ម៉ូតូនិងកង់ពន្លះគ្នា ម្ចាស់និងម្ចាស់សន្លប់ទាំង២នាក់
- ស្វាយរៀង
ខេត្តស្វាយរៀង ៖ ករណីគ្រោះថ្នាក់ចរាចរណ៍មួយកើតឡើងរវាងម៉ូតូបុកជាមួយកង់ក្នុងទិសដៅស្របគ្នាបណ្តាលអោយមនុស្ស២នាក់រងរបួសធ្ងន់ធ្ងរសន្លប់នៅនឹងកន្លែង ចំណែកម៉ូតូរងការខូចស្រាល រីឯកង់រងការខូចខាតយ៉ាងដំណំ។ គ្រោះថ្នាក់ចរាចរណ៍នេះកើតឡើងកាលពីវេលាម៉ោង៦និង១៥នាទីព្រឹកនៅចំណុចលើផ្លូវលេខ៣១៤ស្ថិតក្នុងភូមិពោធិវង្ស ឃុំប្រសូត្រ ស្រុកស្វាយទាប។ ជនរងគ្រោះដែលរងរបួសធ្ងន់ទាំងពីរនាក់ខាងលើរួមមាន ឈ្មោះពុំ…
ជនរងគ្រោះដែលរងរបួសធ្ងន់ទាំងពីរនាក់ខាងលើរួមមាន ឈ្មោះពុំ ហៀង ភេទប្រុស អាយុ១៥ឆ្នាំ ជាសិស្ស មានទីលំនៅភូមិព្រៃរនោង ឃុំញរ ស្រុកកំពង់រោទិ៍ ជាអ្នកបើកបរម៉ូតូមួយគ្រឿងម៉ាកហ្សូ៊មមើ ពណ៌ខ្មៅលាយក្រហម ពាក់ស្លាកលេខ ស្វាយរៀង ២L-៦២១៥ ។ ចំណែកភាគីជិះកង់ឈ្មោះ ខឿន ចិត្រា ភេទប្រុស អាយុ៨ឆ្នាំ ជាសិស្ស មានទីលំនៅភូមិពោធិវង្ស ឃុំប្រសូត្រ ស្រុកស្វាយទាប ។
ប្រភពពីប្រជាពលរដ្ឋបានឲ្យដឹងថា មុនពេលកើតហេតុ គេឃើញកុមាររងគ្រោះជិះកង់តាមផ្លូវពីជើងទៅត្បូង លុះមកដល់កន្លែងកើតហេតុក៏មានម៉ូតូមួយគ្រឿងបើកបរដោយក្មេងប្រុសម្នាក់ធ្វើដំណើរស្របទិសគ្នា ក្នុងល្បឿនយ៉ាងលឿន ស្រាប់តែរេចង្កូតទៅខាងស្តាំបុកកង់កុមារារងគ្រោញពីក្រោយពេញទំហឹងលាន់ដូចរន្ទះ អូសប្រមាណ៥ម៉ែត្រដួលបោកទៅលើថ្នល់ បណ្តាលឲ្យភាគីទាំងសងខាងរងរបួសធ្ងន់ធ្ងរសន្លប់នៅនឹងកន្លែងតែម្តង ។
បន្ទាប់មកក្រុមគ្រួសារជនរងគ្រោះបានបញ្ជូនជនរងគ្រោះទាំងពីនាក់ទៅមន្ទីរពេទ្យបង្អែកស្រុកប្រតិបត្តិស្វាយទាបដើម្បីសង្គ្រោះ។
ចំពោះម៉ូតូ និងកង់ត្រូវបានយកទៅរក្សាទុកនៅប៉ុស្ដិ៍នគរបាលរដ្ឋបាលឃុំប្រសូត្រដើម្បីដោះស្រាយតាមនីតិវិធី៕
ចែករំលែកព័តមាននេះ