រាជធានីភ្នំពេញ ៖ ក្នុងកិច្ចប្រជុំគណៈបញ្ជាការឯកភាពរាជធានីភ្នំពេញ នៅរដ្ឋបាលរាជធានីភ្នំពេញ កាលពីរសៀលថ្ងៃទី១២កញ្ញានេះ លោកឃួង ស្រេង អភិបាលរាជធានីភ្នំពេញ បានណែនាំនិងជំរុញឲ្យអាជ្ញាធរគ្រប់ខណ្ឌ ត្រូវចាត់មន្ត្រីចុះត្រួតពិនិត្យរាល់ការសុំច្បាប់ និងសាងសង់រោងបុណ្យ ឬរោងការណា ដែលបិទផ្លូវទាំងស្រុង គឺមិនអនុញ្ញាតឡើយ និងត្រូវជម្រុញឲ្យពួកគាត់គោរពច្បាប់ និងការណែនាំពីរដ្ឋបាលរាជធានីភ្នំពេញ ចៀសវាងមានការថ្នាំងថ្នាក់ពីប្រជាពលរដ្ឋ ។
លោកឃួង ស្រេង បានលើកឡើងថា អាជ្ញាធរមូលដ្ឋានគ្រប់ខណ្ឌ សង្កាត់ និងកំលាំងមានសមត្ថកិច្ច ត្រូវចុះត្រួតពិនិត្យឲ្យបានជាប្រចាំ ចំពោះការសាងសង់រោងបុណ្យ រោងការ ធ្វើឲ្យមានការកកស្ទះចរាចរណ៍ ដែលប្រជាពលរដ្ឋថ្នាំងថ្នាក់ នាពេលកន្លងមកនោះ គួរម្ចាស់រោងបុណ្យ ឬរោងការ រកទីតាំងណា ដែលសមស្រប មិនប៉ះពាល់ផ្លូវសាធារណៈ ដូចជា ទីអារាម តាមភោជនីយដ្ឋាន ឬទីតាំងណាដែលសមរម្យ ។
លោកបន្តថា អាជ្ញាធរ និងស្ថាបន័ពាក់ពន្ធ័ត្រូវបង្កើនប្រសិទ្ធភាពការងារទ្វេដងថែមទៀត លើការងារបំរើសេវាសាធារណៈជូនប្រជាពលរដ្ឋ ឱ្យស័ក្តសមទៅនឹងទំនុកចិត្តរបស់ប្រជាពលរដ្ឋ ដែលបានបោះឆ្នោតឲ្យ។ លោកឃួង ស្រេង បានឱ្យដឹងទៀតថា មានការងារជាច្រើនទៀត កំពុងរង់ចាំយើងទៅធ្វើ ជាពិសេសការពង្រឹងសន្តិសុខ សណ្តាប់ធ្នាប់របៀបរៀបរយសាធារណៈក្នុងទីក្រុង ដោយផ្តោតទៅលើការអនុវត្តច្បាប់ចរាចរណ៍ បន្តឆែកឆេរអាវុធជាតិផ្ទុះ ការងារត្រួតពិនិត្យ កន្លែងសប្បាយភាព,ក្លិបកំសាន្ត, ក្លិបរាត្រីផ្សេងៗ ដើម្បីទប់ស្កាត់បទល្មើសគ្រឿងញៀន បើទោះបីយើងមិនអាចលប់បំបាត់នៅចំពោះមុខ តែក៏អាចឈានទៅកាត់បន្ថយបទល្មើសបាន១កំរិតធំដែរ។
ចំពោះការរៀបចំសណ្តាប់ធ្នាប់តាមដងវិថីសំខាន់ៗ ជាអាទិភាពទាំង១១ខ្សែ ដែលបានអនុវត្តរយៈពេល
១ឆ្នាំកន្លងមកនេះ រដ្ឋបាលរាជធានីភ្នំពេញ អាចវាយតំលៃបានថា ធ្វើបានល្អនិងកំពុងដើរលើផ្លូវ ត្រូវតាមសំណូមពររបស់ប្រជាពលរដ្ឋ ដូច្នេះ ត្រូវបន្តការងារទៅមុខទៀតឲ្យបានគ្រប់ផ្លូវ ។ លោកឃួង ស្រេង បានបញ្ជាក់ថា សម្រាប់បន្ទាប់នេះ រដ្ឋបាលរាជធានីភ្នំពេញកំពុងរៀបចំ សណ្តាប់ធ្នាប់ និងបរិស្ថាននៅចំណុចផ្លូវព្រះមុនីរ៉េត ជុំវិញផ្សារដើមគរ និងផ្សារនាគមាស ឲ្យមានសណ្តាប់ធ្នាប់ បរិស្ថានល្អ ជាពិសេសសម្រួលកាត់បន្ថយការកកស្ទះចរាចរណ៍ឱ្យបានល្អ ក្នុងរយៈពេល១០ថ្ងៃ ។
ចែករំលែកព័តមាននេះ