ខេត្តបាត់ដំបង ៖ សកម្មភាពចោរកាច់សោ.កលួចយកម៉ូតូនៅតាមផ្សារ ឬនៅតាមទីសាធារណៈនានា និងសកម្មភាពក្រុមចោរឆក់ ហាក់កំពុងបង្កភាពភ័យខ្លាចយ៉ាងខ្លាំង ដល់ប្រជាពលរដ្ឋនិងភ្ញៀវទេសចរបរទេសនៅក្នុងក្រុងបាត់ដំបង បើទោះជាមុខសញ្ញាជនសង្ស័យមួយចំនួន ត្រូវបានបង្ក្រាបខ្លះៗហើយក្ដី ខណៈមន្ត្រីជំនាញនៅតាមស្ថាប័នមួយចំនួន…
ខេត្តបាត់ដំបង ៖ សកម្មភាពចោរកាច់សោ.កលួចយកម៉ូតូនៅតាមផ្សារ ឬនៅតាមទីសាធារណៈនានា និងសកម្មភាពក្រុមចោរឆក់ ហាក់កំពុងបង្កភាពភ័យខ្លាចយ៉ាងខ្លាំង ដល់ប្រជាពលរដ្ឋនិងភ្ញៀវទេសចរបរទេសនៅក្នុងក្រុងបាត់ដំបង បើទោះជាមុខសញ្ញាជនសង្ស័យមួយចំនួន ត្រូវបានបង្ក្រាបខ្លះៗហើយក្ដី ខណៈមន្ត្រីជំនាញនៅតាមស្ថាប័នមួយចំនួន ហាក់កំពុងសប្បាយរីកថ្លើមប្រម៉ាត់ ជាមួយនឹងមុខតំណែង ឬតួនាទីថ្មី ដែលត្រៀមប្រកាស នាពេលខាងមុខនេះ ។
ជាក់ស្ដែង កាលពីវេលាម៉ោង០៦ និង៤០នាទីយប់ថ្ងៃទី១២ កញ្ញា ស្ថិតនៅចំណុចផ្សារវត្តពោធិវង្ស ក្នុងភូមិចំការសំរោង២ សង្កាត់ចំការសំរោង ក្រុងបាត់ដំបង ។ ពួកចោរបានធ្វើសកម្មភាពកាច់សោ.ក លួចយកម៉ូតូប្រជាពលរដ្ឋមួយគ្រឿង ជិះគេចខ្លួនដោយសុវត្ថិភាព ខណៈម្ចាស់ទុកនៅក្បែរផ្សារហើយរកទិញម្ហូប
របាយការណ៍សមត្ថកិច្ចបានឱ្យដឹងថា ម៉ូតូដែលត្រូវចោរលួចនោះ ម៉ាកហុងដាឌ្រីមសេ១២៥ ពណ៌ខ្មៅ ស៊េរីឆ្នាំ២០១៧ ពាក់ស្លាកលេខបាត់ដំបង1Y-3830 ជារបស់ឈ្មោះផេង រុងរឿង ភេទស្រី អាយុ៣៨ឆ្នាំ នៅភូមិសូភី១ សង្កាត់រតនៈ ក្រុងបាត់ដំបង ។ មន្ត្រីជំនាញបានប្រាប់ថា សកម្មភាពចោរកាច់សោ.កលួចម៉ូតូនៅក្នុងក្រុងបាត់ដំបងបានចាប់ផ្ដើមកម្រើកឡើងវិញ បន្ទាប់ពីស្ងប់ស្ងាត់មួយរយៈកន្លងទៅនេះ ។
មន្ត្រីដដែលនិយាយទៀតថា ប៉ុន្មានខែចុងក្រោយនេះ ក្រុមចោរជំនាញកាច់សោលួចម៉ូតូ ហាក់បានចេញធ្វើសកម្មភាពខ្លាំង នៅតាមបណ្ដាស្រុកមួយចំនួនក្នុងខេត្តបាត់ដំបង ។ រហូតមកដល់ពេលនេះ កម្លាំងជំនាញតាមបណ្ដាស្រុក ដែលពាក់ព័ន្ធនឹងបទល្មើសទាំងនេះ មិនទាន់បានបង្ហាញរបាយការណ៍ស៊ើបអង្កេតរបស់ខ្លួនជាវិជ្ជមាននៅឡើយទេ នៅតែគ្មានតម្រុយពីមុខសញ្ញាជនដៃដល់ដដែល ។
ដោយឡែក បើនិយាយអំពីសកម្មភាពចោរឆក់យកទ្រព្យសម្បត្តិអ្នកដំណើរនៅក្នុងក្រុងបាត់ដំបង នាពេលនេះវិញ ក៏កំពុងបង្កក្ដីបារម្ភយ៉ាងខ្លាំងក្លាណាស់ដែរ ដល់ប្រជាពលរដ្ឋនិងភ្ញៀវទេរសរបរទេស ។ នៅក្នុងរបាយការណ៍ សមត្ថកិច្ចកន្លងមកនេះ ត្រូវបានកត់សម្គាល់ដែរថា ក្រុមចោរបានធ្វើសកម្មភាពឆក់យកកាបូបពីភ្ញៀវបរទេសច្រើនករណីហើយ ក្នុងរយៈពេលប៉ុន្មានខែចុងក្រោយនេះ ។ ក្រុមជនទុច្ចរិតបានធ្វើសកម្មភាពនេះ មិនថាពេលយប់ឬពេលថ្ងៃ ជាពិសេស នៅតាមដងផ្លូវដែលជាកន្លែងស្ងាត់ឱ្យតែសមត្ថកិច្ចភ្លេចខ្លួនមិនបានប្រុងប្រយ័ត្ន ។
មតិនានាបានលើកឡើងថា បើពិនិត្យលើភាពជាក់ស្ដែង ដែលក្រុមជនល្មើសបាននិងកំពុងធ្វើសកម្មភាពក្នុងពេលនេះ គឺស្របពេលដែលមន្ត្រីនៅក្នុងស្ថាប័នសមត្ថកិច្ចមួយចំនួន កំពុងសប្បាយរីកថ្លើមប្រម៉ាត់ជាមួយនឹងការឡើងស័ក្ដិ ឡើងតួនាទី ឬទទូលមុខតំណែងថ្មីយ៉ាងព្រោងព្រាត ដែលភ្លេចគិតពីភារកិច្ចរបស់ខ្លួន ក្នុងកិច្ចការពារសន្តិសុខ សណ្ដាប់ធ្លាប់ជូនប្រជាពលរដ្ឋនៅក្នុងមូលដ្ឋាន។
មន្ត្រីមួយរូបបាននិយាយអំពីភាពអវិជ្ជមានទាំងនេះថា ពេលនេះ ជាពេលវេលាដែលមន្ត្រីនៅក្នុងស្នងការខេត្តមួយចំនួន កំពុងភ្លេចភារកិច្ចរបស់ខ្លួន ។ ព្រោះពួកគេកំពុងជាប់រវល់វក់វីនឹងការស្វែងរកតំណែង ឬតួនាទីថ្មី រីឯមន្ត្រីមួយចំនួនទៀត កំពុងសប្បាយរីកថ្លើមជាមួយនឹងអំណាចបុណ្យស័ក្ដ តួនាទី ឬមុខតំណែង
ថ្មី ដែលត្រៀមប្រកាសនាពេលខាងមុខនេះ ។ មន្ត្រីដដែលនេះបានទម្លាយឲ្យដឹងថា គ្រាន់តែតំណែងស្នងការរងខេត្តបាត់ដំបង ដែលមានស្រាប់នឹងត្រៀមប្រកាសបន្ថែមទៀត នាពេលខាងមុខនេះប្រមាណយ៉ាងតិច៣០រូប ស្ទើរតែរកកៅអីអង្គុយគ្មាន តែបទល្មើសហាក់គ្មានការថមថយឡើយ ។
មន្ត្រីនៅក្នុងខេត្តខ្លះទៀត ក៏បានរិះគន់អំពីការកើនឡើង នៃតំណែងស្នងការរងខេត្តនេះយ៉ាងដូច្នេះដែរថា
«ការតែងតាំងមុខតំណែងស្នងការរងខេត្តបន្ថែម រហូតដល់រាប់សិបនាក់ និងការស្វែងរកអំណាច តួនាទីថ្មី និងការស្វែងរកការដំឡើងបុណ្យស័ក្ដិរបស់មន្ត្រីមួយចំនួននៅពេលនេះ កំពុងក្លាយជាប្រធានបទយ៉ាងក្ដៅគគុក នៅតាមហាងកាហ្វេនានាក្នុងក្រុងបាត់ដំបង» ។
មន្ត្រីនានាបានរិះគន់ថា លោកស្នងការរងមួយចំនួន ហាក់គ្រាន់តែលំអអង្គភាព ព្រោះគ្មានការងារធ្វើទេ ។ រីឯមួយចំនួន គ្រាន់តែអង្គុយចាំមើលបំណាំ មន្ត្រីដែលកំពុងបំពេញការងារតែប៉ុណ្ណោះ ខណៈបទល្មើសស្ទើរគ្រប់ប្រភេទ បានកើតឡើងជាបន្តបន្ទាប់លោកស្នងការរងទាំងនោះ មិនជួយឈឺឆ្អាល ។ ពោលគឺ បទល្មើសនិងតំណែងលោកស្នងការរង ហាក់កំពុងហក់ឡើងទន្ទឹមគ្នា។
តាមរបាយការណ៍របស់សមត្ថកិច្ចកន្លងទៅនេះបានបង្ហាញថា បទល្មើសដែលកំពុងរីករាលដាលកាន់តែ
ខ្លាំងនៅក្នុងខេត្តបាត់ដំបងនាបច្ចុប្បន្ននេះ គឺជាអំពើរចោរកម្មដែលមានដូចជា «ចោរលួចម៉ូតូ ចោរឆក់ទ្រព្យសម្បត្តិអ្នកដំណើរ ចោរគាស់ទម្លុះទម្លាយលំនៅឋានប្រជាពលរដ្ឋ និងបទល្មើសគ្រឿងញៀន»។ សកម្មភាពទាំងនេះ បានកើតឡើងមិនថា នៅទីប្រជុំជន ឬនៅទីជនបទតាមបណ្ដាស្រុកនានានោះទេ គឺជនល្មើសហាក់បង្កើនសកម្មភាពស្ទើរគ្រប់កន្លែង បើទោះជាកម្លាំងសមត្ថកិច្ចធ្លាប់បង្ក្រាបបានជាបន្តបន្ទាប់ក្ដី។
ជាមួយវត្តមានលោកស្នងការរងខេត្ត ដែលចេះតែកើនឡើងស្អេកស្កះ ស្ទើររកកៅអីអង្គុយគ្មាននៅពេលនេះ ប្រជាពលរដ្ឋខេត្តបាត់ដំបង បានផ្ដល់ក្ដីសង្ឍឹមថា នឹងអាចធ្វើឲ្យជនទុច្ចរិតមានការខ្លបខ្លាច និងអាចធ្វើឲ្យបទល្មើសដ៏កក្រើកនាសព្វថ្ងៃនេះ មានការថយចុះ ថែមទាំងជួយកាត់បន្ថយភាពភ័យខ្លាចដល់ប្រជាពលរដ្ឋក៏ដូចជាភ្ញៀវទេសចរជាតិ និងអន្តរជាតិ ដែលចូលមកស្នាក់នៅក្នុងក្រុងបាត់ដំបងជាមិនខានឡើយ ។
ចែករំលែកព័តមាននេះ