ខេត្តកណ្ដាល ៖ តាមសេចក្តីរាយការណ៍បឋមបានឱ្យដឹងថា ប្រជាពលរដ្ឋបានប្រទះឃើញសពបុរសម្នាក់អណ្តែតទឹកនៅចំណុចក្នុងបឹងចុងព្រែកបាឡាត់ឆឹង ឃុំត្រើយស្លា ស្រុកស្អាង ខេត្តកណ្តាល កាលពីវេលាម៉ោង៤និង១០នាទីរសៀលថ្ងៃទី១៣ កញ្ញា ឆ្នាំ២០១៨ ។
សពជនរងគ្រោះមិនត្រូវបានគេស្គាល់អត្តសញ្ញាណ ភេទប្រុស អាយុប្រហែល៥៣ឆ្នាំ ស្លៀកខោជើងវែងពណ៌ខ្មៅ ពាក់អាវយឺតពណ៌ក្រហមដៃវែង សក់ខ្លី សម្បុរខ្មៅ កំពស់ប្រហែល១,៦៥ម៉ែត្រ ។
តាមប្រភពព័ត៌មានពីប្រជាពលរដ្ឋឈ្មោះ ឈន គោ ភេទប្រុស អាយុ៣៨ឆ្នាំ រស់នៅភូមិព្រែកនាឡាត់ឆឹង ឃុំត្រើយស្លា ស្រុកស្អាង បានរាយការណ៍ប្រាប់សមត្ថកិច្ចប៉ុស្តិ៍ឱ្យដឹងថា គាត់ធ្លាប់ឃើញជនរងគ្រោះជាមនុស្សវិកលចរិត រត់តាមភូមិសឹងរាល់ថ្ងៃ និងមិនឃើញជនរងគ្រោះប្រហែល២ថ្ងៃមកហើយ ស្រាប់តែប្រទះឃើញស្លាប់អណ្តែតទឹកទៅវិញ ។ បន្ទាប់ពីប្រទះឃើញសពជនរងគ្រោះអណ្តែតទឹកនៅចុងព្រែកបាឡាត់ឆឹង គាត់ក៏បានរាយការណ៍ប្រាប់សមត្ថកិច្ច ។
ក្រោយទទួលបានព័ត៌មានខាងលើភ្លាម កម្លាំងនគរបាលប៉ុស្តិ៍ចុះដល់កន្លែងហេតុបានឃើញសពអណ្តែតទឹក មែន ហើយមន្ត្រីជំនាញស្រុក នគរបាលប៉ុស្តិ៍ និងក្រុមប្រឹក្សាឃុំ មេភូមិបានចុះពិនិត្យសព រួចរកឃើញថា ជនរងគ្រោះពុំមានស្លាកស្នាមអ្វីគួរឲ្យកត់សំគាល់ឡើយ ។
ការសន្និដ្ឋានរបស់សមត្ថកិច្ច ជនរងគ្រោះគឺស្លាប់ដោយសារលង់ទឹក។ ក្រោយពិនិត្យរួច កម្លាំងនគរបាលប៉ុស្តិ៍ និងជំនាញស្រុកបានកប់សពនៅចុងព្រែកបាឡាត់ឆឹង ដើម្បីរង់ចាំស្រាវជ្រាវរកក្រុមគ្រួសារមកបញ្ជាក់អត្តសញ្ញាណ ។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ