ខេត្តប៉ៃលិន ៖ បុរសម្នាក់ដែលត្រូវបានគេសង្ស័យថា ស្រវឹងហើយបើកបររថយន្ត ទើបបានជាទប់ចង្កូតមិនជាប់ ក៏ជ្រុលបុកចូលទៅក្នុងផ្ទះប្រជាពលរដ្ឋ បណ្តាលឱ្យម្ចាស់ផ្ទះម្នាក់រងរបួស ត្រូវគេបញ្ជូនទៅសង្គ្រោះនៅមន្ទីរពេទ្យបង្អែកខេត្ត ។
ហេតុការណ៍បានកើតកាលពីវេលាម៉ោង១១និង៣០នាទីយប់ថ្ងៃទី១២ ខែកញ្ញា ឆ្នាំ២០១៨ ស្ថិតនៅចំណុចភូមិបឌិននៀវ សង្កាត់ប៉ៃលិន ក្រុងប៉ៃលិន ខេត្ដប៉ៃលិន ។
ប្រភពព័ត៌មានបានឱ្យដឹងថា ឈ្មោះ ស៊ីន សាវិន ភេទប្រុស អាយុ៣៣ឆ្នាំ ជាជនជាតិខ្មែរមុខរបរជាងសំណង់ មានទីលំនៅបច្ចុប្បន្ន ក្នុងភូមិអូរតាពុកលើ សង្កាត់ប៉ៃលិន ក្រុងប៉ៃលិន ខេត្តប៉ៃលិន ជាអ្នកបើកបររថយន្តម៉ាក ប៉ាហ្សេរ៉ូ (PAJERO) ពណ៌ប្រាក់ ពាក់ស្លាកលេខ ភ្នំពេញ 2B-1520 ក្នុងទិសដៅពីខាងត្បូងឆ្ពោះទៅជើង ។ ចំណែកជនរងគ្រោះជាម្ចាស់ផ្ទះឈ្មោះ អែល មីន ភេទប្រុស អាយុ៤០ឆ្នាំ ជាខ្មែរអ៊ិស្លាម មុខរបរអ្នកលក់ដូរ មានទីលំនៅក្នុងភូមិកើតហេតុខាងលើ ។
ប្រភពបន្តទៀតថា នៅយប់ថ្ងៃកើតហេតុ គេឃើញបុរសម្នាក់បានបើកបររថយន្តមួយគ្រឿងយ៉ាងលឿន ក្នុងទិសដៅពីត្បូងទៅជើង លុះដល់កន្លែងកើតហេតុ ស្រាប់តែអ្នកបើកបររថយន្តងោកមួយភាំង ដែលគេសង្ស័យថាស្រវឹងជោក ទើបធ្វើឱ្យរថយន្តរេចង្កូតបុកចូលក្នុងផ្ទះប្រជាពលរដ្ឋតែម្តង ។ ពេលនោះម្ចាស់ផ្ទះកំពុងតែដេកលង់លក់ ក៏នាំគ្នាស្ទុះរត់គេច ហើយរថយន្តបានជ្រុលទៅបុកត្រូវបុរសម្នាក់បណ្តាលឱ្យរងរបួសផងដែរ និងធ្វើឱ្យរងការខូចខាតផ្ទះ ព្រមទាំងសម្ភារ:ក្នុងផ្ទះរបស់ជនរងគ្រោះមួយចំនួនផងដែរ ។
បច្ចុប្បន្នជនរងគ្រោះត្រូវបានគេបញ្ជូនទៅព្យាបាលនៅក្នុងមន្ទីរពេទ្យ បង្អែកខេត្ត ។ ចំណែករថយន្ត និងអ្នកបើកបរត្រូវបាននគរបាលជំនាញចរាចរណ៍នៃអធិការដ្ឋាននគរបាលក្រុងប៉ៃលិន យកទៅរក្សាទុកនៅអធិការដ្ឋាននគរបាលក្រុង ដើម្បីរង់ចាំធ្វើការដោះស្រាយតាមនីតិវិធី ៕
ចែករំលែកព័តមាននេះ