រាជធានីភ្នំពេញ ៖ កាលល្ងាចថ្ងៃទី៧ ឧសភា សាលាដំបូងរាជធានីភ្នំពេញបានសម្រេចចេញដីកាឃុំខ្លួនស្ត្រីជនជាតិថៃ២នាក់ដាក់ពន្ធនាគារព្រៃសជាបណ្តោះអាសន្ន ពីបទជាប់ពាក់ព័ន្ធនឹងការជួញដូរគ្រឿងញៀនឆ្លងដែនជិត១គីឡូក្រាម ។
ស្ត្រីជនជាតិថៃទាំង២នាក់នេះម្នាក់ឈ្មោះ ថាន់យ៉ាណាត សាម៉ាអាផាត អាយុ៣១ឆ្នាំ មានទីលំនៅផ្ទះលេខ៨០ តំបន់និយមថៃ ស្រុកសាប៊ូត ខេត្តលុបបុរី ប្រទេសថៃ មុខរបរលក់នំ កាន់លិខិតឆ្លងដែនលេខ០៧៧៨០៨៣ និងម្នាក់ទៀតឈ្មោះ វង្សត្រាគូល សងដាវ អាយុ៣៩ឆ្នាំ មានទីលំនៅផ្ទះលេខ៥២៩ ផ្លូវសាក់គុនណាក់ខនណាតែ តំបន់ថាតឈើងឆុំ ស្រុកមឿងសាក់គុនណាក់ខន ខេត្តមឿងសាក់គុនណាក់ខន ប្រទេសថៃ មុខរបរលក់ថ្នាំពេទ្យ កាន់លិខិតឆ្លងដែនលេខ AA១២០០៦៧៣ ។
គួររំលឹកថា កាលពីថ្ងៃទី៤ ឧសភា នគរបាលមន្ទីរប្រឆាំងគ្រឿងញៀនក្រសួងមហាផ្ទៃ ដោយសហការជាមួយមន្ត្រីគយ និងរដ្ឋាករប្រចាំច្រកទ្វារអាកាសយានដ្ឋានអន្តរជាតិភ្នំពេញ បានឃាត់ខ្លួនស្ត្រីជនជាតិថៃម្នាក់ឈ្មោះ ថាន់យ៉ាណាត សាម៉ាអាផាត និងដកហូតបានថ្នាំញៀនប្រភេទកូកាអីុន ជិត១គីឡូក្រាម ដែលនាំមកកម្ពុជាតាមជើងយន្តហោះលេខ 3K 593 ពីសិង្ហបុរី ចូលមករាជធានីភ្នំពេញ ។
ក្រោយពីចាប់ខ្លួនស្ត្រីជនជាតិថៃម្នាក់នេះហើយ សមត្ថកិច្ចបានបន្តនីតិវិធីតាមចាប់បក្សពួកគេម្នាក់ទៀត ដែលស្នាក់នៅសណ្ឋាគារខ្មែរស៊ីធី បន្ទប់លេខ៣០៥ ផ្លូវលេខ១៥៤ សង្កាត់បឹងរាំង ខណ្ឌដូនពេញ ។ ស្ត្រីរូបនេះបានត្រូវសមត្ថកិច្ចអះអាងថា គេមកកម្ពុជារង់ចាំទទួលយកគ្រឿងញៀននោះទៅកាន់ប្រទេសថៃ ។
ពាក់ព័ន្ធនឹងគ្រឿងញៀនជិត១គីឡូក្រាមនេះ ទើបនគរបាលមន្ទីរប្រឆាំងគ្រឿងញៀន កសាងសំណុំរឿងបញ្ជូនពួកគេទៅសាលាដំបូងរាជធានីភ្នំពេញចាត់ការបន្ត ។ ប៉ុន្តែដោយសារជាវេលាព្រលប់ទៅហើយ ទើបចៅក្រមស៊ើបសួរសម្រេចឃុំខ្លួនស្ត្រីជនជាតិថៃទាំង២នាក់នេះដាក់ពន្ធនាគារព្រៃសជាបណ្តោះអាសន្នសិន រង់ចាំបើកសវនាការលើអង្គសេចក្តី ៕
ចែករំលែកព័តមាននេះ