ខេត្តព្រៃវែង ៖ ក្រុមអាជីវករជាច្រើននាក់ដែលកំពុងលក់បន្លែត្រីសាច់នៅលើផ្លូវបេតុងខាងកើតផ្សារអ្នកលឿងបានត្អូញត្អែថា រាល់ថ្ងៃនេះពួកគាត់លំបាកខ្លាំងណាស់ ព្រោះប្រព័ន្ធលូដែលនៅព័ទ្ធជុំវិញផ្សារ និងខាងក្រោមតូបលក់ដូររបស់ពួកគាត់បានស្ទះណែនលែងហូរ និងចាល់ទឹកស្អុយហៀរចេញមកក្រៅធ្វើឲ្យប៉ះពាល់ដល់សុខភាពរបស់ពួកគាត់ខ្លាំងណាស់ ។ ដោយអាជីវករទី១បាននិយាយថា «…
ខេត្តព្រៃវែង ៖ ក្រុមអាជីវករជាច្រើននាក់ដែលកំពុងលក់បន្លែត្រីសាច់នៅលើផ្លូវបេតុងខាងកើតផ្សារអ្នកលឿងបានត្អូញត្អែថា រាល់ថ្ងៃនេះពួកគាត់លំបាកខ្លាំងណាស់ ព្រោះប្រព័ន្ធលូដែលនៅព័ទ្ធជុំវិញផ្សារ និងខាងក្រោមតូបលក់ដូររបស់ពួកគាត់បានស្ទះណែនលែងហូរ និងចាល់ទឹកស្អុយហៀរចេញមកក្រៅធ្វើឲ្យប៉ះពាល់ដល់សុខភាពរបស់ពួកគាត់ខ្លាំងណាស់ ។
ដោយអាជីវករទី១បាននិយាយថា « អូយពិបាកណាស់ ផ្តាស់សាយនិយាយលែងចង់ចេញហើយច្រមុះឡើងក្តៅ មូលហេតុលូហ្នឹងវាស្អុយពេកវាស្ទះ » និងអាជីវករម្នាក់ទៀត « ពិបាក ពេលណាមានភ្លៀងចឹងហៀរ ហើយឡើងស្អុយម៉ង ទឹកអណ្តែតពេញហ្នឹងសុទ្ធតែប្រេង សុទ្ធតែខ្លាញ់អណ្តែតមក ហើយឡើងខ្មៅស្អុយណាស់ » ។
ក្រុមអាជីវករទាំងនោះបានបញ្ជាក់ផងដែរថា បញ្ហាលូស្ទះហៀរកាកសំណល់ចេញមកក្រៅនេះ មិនត្រឹមតែបង្កផលប៉ះពាល់ដល់សុខភាពរបស់ពួកគាត់នោះទេ គឺថែមទាំងប៉ះពាល់ដល់ការលក់ដូររបស់ពួកគាត់ថែមទៀត ព្រោះក្លិនស្អុយពេកធ្វើឲ្យអ្នកទិញគេទៅហួសមកហួស មិនឈប់ទិញទំនិញពួកគាត់ទេ ហើយបញ្ហានេះបានកើតឡើងច្រើនខែមកហើយ តែគ្មានអ្នកណាជួយដោះស្រាយពួកគាត់ទេ ។
ក្រុមអាជីវករទាំងនោះបានសំណូមពរសុំឲ្យគណៈកម្មការផ្សារក៏ដូចជា អាជ្ញាធរផងដែរសុំជួយស្តាលូជុំវិញផ្សារអ្នកលឿងនេះផងកុំឲ្យប៉ះពាល់ដល់ក្រុមអាជីវករបែបនេះទៀត ។ អាជីវករម្នាក់ទៀតបាននិយាយ« ចាខ្ញុំសំណូមពរធ្វើស្តាលូហ្នឹងឲ្យស្អាត ទឹកហូរទៅឲ្យអស់ ដើម្បីឲ្យមានអតិថិជនគេមកជួយទិញដូរ និងឲ្យបានច្រើន » និងអាជីវករម្នាក់ផ្សេងទៀត« ខ្ញុំចង់សំណូមពរឲ្យគាត់ស្តាលូឲ្យស្អាតទៅ តាចឹងពិបាកណាស់ ស្អុយណាស់មេរោគ ហើយសុទ្ធតែសត្វល្អិតទូចៗហើរនៅដីហ្នឹង នៅកន្លែងភក់ជ្រាំហ្នឹង ឲ្យតែមេឃភ្លៀង គឺផុសសុទ្ធតែប្រេង សុទ្ធតែសាំងមក ហើយអណ្តែតមកឡើងខ្មៅ ហើយស្អុយក្លិនភាយឡើងមកទៀត» ។
ដោយឡែកខាងគណៈកម្មការផ្សារអ្នកលឿង បានបញ្ជាក់ឲ្យដឹងដែរថា បញ្ហាលូស្ទះនេះគណៈកម្មការផ្សារបានដឹង ហើយក៏មានគម្រោងចង់ស្តាឲ្យដែរ ប៉ុន្តែមានក្រុមអាជីវករមួយចំនួនបានជំទាស់មិនព្រមឲ្យស្តា ដោយហេតុផលមិនចង់ចេញថវិកាថ្លៃឈ្មួលកម្មករស្តាលូ ហេតុនេះហើយទើបត្រូវជាប់គាំងបែបនេះទៅ ។
ចំណែកខាងអាជ្ញាធរវិញលោក វ៉ា ធីម អភិបាលរងស្តីទីស្រុកពាមរក៌បានឲ្យដឹងថា បញ្ហាលូជុំវិញផ្សារនេះ កន្លងមកអាជ្ញាធរឃុំក៏ធ្លាប់មានការជួយស្តាខ្លះៗដែរ តែមិនបានគ្រប់កន្លែង ព្រោះថវិកាមានកំណត់ ម្យ៉ាងពេលនេះផ្សារគ្មានអ្នកគ្រប់គ្រងច្បាស់លាស់ ដូច្នេះហើយទើបការងារមួយចំនួនត្រូវបានរាំងស្ទះ តែទោះជាយ៉ាងណាក្នុងនាមអាជ្ញាធរមូលដ្ឋាន និងព្យាយាមរកដំណោះស្រាយជូនបងប្អូនអាជីវករឲ្យបានឆាប់បំផុត ៕
ចែករំលែកព័តមាននេះ