយក្នុងការជំរុញកិច្ចអភិវឌ្ឍ សម្រាប់ប្រទេសទាំងបីដែលក្នុងនោះភាគីទាំងបីបានធ្វើការពិភាក្សាគ្នាយ៉ាងយកចិត្តទុកដាក់លើការបន្តរួមគ្នាដោះស្រាយបញ្ហាប្រឈមនានា ដើម្បីធានាសន្តិភាពស្ថេរភាពក្នុងការជំរុញកំណើននៃការអភិវឌ្ឍប្រទេសទាំងបី កម្ពុជា ឡាវ និងវៀតណាម ។
ប្រភពបានបញ្ជាក់ថា«នៅក្នុងជំនួបពិភាក្សាការងារនោះដែរ មេដឹកនាំនៃប្រទេសទាំងបីក៏បាន ធ្វើការពិភាក្សាគ្នាយ៉ាងយកចិត្តទុកដាក់ទៅលើគម្រោងនៃការតភ្ជាប់នៃប្រទេសទាំងបី ពិសេសនៅតំបន់ត្រីកោណដែលជាតំបន់មួយមានការអភិវឌ្ឍទាបនៅឡើយ» ។ ប្រមុខរដ្ឋាភិបាលនៃប្រទេសទាំងបីក៏បានធ្វើការពិនិត្យរួមគ្នាការងារជាអាទិភាពមួយចំនួនសម្រាប់គម្រោងអាទិភាពនៃការអភិវឌ្ឍតំបន់ត្រីកោណសម្តៅធ្វើយ៉ាងណាកាត់បន្ថយគម្លាតនៃការអភិវឌ្ឍតំបន់ទាំងនោះឲ្យមានការតភ្ជាប់ និងការអភិវឌ្ឍប្រកបដោយនិរន្តរភាពខាងសេដ្ឋកិច្ច និងពាណិជ្ជកម្ម ។
ក្នុងកិច្ចពិភាក្សាគ្នានោះដែរមេដឹកនាំនៃប្រទេសទាំងបីក៏បានប្តេជ្ញារួមគ្នាក្នុងការជំរុញល្បឿន នៃការអភិវឌ្ឍតំបន់ត្រីកោណ តាមរយៈការពិនិត្យលទ្ធភាព និងការដាក់សំណើរទៅកាន់ដៃគូអភិវឌ្ឍ ដើម្បីរកកញ្ចប់ថវិកាអភិវឌ្ឍតំបន់ត្រីកោណឲ្យកាន់តែមានការអភិវឌ្ឍរីកចម្រើនទ្វេឡើងថែមទៀត ពិសេសជីវភាពរស់នៅរបស់ប្រជាពលរដ្ឋក្នុងតំបន់ត្រីកោណកាន់តែទទួលបាននូវការលើកកម្ពស់ និងមានជីវភាពកាន់តែប្រសើរឡើង ៕
ចែករំលែកព័តមាននេះ