ខេត្តត្បូងឃ្មុំ ៖ មនុស្សម្នានាំគ្នាភ្ញាក់ផ្អើលទាំងព្រឹកថ្ងៃទី១៣ ខែកញ្ញា ឆ្នាំ២០១៨ នៅហាងលក់បាយមួយកន្លែងយីហោ «ស្រ៊ុន ប៊ុនហឿន» ស្ថិតនៅភូមិបេង ឃុំដារ ស្រុកមេមត់ ដោយបុរសម្នាក់កើតរោគសរសៃប្រសាទបានកាន់ពូថៅក្នុងដៃក្រវីក្រវាត់ ហើយដោយខ្លាចគ្រោះថ្នាក់រត់ចែកជើងគ្នាតែត្រូវបានម្ចាស់ហាងទូរស័ព្ទប្តឹងសមត្ថកិច្ចឲ្យជួយអន្តរាគមន៏ទាន់ពេលវេលា ។
តាមប្រភពពីបុរសឈ្មោះ ហ៊ាន ប៊ុនហេង អាយុ៣៣ឆ្នាំ ប្រាប់ឲ្យដឹងថា ពូរបស់គេឈ្មោះ ផន លី អាយុ៤៨ឆ្នាំ នៅភូមិក្តុល ឃុំទន្លូង ស្រុកមេមត់ បានមកលេងផ្ទះរបស់គេនៅភូមិបេងចំនួន៣ថ្ងៃមកហើយរហូតមកដល់ព្រឹកថ្ងៃទី១៣ ខែកញ្ញា ឆ្នាំ២០១៨ ស្រាប់តែជំងឺសរសៃប្រសាទបានធ្វើទុកដោយពូបានកាន់កូនពូថៅនៅក្នុងដៃដើរទៅដើរមកចេញចូល និងបានក្រវី ព្រមទាំងបានចោលទៅក្នុងហាង ធ្វើឲ្យសមាជិកក្រុមគ្រួសារ និងភ្ញៀវនាំគ្នារត់ឡើងប្រសាចចេញមកក្រៅរកកន្លែងសុវត្ថិភាពរៀងៗខ្លួន ។
បុរសឈ្មោះ ប៊ុន ហេង ប្រាប់បន្តថា ដោយសារតែឃើញក្នុងសភាពមិនស្រួលបែបនេះម្តាយរបស់ខ្លួនឈ្មោះ ផន ស៊ុន អាយុជាង៥០ឆ្នាំ បានរាយការណ៏ប្រាប់នគរបាលប៉ុស្តិ៍រដ្ឋបាលឃុំដារឲ្យចុះមកជួយអន្តរាគន៏ និងបានចាប់ពូរបស់គេដោយបានចងទាំងដៃជើងជាប់ចៀសវាងការពារមិនឲ្យអ្នកណាម្នាក់រងគ្រោះថ្នាក់ ។
តែដោយមានការស្នើសុំពីសមាជិកក្រុមគ្រួសារបានសុខចិត្តយកពូឈ្មោះ លី ទៅដាក់នៅមណ្ឌលឱកាសខ្ញុំនៅរាជរាធីភ្នំពេញព្រោះថា កន្លងមកពេលដែលពូកើតរោគសរសៃប្រសាទធ្វើទុក្ខបែបនេះបានយកនៅដាក់នៅមណ្ឌលនោះដោយបានជាស្រួលបួល និងបានវិលត្រឡប់មកផ្ទះនៅស្រុកមេមត់វិញបាន៣ឆ្នាំ ។ ប៉ុន្តែពូមិនបានតមស្រាគិតតែផឹកញឹកញាប់ពេកនោះជម្ងឺសរសៃប្រសាទបានរើឡើងដូចមានអាការខាងលើកាន់ពូថៅដេញគេឯងតែសំណាងបានសមត្ថកិច្ចចុះមកជួយអន្តរាគមន៏ទាន់ពេលវេលា ។
បុរសឈ្មោះ ប៊ុន ហេង បញ្ជាក់ថា កាលពីមុនពូរបស់គេមានប្រពន្ធដល់ទៅ២តែដោយសារតែគាត់កើតរោគសរសៃប្រសាទបែបនេះប្រពន្ធបានលែងលះគាត់អស់ទៅហើយ និងមានកូនស្រីថែមទៀតតែមិនមានអ្នកណារស់នៅជាមួយឡើយ ។
រាល់ថ្ងៃពូរស់នៅភូមិក្តុល ឃុំទន្លូង ស្រុកមេមត់ នៅជាមួយនឹងតាយាយ ចំណែកសមាជិកក្រុមគ្រួសារផ្សេងទៀត មិនមានអ្នកណារស់នៅកើតទេដោយសារតែពូកើតរោគសរសៃប្រសាទនេះឧស្សាហ៏ធ្វើទុក្ខដោយសារតែគាត់ពិសារស្រា ៕
ចែករំលែកព័តមាននេះ