ខេត្តកំពង់ចាម ៖ មន្ត្រីរដ្ឋបាលខេត្តកំពង់ចាម បានឲ្យដឹងថា តាមរយៈក្រុមប្រឹក្សាខេត្ត និងការសំណូមពរពី ប្រជាពលរដ្ឋចំនួន២ភូមិ ក្នុងឃុំសូភាស ស្រុកស្ទឹងត្រង់ ដែលកំពុងប្រើប្រាស់អាគុយសម្រាប់បំភ្លឺជារៀងរាល់ថ្ងៃនោះ រសៀលថ្ងៃទី១២ ខែកញ្ញានេះ លោក គួច ចំរើន អភិបាល នៃគណៈអភិបាលខេត្តកំពង់ចាម និងសហការី បានចុះទៅជួបផ្ទាល់ជាមួយបងប្អូនប្រជាពលរដ្ឋទាំង២ភូមិ ដើម្បីពិនិត្យជាក់ស្ដែង និងដោះស្រាយនូវការលំបាក របស់ពួកគាត់។
មន្ត្រីដដែលបានបន្តថា ក្រោយពីបានស្តាប់នូវការលើកឡើងពីតំណាងប្រជាពលរដ្ឋទាំង២ភូមិ និងការលើកឡើងរបស់តំណាងម្ចាស់សេវាករអគ្គិសនីរួចមក លោក គួច ចំរើន បានជំរុញឲ្យប្រជាពលរដ្ឋ សហការជាមួយម្ចាស់អគ្គិសនីឲ្យដាក់ពាក្យសុំតភ្ជាប់ចរន្តអគ្គិសនី ដោយបានផ្ដល់នូវថវិកាចំនួន១លានរៀល ដើម្បីរៀបចំការងារតភ្ជាប់បណ្ដាញអគ្គិសនីចាប់ពីពេលនេះតទៅឲ្យបានលឿន និងឲ្យប្រជាពលរដ្ឋទាំង២ភូមិនោះ បានប្រពន្ធ័ភ្លើងអគ្គិសនីប្រើប្រាស់នៅក្នុងខែតុលានេះ។
ក្នុងឱកាសនោះ លោក គួច ចំរើន បានប្រគេនបច្ច័យចំនួន១១លានរៀលដល់ព្រះគ្រូចៅអធិការវត្តនៅទីនោះ ដើម្បីចូលរួមកសាងសមិទ្ធិផលក្នុងវត្តផងដែរ៕
ចែករំលែកព័តមាននេះ