កាលពីថ្ងៃអង្គារកន្លងទៅខ្សែការពារក្លិបអធិរាជស Real Madrid កីឡាករ Marcelo បានព្រមចុះហត្ថលេខាជាមួយអាជ្ញាធរពន្ធដាអេស្ប៉ាញដោយទទួលស្គាល់ពីទោសរបស់ខ្លួនចំពោះការបន្លំពន្ធអំឡុងឆ្នាំ២០១៣ និងព្រមទទួលការពិន័យជាប់ពន្ធនាគាររយៈពេល៤ខែ រួមទាំងបង់ប្រាក់ជាង៧៥ម៉ឺនអឺរ៉ូ ។
តាមប្រភពពីសារព័ត៌មានអេស្ប៉ាញឱ្យដឹងថា ភ្នាក់ងារពន្ធរបស់ប្រទេសនេះបានថ្កោលទោសកីឡាករវ័យ៣០ឆ្នាំខាងលើពីបទបន្លំពន្ធក្នុងចំនួនទឹកប្រាក់៤៩ម៉ឺនអឺរ៉ូ ដោយការប្រើប្រាស់ក្រុមហ៊ុនបរទេសមកគ្រប់គ្រងប្រាក់ចំណូលរបស់ខ្លួន ។
យ៉ាងណាមិញ Marcelo នឹងរួចផុចពីការឃុំខ្លួនក្រោមហេតុផលថា ទោសដែលកីឡាកររូបនេះរងពិន័យ គឺមានរយៈពេលតិចជាង២ឆ្នាំដែលច្បាប់ក្នុងប្រទេសអេស្ប៉ាញផ្តល់អាទិភាពឱ្យនៅក្រៅឃុំ ។
គួរបញ្ជាក់ថា Marcelo គឺជាកីឡករក្លិប Real Madrid ចុងក្រោយដែលត្រូវតុលាអេស្ប៉ាញចោទប្រកាន់ពីបទបន្លំពន្ធបន្ទាប់ពីកីឡាករ Casillas, Xabi Alonso, Ricardo Carvalho, Fabio Coentrao, Angel De Maria, Pepe និង Cristiano Ronaldo ជាដើមសុទ្ធតែត្រូវឈឺក្បាលរឿងបង់ពន្ធក្នុងប្រទេសអេស្ប៉ាញ ៕
ចែករំលែកព័តមាននេះ