ខេត្តបន្ទាយមានជ័យ ៖ ក្នុងហេតុការណ៍គ្រោះថ្នាក់ចរាចរណ៍រវាងម៉ូតូបុកជាមួយគោយន្តកន្ត្រៃឈប់ចតនៅលើ បណ្តាលឱ្យបុរសពីរនាក់រងរបួសធ្ងន់ បានកើតឡើងកាលពីវេលាម៉ោង៧និង៣០នាទីយប់ថ្ងៃទី១១ ខែ កញ្ញា ឆ្នាំ២០១៨ ស្ថិតនៅលើកំណាត់ផ្លូវជាតិលេខ៥៦A ត្រង់ចំណុចខាងជើងភូមិទ្រាសប្រហែល២០០ម៉ែត្រ ស្ថិតក្នុងឃុំទ្រាស ស្រុកស្វាយចេក ខេត្តបន្ទាយមានជ័យ។
ប្រភពព័ត៌មានពីនគរបាលចរាចរណ៍ស្រុកស្វាយចេក បានឲ្យដឹងថា ៖ ម៉ូតូម៉ាកហុងដាឌ្រីម ស៊េរី២០១៣ ពណ៌ខ្មៅ ពាក់ស្លាកលេខ ប.មានជ័យ ១H-៦៩៤២ អ្នកបើកបរឈ្មោះ សោម ចន្ទ្រា ភេទប្រុសអាយុ២៨ឆ្នាំ រស់នៅភូមិក្បាលស្ពាន សង្កាត់ម្កាក់ក្រុងសិរីសោភ័ណ ខេត្តបន្ទាយមានជ័យ បានរងរបួសធ្ងន់។ រីឯម្ចាស់គោយន្តកន្ត្រៃឈ្មោះ យុន យី ភេទប្រុស អាយុ២១ឆ្នាំ មានទីលំនៅភូមិតាវ៉ឹក ឃុំទ្រាស ស្រុកស្វាយចេក ខេត្តបន្ទាយមានជ័យ និងមានអ្នករួមដំណើរម្នាក់ ឈ្មោះ បៅ ភេទប្រុស ជាកម្មករ មកស្នាក់នៅបណ្ដោះអាសន្ននៅភូមិតាវ៉ឹក ឃុំទ្រាស ស្រុកស្វាយចេក ខេត្តបន្ទាយមានជ័យ។
ប្រភពដដែលបានបញ្ជាក់ថា មុនពេលកើតហេតុ គោយន្តកន្ត្រៃបានធ្វើដំណើរពីទិសខាងជើងទៅត្បូង ដល់ចំណុចកើតហេតុ គោយន្តបានខូចហើយឈប់ចតដើម្បីជួសជុល ស្របពេលនោះក៏មានអ្នកបើកម៉ូតូ បើកក្នុងទិសដៅស្របគ្នាក៏បានបុកគោយន្ត ហើយនិងឈ្មោះ បៅ ភេទប្រុស ជាកម្មករ ដែលកំពុងជួសជុលគោយន្តកន្ត្រៃនោះ បណ្តាលឲ្យឈ្មោះបៅ រងរបួសធ្ងន់បាក់ក.ជើងខាងស្តាំ ចំណែកអ្នកបើកម៉ូតូបានរងរបួសធ្ងន់ បាក់ភ្លៅខាងឆ្វេង និងបាក់កជើងខាងស្តាំ ។ ជនរងគ្រោះទាំង២នាក់ត្រូវបានបញ្ជូនទៅព្យាបាលនៅមន្ទីរពេទ្យបង្អែកស្រុកស្វាយចេក។
ករណីខាងលើនេះគឺបណ្តាលមកពីគោយន្តកន្ត្រៃខូច ហើយឈប់ចតគ្មានភ្លើងបំភ្លឺឬដាក់សញ្ញាសម្គាល់ឲ្យបានត្រឹមត្រូវ។
ចំពោះវត្ថុតាងម៉ូតូនិងគោយន្តកន្ត្រៃ ត្រូវបានសមត្ថកិច្ចនាំយកមករក្សាទុកនៅអធិការដ្ឋាននគរបាលស្រុកស្វាយចេក ដើម្បីរង់ចាំធ្វើការដោះស្រាយគ្នានៅពេលក្រោយ ៕
ចែករំលែកព័តមាននេះ