រាជធានីភ្នំពេញ ៖ តាមសេចក្ដីសម្រេចរបស់ប្រធានសហព័ន្ធកីឡាបាល់ទាត់កម្ពុជា និងយោងតាមស្មារតីអង្គប្រជុំរបស់គណៈកម្មាធិការប្រតិបត្តិសហព័ន្ធកីឡាបាល់ទាត់កម្ពុជា កាលពីថ្ងៃទី១០ កញ្ញា ឆ្នាំ២០១៨ ចុះហត្ថលេខាដោយលោកនាយឧត្តមសេនីយ៍ សៅ សុខាប្រធានសហព័ន្ធកីឡាបាល់ទាត់កម្ពុជា បានប្រកាសតែងតាំងមន្ត្រីចំនួន២រូបឱ្យចូលកាន់តំណែងថ្មីនៅក្នុងសហព័ន្ធដ៏មានសក្តានុពលមួយនេះ។
នៅក្នុងសេចក្ដីសម្រេចខាងលើ លោក កែវ សារ៉េត អាយុ៦២ឆ្នាំ ត្រូវបានប្រកាសតែងតាំងជាអគ្គលេខាធិការសហព័ន្ធកីឡាបាល់ទាត់កម្ពុជាថ្មី បន្ទាប់ពីលោក គល់ សុផាន់ណា អតីតអគ្គលេខាធិការសហព័ន្ធប្រកាសលាលែងពីតំណែងអស់រយៈពេលជិត២ឆ្នាំ ហើយលោក ម៉ៃ តុលា ឡើងជាអគ្គលេខាធិការសហព័ន្ធស្ដីទីជំនួសរហូតមកទល់ពេលនេះទម្រាំរកបានអ្នកថ្មី។
លោក កែវ សារ៉េត បានមានប្រសាសន៍ថា លោកបានចូលបម្រើការងារនៅក្នុងសហព័ន្ធកីឡាបាល់ទាត់កម្ពុជាជាច្រើនឆ្នាំមកហើយ ពោលគឺតាំងពីសហព័ន្ធកីឡាបាល់ទាត់កម្ពុជាទើបបង្កើតមកម្លេ៉ះ ។ នៅក្នុងឆ្នាំ១៩៩០ដល់ឆ្នាំ១៩៩៩ លោកជាអគ្គលេខាធិការរងនិងបានធ្វើជាអគ្គលេខាធិការអស់រយៈពេល៦ឆ្នាំគិតចាប់តាំងពីឆ្នាំ១៩៩៩រហូតមកទល់ឆ្នាំ២០០៥ ។ ពេលនេះលោកត្រូវបានសហព័ន្ធកីឡាបាល់ទាត់កម្ពុជា ប្រកាសតែងតាំងជាអគ្គលេខាធិការសាជាថ្មីម្ដងទៀតជំនួសតំណែងនាយកមជ្ឈមណ្ឌលនិងសាលាបាល់ទាត់ជាតិបាទីដែលលោកបានបម្រើការងារនៅទីនោះតាំងពីឆ្នាំ២០១៤។
លោក កែវ សារ៉េត បន្តថា សម្រាប់ការងារមួយនេះ វាពិតជាមិនសូវស្រួលប៉ុន្មាននោះទេ ។ ម្យ៉ាងរូបលោកក៏កាន់តែចាស់ទៅហើយដែរ ប៉ុន្តែលោកនៅតែស្រឡាញ់បាល់ទាត់ ចង់ឃើញវិស័យកីឡាមួយនេះរីកចម្រើន ។ លោកនឹងខិតខំប្រឹងប្រែងឱ្យអស់ពីសមត្ថភាពដើម្បីជួយដល់សហព័ន្ធកីឡាបាល់ទាត់កម្ពុជា ឱ្យកាន់តែទទួលបានជោគជ័យ។
ដោយឡែកនៅក្នុងសេចក្ដីសម្រេចនោះដែរ ក៏បានប្រកាសតែងតាំងលោក យាន ឈៀងដែលជាមន្ត្រីផ្នែកសម្របសម្រួលនៅក្នុងសហព័ន្ធកីឡាបាល់ទាត់កម្ពុជា ធ្វើជានាយកមជ្ឈមណ្ឌលនិងសាលាបាល់ទាត់ជាតិបាទី ជំនួសលោក កែវ សារ៉េត ផងដែរ ។
លោក យាន ឈៀងដែលមានវ័យ៦៩ឆ្នាំទៅហើយនោះបានមានប្រសាសន៍ថា លោកធ្លាប់បម្រើការងារជាអគ្គលេខាធិការសហព័ន្ធកីឡាបាល់ទាត់កម្ពុជា បានរយៈពេល១ឆ្នាំដែរគឺនៅក្នុងឆ្នាំ២០០៦។
គួររំលឹកផងដែរថា ចាប់តាំងពីសហព័ន្ធកីឡាបាល់ទាត់កម្ពុជាបង្កើតឡើងក្នុងអំឡុងឆ្នាំ២០០០មកដល់ពេលនេះមានអគ្គលេខាធិការសហព័ន្ធចំនួន៦រូបហើយគឺ១-លោក អ៊ុំ គឹមភិន (ស្លាប់) ២-លោក កែវ សារិន ៣-លោកកែវ សារ៉េត ៤-លោក យាន ឈៀង ៥-លោក អ៊ុកសិទ្ធិជាតិ ៦-លោក គល់ សុផាន់ណា ។ នៅឆ្នាំ២០១៨នេះ លោក កែវ សារ៉េត ត្រូវបានប្រកាសតែងតាំងជាអគ្គលេខាធិការសហព័ន្ធកីឡាបាល់ទាត់កម្ពុជាសាជាថ្មីម្ដងទៀត៕
ចែករំលែកព័តមាននេះ