អ្នកមកដាក់ធ្មេញជាមនុស្សខិលខូច… បោកហាងធ្មេញ
- ប៉ៃលិន
ខេត្តប៉ៃលិន ៖ បន្ទាប់ពីគេហទំព័រកោះសន្តិភាពបានចុះផ្សាយ កាលពីថ្ងៃទី១១ កញ្ញា យោងតាមបណ្តឹងរបស់បុរសម្នាក់ថា ត្រូវពេទ្យធ្មេញមួយកន្លែងយីហោ « គីម ឆាយ»…
ខេត្តប៉ៃលិន ៖ បន្ទាប់ពីគេហទំព័រកោះសន្តិភាពបានចុះផ្សាយ កាលពីថ្ងៃទី១១ កញ្ញា យោងតាមបណ្តឹងរបស់បុរសម្នាក់ថា ត្រូវពេទ្យធ្មេញមួយកន្លែងយីហោ « គីម ឆាយ» ស្ថិតនៅក្បែរផ្លូវជាតិលេខ៥៧ ក្នុងភូមិប៉ាងរលឹម សង្កាត់អូរតាវ៉ៅ ក្រុងប៉ៃលិន ដកធ្មេញចាស់ចេញ រួចព្យាបាលធ្មេញខូច ដោយខួងធ្មេញរហូតដល់សាច់ខ្ចីបង្កទៅជាហើម ក្លាយទៅដំបៅខ្ទុះ ។ រហូតមកដល់វេលាម៉ោង០៨ និង២០នាទីយប់ថ្ងៃទី១២ កញ្ញា គ្រូពេទ្យធ្មេញ ឈ្មោះ គីម ឆាយ បានប្រតិកម្មខ្លាំងៗថា នេះជាការបំផ្លើសរបស់អ្នកជំងឺទាំងស្រុង ដើម្បីបង្ខូចកន្លែងរបស់ខ្លួនដោយចេតនា បន្ទាប់ពីមានទំនាស់បុគ្គល ។
លោកគ្រូពេទ្យធ្មេញឈ្មោះ គីម ឆាយ បានរៀបរាប់ឱ្យដឹងថា កាលពី៩ខែមុន មានបុរសម្នាក់ ឈ្មោះ លី ជុងចំណាន ជាម្ចាស់ផ្គត់ផ្គង់ទឹកស្អាត នៅក្នុងភូមិប៉ាងរលឹម សង្កាត់អូរតាវ៉ៅ ដោយនៅរសៀលថ្ងៃទី០៣ មករា ឆ្នាំ២០១៨ គាត់បានចូលទៅក្នុងបន្ទប់កន្លែងព្យាបាលធ្មេញរបស់លោក ហើយសុំឱ្យដោះធ្មេញដែលគាត់ធ្លាប់ដាក់ពីមុនចេញ ដើម្បីព្យាបាល រួចដាក់ធ្មេញថ្មី ។
ប៉ុន្តែបន្ទាប់ពីបានដោះធ្មេញចាស់ចោលចេញ និងព្យាបាលរួច ខណ:កំពុងតែកុម្មង់ទិញធ្មេញ និងធ្វើពុម្ពធ្មេញនៅបាត់ដំបង ដើម្បីយកមកដាក់ឱ្យគាត់ ដោយលោកអត់បានទទួលការកក់លុយកាក់ពីបុរសម្នាក់នោះទេ លុះរួចរាល់ស្រាប់តែគាត់មិនចូលមកដាក់ធ្មេញឡើយ ហើយដល់ថ្ងៃទី១៤ ខែមករា ឆ្នាំ២០១៨ ក៏មានបញ្ហាទំនាស់គ្នាតែម្តង ។
ប្រភពបន្តទៀតថា មូលហេតុដែលគាត់លើកឡើង តាមរយ:សារព័ត៌មាន គឺខុសទាំងស្រុង ពោលគឺខាងពេទ្យធ្មេញមិនបានដកធ្មេញណាមួយរបស់គាត់នោះទេ គឺគ្រាន់តែដោះធ្មេញ ចាស់ចេញ រួចធ្វើការព្យាបាលសំអាត ដើម្បីដាក់ធ្មេញថ្មីប៉ុណ្ណោះ ។
គ្រូពេទ្យបញ្ជាក់ថា បើសិនជាការដោះធ្មេញមានបញ្ហា មិនមែនហើមឈឺតាំងពីខែមករា រហូតមកដល់ខែកញ្ញានេះ នៅតែហើមឈឺនោះទេ ហើយបើបញ្ហាកើតឡើងចេញពីកន្លែងរបស់លោករយ:ពេល៩ខែ មិនអាចទ្រាំបាននោះដែរ ។ លោកអត់យល់ពីចិត្តអតិថិជនម្នាក់នេះទេ ដោយគាត់បង្ខូចថា ដកធ្មេញគាត់ខូចអស់ តាមពិតសូម្បីតែ១គ្រាប់ ក៏ពេទ្យអត់បានដកធ្មេញគាត់ដែរ គឺគ្រាន់តែដោះធ្មេញដែលគាត់ធ្លាប់ឱ្យគេដាក់ពីមុនមក ។
លើសពីនេះ កាលពីបុរសខាងចូលទៅដោះធ្មេញចាស់ចេញ ខាងលោកបានសួរនាំបញ្ជាក់ពីការដាក់ធ្មេញម្តងហើយម្តងទៀត ដោយទាក់ទងគាត់ជាច្រើនលើកច្រើនសារ គាត់ក៏យល់ព្រមថានឹង ដាក់ធ្មេញថ្មី លុះបន្ទាប់ពីធ្វើពុម្ពធ្មេញរួចហើយ ស្រាប់តែគាត់បោកប្រាស់ អត់ព្រមចូលទៅដាក់ធ្មេញ ធ្វើឱ្យលោកខាតបង់ថវិកា និងពេលវេលាថែមទៀតផង ទើបបង្កទៅជាមានទំនាស់រវាងគ្នានិងគ្នា ។
ក្រោយមក ក៏ស្រាប់តែបង្កើតទៅជារឿងប្រឌិតបង្ខូចកន្លែងពេទ្យព្យាបាលធ្មេញរបស់លោកតែម្តង លោកមិនសុខចិត្តទេ នឹងតតាំងជាមួយគាត់តាមផ្លូវច្បាប់បន្តទៀត ។
ចែករំលែកព័តមាននេះ