ខេត្តរតនគិរី ៖ លោកតំណាងរាស្ត្រមណ្ឌលរតនគិរីថា មន្ទីរបរិស្ថានឃាត់ខ្លួនស្ត្រីចំណាស់ម្នាក់មិនស្របច្បាប់។ លោក ប៊ូ ឡាំ តំណាងរាស្ត្រ មានប្រតិកម្មខ្លាំងៗទៅលើមន្ទីរបរិស្ថាន គ្រាដែលអាជ្ញាធរស្រុកលំផាត់បាននាំគ្នាមកសុំការអន្តរាគមន៍ពីតំណាងរាស្ត្រ បន្ទាប់ពីមន្ទីរបរិស្ថានបានឃាត់ខ្លួនស្ត្រីម្នាក់ ចោទប្រកាន់ថា រំលោភដីដែនជម្រកសត្វព្រៃធ្វើជាកម្មសិទ្ធិរបស់ខ្លួន។
នៅព្រឹកថ្ងៃទី១២ ខែកញ្ញា ឆ្នាំ២០១៨ អាជ្ញាធរស្រុកលំផាត់ ដែលមានលោក សំ លាប ក្រុមប្រឹក្សាស្រុកលំផាត់ ព្រមទាំងលោកមេឃុំសេដា លោកអនុប្រធានភូមិកែងសាន់ និងតំណាងប្រជាពលរដ្ឋក្នុងភូមិកែងសាន់ជាច្រើននាក់ទៀត បានយកលិខិតសុំអន្តរាគមន៍ដែលមានស្នាមមេដៃប្រជាពលរដ្ឋចំនួន៣៤៧នាក់ ជូនដល់លោក ប៊ូ ឡាំ តំណាងរាស្ត្រមណ្ឌលរតនគិរី នៅស្នាក់ការរដ្ឋសភាមណ្ឌលរតនគិរី ដែលមានទីតាំងស្ថិតក្នុងភូមិទេសអន្លង់ សង្កាត់បឹងកន្សែង ក្រុងបានលុង។
ដើម្បីសុំឲ្យលោក និងអាជ្ញាធរខេត្ត ជួយដោះស្រាយករណីមន្ត្រីបរិស្ថាន យកផ្លាកហាមឃាត់ ទៅបិតតាមស្រែ ចំការរបស់ពួកគាត់ថា ជាដីដែនជម្រកសត្វព្រៃ ដែលគ្រប់គ្រងដោយមន្ត្រីបរិស្ថាន និងសុំឲ្យជួយអន្តរាគមន៍ ក្នុងករណីមន្ទីរបរិស្ថានជូនលិខិតអញ្ជើញស្ត្រីឈ្មោះ សុខ ស៊ីណាត អាយុ៦៤ឆ្នាំ មានលំនៅភូមិកែងសាន់ ឃុំសេដា ស្រុកលំផាត់ ខេត្តរតនគិរី ឲ្យចូលខ្លួនមកមន្ទីរបរិស្ថាន ហើយឃាត់ខ្លួនតែម្ដង ដោយមិនចាំបាច់មានដីការពីតុលាការ ពាក់ព័ន្ធការចោទប្រកាន់ពីមន្ត្រីបរិស្ថានថា ស្ត្រីរូបនេះបានកាប់ទន្ទ្រានដីព្រៃដែនជម្រកសត្វព្រៃយកធ្វើជាកម្មសិទ្ធិរបស់ខ្លួន ៕
ចែករំលែកព័តមាននេះ