ខេត្តកំពត ៖ បុរសជាអ្នករត់ម៉ូតូឌុបម្នាក់បានស្លាប់យ៉ាងរន្ធត់ ដោយសារជួបគ្រោះថ្នាក់ចរាចរណ៍រវាងរថយន្តបុកម៉ូតូពីក្រោយពេញទំហឹង នៅលើកំណេត់ផ្លូវជាតិលេខ៣១ ។ ហេតុការណ៍ដ៏រន្ធត់ខាងលើបានកើតឡើងនៅវេលាម៉ោង១៨និង៥០នាទីព្រលប់ ថ្ងៃទី១២ ខែកញ្ញា ឆ្នាំ២០១៨…
ខេត្តកំពត ៖ បុរសជាអ្នករត់ម៉ូតូឌុបម្នាក់បានស្លាប់យ៉ាងរន្ធត់ ដោយសារជួបគ្រោះថ្នាក់ចរាចរណ៍រវាងរថយន្តបុកម៉ូតូពីក្រោយពេញទំហឹង នៅលើកំណេត់ផ្លូវជាតិលេខ៣១ ។
ហេតុការណ៍ដ៏រន្ធត់ខាងលើបានកើតឡើងនៅវេលាម៉ោង១៨និង៥០នាទីព្រលប់ ថ្ងៃទី១២ ខែកញ្ញា ឆ្នាំ២០១៨ ត្រង់ចំណុចភូមិបឹងធំខាងលិច ឃុំអង្គសុរភី ស្រុកកំពង់ត្រាច ខេត្តកំពត ។
យោងតាមប្រភពព័ត៌មាននៅកន្លែងកើតហេតុបាននិយាយថា មុនពេលជួបរឿងអកុសល គេឃើញជនរងគ្រោះជិះម៉ូតូម្នាក់ឯង ក្នុងទិសដៅពីលិចទៅកើត លុះមកដល់កន្លែងកើតហេតុ ក៏មានរថយន្តម៉ាកកូរ៉េចំណុះ២តោនកន្លះដឹកកម្មកររោងចក្របោះពួយមកពីលិចស្របទិសគ្នា ហើយខណៈនោះរថយន្តក៏ជ្រុលទៅបុកមូតូពីក្រោយពេញទំហឹង បណ្តាលឱ្យជនរងគ្រោះអ្នកជិះម៉ូតូដួលខ្ទាតទៅបោកក្បាលនឹងថ្នល់កៅស៊ូស្លាប់ភ្លាមៗមួយរំពេច រួចរថយន្តក៏បើកគេចទៅមុខបាត់ស្រមោលឈឹងតែម្តង ។ ប្រភពបានបន្តទៀតថា បន្ទាប់ពីបង្កហេតុឱ្យមនុស្សស្លាប់ ទើបគេឃើញសមត្ថកិច្ចមកចុះពិនិត្យនិងវាស់វែងនៅកន្លែងកើតហេតុ ។
ជុំវិញករណីគ្រោះថ្នាក់ចរាចរណ៍ខាងលើសមត្ថកិច្ចមូលដ្ឋានបានឱ្យដឹងថា ជនរងគ្រោះដែលស្លាប់បាត់បង់ជីវិតមានឈ្មោះ ង៉ែត ឆន ភេទប្រុស អាយុ៥៣ឆ្នាំ ជាអ្នករត់ម៉ូតូឌុប រស់នៅភូមិកំពង់ត្រាចទី១ ឃុំកំពង់ត្រាចខាងកើត ស្រុកកំពង់ត្រាច ខេត្តកំពត ។
ដោយឡែករថយន្តបង្កហេតុពុំទាន់បានកំណត់មុខសញ្ញា ព្រោះខណៈនោះសមត្ថកិច្ចកំពុងតាមស្រាវជ្រាវរកតម្រុយ ដើម្បីឱ្យម្ចាស់រថយន្តចូលខ្លួនមកដោះស្រាយតាមច្បាប់ចរាចរណ៍ផ្លូវគោក ។ បច្ចុប្បន្នសពបុរសរងគ្រោះដោយសាររថយន្តបុកស្លាប់ ត្រូវបានក្រុមគ្រួសារមកដឹកបញ្ជូនទៅកាន់លំនៅឋាន ដើម្បីចាត់ចែងធ្វើបុណ្យតាមប្រពៃណី ៕
ចែករំលែកព័តមាននេះ