រាជធានីភ្នំពេញ ៖ កម្លាំងសមត្ថកិច្ចនគរបាលជំនាញការិយាល័យព្រហ្មទណ្ឌកម្រិតស្រាលរាជធានីភ្នំពេញ កាលពីវេលាម៉ោង២រសៀលថ្ងៃទី១០ កញ្ញា បានធ្វើការស្រាវជ្រាវរហូតឈានដល់ការឃាត់ខ្លួនជនសង្ស័យម្នាក់ក្នុងបទល្មើសជាក់ស្តែង លើករណីចាប់ឃុំឃាំង និងបង្ខាំងក្មេងអាយុ១១ឆ្នាំដោយខុសច្បាប់ ។
សេចក្តីរាយការណ៍ឱ្យដឹងថា ជនសង្ស័យខាងលើ ឈ្មោះ ចាន់ ទិត្យសិទ្ធិ ហៅពេជ្រ ភេទប្រុស អាយុ៣១ឆ្នាំ ជាជាងជួសជុលអគ្គិសនី ស្នាក់នៅភូមិចំការដូង សង្កាត់ច្បារមន ក្រុងច្បារមន ខេត្តកំពង់ស្ពឺ ។ ដោយឡែកក្មេងជនរងគ្រោះឈ្មោះ ពិសី បូរ៉ា អាយុ១១ឆ្នាំ ជាកូនរបស់ឈ្មោះ ហៃ ពៅពិសី ភេទប្រុស អាយុ៣៤ឆ្នាំ ជាកម្មករសំណង់ ស្នាក់នៅផ្ទះជួលគ្មានលេខ ផ្លូវលំ ភូមិផ្សារតូច សង្កាត់ទួលសង្កែ១ ខណ្ឌប្ញស្សីកែវ រាជធានីភ្នំពេញ ។
ទាក់ទិនករណីចាប់បង្ខាំងក្មេងគំរាមថា នឹងសម្លាប់នេះ ត្រូវបានលោកវរសេនីយ៍ឯក ប៊ុន សន្យា ប្រធានការិយាល័យនគរបាលព្រហ្មទណ្ឌរាជធានីភ្នំពេញឲ្យដឹងថា ការពិតជនសង្ស័យមានប្រពន្ធ និងមានកូនហើយ ។តែពួកគេមានជម្លោះឈ្លោះទាស់ទែង និងបានលែងលះគ្នា ប្រពន្ធក៏បានយកកូនដើរចេញពីផ្ទះ ។
ពេលនោះ ជនសង្ស័យបានតាមរកជួបប្រពន្ធវិញ តែប្រពន្ធមិនឱ្យជួប ដូច្នេះ ជនសង្ស័យឈ្មោះ ចាន់ ទិត្យសិទ្ធិ ហៅពេជ្រ បានទៅចាប់ជនរងគ្រោះឈ្មោះ ពិសី បូរ៉ា ដែលជាក្មួយបង្កើតខាងប្រពន្ធ ធ្វើជាចំណាប់ខ្លាំង ដើម្បីគំរាមឱ្យប្រពន្ធចេញមុខចរចាគ្នា ។
លោក ប៊ុន សត្យា បន្តថា ជនសង្ស័យចាប់ជនរងគ្រោះលើកដាក់ម៉ូតូដឹកយកទៅផ្ទះសំណាក់មួយកន្លែង នៅជិតភ្នំបាសិត រួចហើយគេបានឱ្យជនរងគ្រោះដេកផ្កាប់មុខ និងយកកន្សែងពោះគោ ធ្វើជាចងស្លាបសេកទៅក្រោយ ហើយបានយកថ្នាំក្រហមលាប ធ្វើដូចជាស្លាកស្នាមបែកឈាម ក្នុងការធ្វើ ទារុណកម្មក្មេងប្រុសនោះ រួចឆាតចូលក្នុងទូរស័ព្ទដៃរបស់ក្រុមគ្រួសារខាងប្រពន្ធឲ្យដឹងថា បើប្រពន្ធមិនព្រមចេញជួបមុខគ្នាគេទេ នឹងសម្លាប់ក្មេងនោះចោល ។
រីឯចម្លើយជនសង្ស័យជាច្រើនទៀត ដែលសុទ្ធតែពាក្យពេជប្រើល្បិចកល ក្នុងគោលបំណងបោកបញ្ឆោតចង់តែជួបមុខប្រពន្ធ និងកូនតែប៉ុណ្ណោះ ។ ជាក់ស្តែង តាមការបំភ្លឺរបស់ជនរងគ្រោះ គឺគ្មានការធ្វើទារុណកម្មណាមួយទេ តែបានចាប់យកទៅមែន ។
ក្រោយពីកើតមានហេតុការណ៍យ៉ាងដូច្នេះ ភាគីខាងជនរងគ្រោះបានប្តឹង និងសហការជាមួយសមត្តកិច្ចតាមក្រសោបជនសង្ស័យ និងរំដោះក្មេងរងគ្រោះបានលទ្ធដោយជោគជ័យ ។ បន្ទាប់ពីឃាត់ខ្លួនជនសង្ស័យបានសារភាពចំពោះមុខសមត្ថកិច្ចថា រឿងហ្នឹងគេមិនមានចេតនាសម្លាប់ជនរងគ្រោះទេ គេគ្រាន់តែធ្វើសកម្មភាពនេះឡើង ដើម្បីគំរាមប្រពន្ធឱ្យជួបគេតែប៉ុណ្ណោះ ។
វត្ថុតាងចាប់យកដែលជាមធ្យោបាយធ្វើសកម្មភាពរួមមាន ម៉ូតូម៉ាកយ៉ាម៉ាហាExciter ពណ៌ ក្រហមខ្មៅ ពាក់ស្លាកលេខកំពង់ចាម១J.៥៥១២ មួយគ្រឿង ម៉ូតូម៉ាកPulsaz ពណ៌ខ្មៅ ពាក់ ស្លាកលេខភ្នំពេញ១FR.២៦៩១ មួយគ្រឿង និងទូរសព្ទ័ដៃម៉ាក Samsung ពណ៌ទឹកមាស មួយគ្រឿង ។ ជនសង្ស័យ និង វត្ថុតាង ត្រូវបានសមត្ថកិច្ចកសាងសំណុំរឿងបញ្ជូនទៅសាលាដំបូងរាជធានីភ្នំពេញ តាមនីតិវិធី ចំណែកកុមាររងគ្រោះបានប្រគល់ជូនទៅឪពុកម្តាយក្មេងនោះយកទៅគ្រប់គ្រងវិញ ៕
ចែករំលែកព័តមាននេះ