ខេត្តព្រៃវែង ៖ ប្រជាពលរដ្ឋជាច្រើនគ្រួសារនៅក្នុងភូមិឧត្តម ឃុំព្រែកខ្សាយ(ក) ត្រូវបានអាជ្ញាធរឃុំកោះអញ្ជើញអោយចូលរួមប្រជុំរកដំណោះស្រាយកាលពីល្ងាចថ្ងៃទី១១ កញ្ញា ដោយសារមានអ្នកជំទាស់មិនអោយអាជ្ញាធរធ្វើប្រព័ន្ធលូអមសងខាងផ្លូវបេតុងដែលកំពុងដំណើរការធ្វើថ្មី ។
លោក ឯម ណេ មេឃុំព្រែកខ្សាយ(ក)បានអោយដឹងថា ផ្លូវ១ខ្សែនេះពីមុនជាផ្លូវដីមានដុំថ្មរដិបរដុប និងមានជង្ហុកជាច្រើនកន្លែងដែលធ្វើអោយប្រជាពលរដ្ឋមានការលំបាកពេលធ្វើដំណើរឆ្លងកាត់ម្តងៗ ។
លោកមេឃុំបានបន្តទៀតថា ដោយមានការស្នើសុំពីប្រជាពលរដ្ឋ និងដើម្បីបង្កលក្ខណៈងាយស្រួលដល់ប្រជាពលរដ្ឋផងនោះទើបអាជ្ញាធរឃុំបានលើកគម្រោងធ្វើផ្លូវនេះឡើងដោយធ្វើជាផ្លូវបេតុងកម្រាស់១តឹកកន្លះ ទទឹង៥ម៉ែត្រ និងបណ្តោយ២១៧ម៉ែត្រ និងមានដាក់លូអក្សរអ៊ុយទំហំ៧តឹកនៅអមសងខាងផ្លូវផងដែរ ។
លោកមេឃុំបានបញ្ជាក់ថា មុនពេលធ្វើអាជ្ញាធរបានប្រជុំផ្សព្វផ្សាយរួចហើយ ហើយប្រជាពលរដ្ឋក៏បានឯកភាពផងដែរ ប៉ុន្តែនៅពេលចាប់ផ្តើមចាក់ផ្លូវបេតុងស្រាប់តែមានប្រជាពលរដ្ឋ១គ្រួសារដែលមានរោងឈើនៅជាប់ផ្លូវកែងដើមទីបានជំទាស់មិនអោយធ្វើលូដោយអះអាងថា បើធ្វើលូគឺចូលដីរបស់គាត់ ដូច្នេះគាត់មិនព្រមនោះទេ ។
ដើម្បីដោះស្រាយកុំអោយមានបញ្ហាទើបអាជ្ញាធរកោះហៅប្រជាពលរដ្ឋទាំងអស់រួមទាំងអ្នកជំទាស់ផងដែរអោយចូលរួមប្រជុំរកដំណោះស្រាយ ហើយជាលទ្ធផលខាងអាជ្ញាធរបានសម្រេចទុកពេលអោយអ្នកជំទាស់ចំនួន១០ថ្ងៃដើម្បីរកឯកសារប្លង់ដីរបស់ខ្លួនមកបង្ហាញ បើសិនទីតាំងគ្រោងដាក់លូនោះប៉ះចំលើដីរបស់គាត់នោះអាជ្ញាធរនឹងមិនដាក់លូនោះទេ ប៉ុន្តែក្នុងករណីបើពុំមានឯកសារប្លង់ដី ឬប្លង់នោះមិនដល់កន្លែងដែលគ្រោងដាក់លូទេ អាជ្ញាធរនឹងសម្រេចធ្វើការរៀបចំដាក់លូតែម្តង ៕
ចែករំលែកព័តមាននេះ