រាជធានីភ្នំពេញ ៖ បុរសជាអ្នករត់ម៉ូតូកង់បីឥណ្ឌាម្នាក់ ខណៈជិះម៉ូតូបត់ត្រឡប់ក្រោយខ្វះការប្រុងប្រយ័ត្នក៏ត្រូវរថយន្តសង្គ្រោះមួយគ្រឿងបើកជ្រុលទៅបុកចំពាក់កណ្តាលពេញទំហឹង បណ្តាលឲ្យបុរសជាអ្នកបើកម៉ូតូរងរបួសធ្ងន់ ។
ចំណែករថយន្តវិញបានបើករត់គេចខ្លួនបាត់ ហេតុការណ៍នេះដែរបានកើតឡើងនៅវេលាម៉ោង១០និង៣០នាទីយប់ថ្ងៃទី១២ ខែកញ្ញា ឆ្នាំ២០១៨ ទុលមុខ និងមន្ទីពេទ្យមិត្តភាពខ្មែរសូវៀតផ្លូវ២៧១ សង្កាត់ទំនប់ទឹក ខណ្ឌចំការមន ។
តាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេបានឃើញបុរសជាអ្នករត់ម៉ូតូកង់បីឥណ្ឌាម្នាក់បានបើកម៉ូតូកង់បីឥណ្ឌា ពណ៌ស របស់ខ្លួនមកឈប់ចតនៅលើផ្លូវ ២១៧ ទុលមុខ និងមន្ទីរពេទ្យមិត្តភាពខ្មែរសូវៀត ហៅពេទ្យរុស្សីក្នុងទិសដៅពីជើងទៅត្បូង បញ្ច្រាសទិសដៅចរាចរណ៍ ស្រាប់តែពេលនោះដែរអ្នកបើកម៉ូតូបានបើកម៉ូតូកង់បីឥណ្ឌារបស់ខ្លួនបត់ក្បាលត្រឡប់ក្រោយវិញឲ្យត្រូវទិសដៅចរាចរណ៍ ។
ខណៈពេលបត់ម៉ូតូបានពាក់កណ្ដាលផ្លូវក៏ស្រាប់តែមានរថយន្តសង្គ្រោះមួយគ្រឿងមិនដឹងថា ជារបស់មន្ទីពេទ្យ ឬគ្លិនិកឯកជនណានោះទេ បានបើកធ្វើដំណើរតាមផ្លូវ២១៧ ក្នុងទិសដៅពីត្បូងទៅជើងក្នុងល្បឿនលឿនបានជ្រុលទៅបុកនឹងម៉ូតូកង់បីឥណ្ឌាដែលកំពុងតែបត់ត្រឡប់ក្រោយពេញទំហឹង បណ្តាលឲ្យបុរសជាអ្នកបើកម៉ូតូធ្លាក់ពីលើម៉ូតូរងរបួសចុកឆ្អល់ដួលនៅកន្លែង ហើយភ្លាមៗនោះដែរអ្នកបើកបររថយន្តសង្គ្រោះ គឺមិនបានឈប់ដោះស្រាយនោះទេ គឺបានបន្ថែមល្បឿនបើករត់គេចខ្លួនបាត់ស្រមោលតែម្តង ។
ក្រោយពេលកើតហេតុឃើញមានសមត្ថកិច្ចមូលដ្ឋានបានចុះទៅកន្លែងកើតហេតុរួចហើយបានទំនាក់ទំនងហៅសាច់ញាតិជនរងគ្រោះឲ្យមកយកជនរងគ្រោះដឹកតាមម៉ូតូកង់បីយកទៅព្យាបាលរបួសនៅមន្ទីពេទ្យ ចំណែកម៉ូតូរងការខូចខាតដែលរងការខូចខាតយ៉ាងដំណំត្រូវបានសាច់ញាតិជិះយកទៅតាមក្រោយ ដើម្បីធ្វើការជួសជុលដោយខ្លួនឯង ៕
ចែករំលែកព័តមាននេះ