រាជធានីភ្នំពេញ ៖ សំដៅចូលរួមក្នុងគោលការណ៍បង្កើនភ្ញៀវទេសចរអន្តរជាតិចូលមកកម្ពុជាកាន់តែច្រើនថែមទៀត ក្រសួងទេសចរណ៍ បានសហការជាមួយក្រសួងធម្មការ និងសាសនា រួមទាំងក្រសួងវប្បធម៌ និងវិចិត្រសិល្បៈ គ្រោងជ្រើសរើសវត្តមួយចំនួនដែលមានសក្ដានុពលច្រើនសម្រាប់ទាក់ទាញភ្ញៀវទេសចរអន្តរជាតិ។ នេះបើតាមប្រធាននាយកដ្ឋានអភិវឌ្ឍន៍ទេសចរណ៍…
រាជធានីភ្នំពេញ ៖ សំដៅចូលរួមក្នុងគោលការណ៍បង្កើនភ្ញៀវទេសចរអន្តរជាតិចូលមកកម្ពុជាកាន់តែច្រើនថែមទៀត ក្រសួងទេសចរណ៍ បានសហការជាមួយក្រសួងធម្មការ និងសាសនា រួមទាំងក្រសួងវប្បធម៌ និងវិចិត្រសិល្បៈ គ្រោងជ្រើសរើសវត្តមួយចំនួនដែលមានសក្ដានុពលច្រើនសម្រាប់ទាក់ទាញភ្ញៀវទេសចរអន្តរជាតិ។ នេះបើតាមប្រធាននាយកដ្ឋានអភិវឌ្ឍន៍ទេសចរណ៍ នៃក្រសួងទេសចរណ៍ ។
លោក ជុក ជំនោរ ប្រធាននាយកដ្ឋានរូបនេះបានថ្លែងបញ្ជាក់ថា ចំពោះមុខ ក្រសួងនឹងរៀបចំអភិវឌ្ឍន៍ និងបង្កើតផលិតផលទេសចរណ៍ថ្មីៗជាច្រើនទៀត ហើយក្រសួងក៏មានគម្រោងជ្រើសរើសវត្តដែលយើងពិនិត្យឃើញថាមានសក្ដានុពលលើវិស័យទេសចរណ៍ សាសនា ដើម្បីរៀបចំជាផលិតផលថ្មី សម្រាប់ការទាក់ទាញភ្ញៀវទេសចរអន្តរជាតិ ។
លោកបញ្ជាក់ថា ៖«ចំពោះវត្តមួយចំនួនយើងបានរៀបចំរួចហើយ វត្តមួយចំនួនទៀតដែលយើងមើលឃើញមានសក្តានុពលខាងវិស័យទេសចរណ៍ដែរនោះ ប៉ុន្តែយើងមិនទាន់បានរៀបចំនៅឡើយ ។ ដូច្នេះក្រសួងទេសចរណ៍ នឹងសហការជាមួយក្រសួងជំនាញពាក់ព័ន្ធដទៃទៀត រៀបចំវត្តខាងលើនេះឲ្យទៅជាផលិតផលទេសចរណ៍ថ្មី ដើម្បីទាក់ទាញភ្ញៀវទេសចរអន្តរជាតិ »។
តាមលោកប្រធាននាយកដ្ឋាន វត្តដែលនឹងត្រូវជ្រើសរើស និងរៀបចំនោះ អាចជាវត្តដែលបានរៀបចំហេដ្ឋារចនាសម្ព័ន្ធ និងរចនាបថបានល្អ មានប្រវត្តិយូរលង់ ហើយព្រះចៅអធិការវត្តបានរៀបចំនូវពិធីបុណ្យនានាតាមបែបព្រះពុទ្ធ សាសនា បានត្រឹមត្រូវគួរឲ្យទាក់ទាញ ហើយអាចឲ្យភ្ញៀវទេសចរមកឈ្វេងយល់អំពីប្រវត្តិវត្ត អំពីការគោរពប្រណិប័តន៍ព្រះពុទ្ធសាសនា វប្បធម៌ ប្រពៃណីរបស់ជនជាតិខ្មែរយើង ។
លោក ជុក ជំនោរ បានឲ្យដឹងដែរថា ៖« កន្លងមក យើងមានវត្តជាច្រើនដែលបានរៀបចំ និងបានទាក់ទាញភ្ញៀវទេសចរឲ្យទៅកាន់ទីនោះ ដូចជាវត្តដំណាក់វត្តបូរ នៅខេត្តសៀមរាប , វត្តដំរីស, វត្តកំផែង ក្នុងខេត្តបាត់ដំបងជាដើម។ ដូច្នេះយើងទទួលបាន បទពិសោធន៍នៃការរៀបចំ វត្តខាងលើនេះ ដើម្បីយកទៅរៀបចំវត្តដែលមានសក្ដានុពលដទៃទៀត »។
លោកក៏បានឲ្យដឹងដែរថា ភ្ញៀវអន្តរជាតិដែលចូលចិត្តទៅស្រាវជ្រាវ ទៅកម្សាន្តតាម វត្តអារាមនៅកម្ពុជា រួមមានភ្ញៀវមកពីប្រទេស ចិន កូរ៉េ ជប៉ុន រួមទាំងភ្ញៀវមកពីបណ្តាប្រទេស មួយចំនួនទៀត ។ ចំណែកសមាគមទេសចរណ៍ ភ្នាក់ងារទេសចរណ៍កន្លងមក ក៏បានយកចិត្តទុក ដាក់ក្នុងការរៀបចំដំណើរទស្សនកិច្ចជាកញ្ចប់ដោយបញ្ជូនការសិក្សាស្រាវជ្រាវ រួមទាំងទស្សន កិច្ចនៅវត្តអារាមផងដែរ ។
លោក ជុក ជំនោរ ក៏បានឲ្យដឹងបន្ថែមទៀតថា កម្ពុជាក៏ជាគោលដៅទេសចរណ៍ខាងសាស នាផងដែរ បន្ទាប់ពីគោលដៅទេសចរណ៍វប្បធម៌និងធម្មជាតិ ព្រោះកម្ពុជា ជាប្រទេសដែល បើកទូលាយខាងការគោរពសាសនា ដោយមិនរើសអើងនោះឡើយ ។
ដូច្នេះលោករំពឹងថា តាមរយៈនៃការរៀបចំវត្តអារាមតាមគោលការណ៍ខាងលើនេះ យើងនឹងទទួលបានភ្ញៀវទេសចរកាន់តែច្រើនថែមទៀត សំខាន់វត្តដែលជាគោលដៅទេសចរណ៍ខាងវិស័យសាសនា ប្រាកដជាទាក់ទាញបានច្រើនមិនខាន ។
លោកថ្លែងបញ្ជាក់ថា តាមចក្ខុវិស័យរបស់រាជរដ្ឋាភិបាលក្នុងឆ្នាំ២០១៧នេះ យើងទាក់ ទាញភ្ញៀវទេសចរអន្តរជាតិឲ្យបានក្នុងរង្វង់៧លាននាក់, ហើយឆ្នាំ២០២០ក្នុងរង្វង់៧លានទៅ៧លានកន្លះ, ដូច្នេះការបង្កើតផលិតផលទេសចរណ៍ថ្មីៗបន្ថែមទៀតនោះ ជាកត្តាសំខាន់មិនអាចខ្វះបាន ។
ផ្តើមពីការរៀបចំវត្តអារាមដែលមានសក្ដានុពលខាងវិស័យទេសចរណ៍ ក៏ជាការបង្កើតផលិតផលទេសចរណ៍ថ្មីខាងវិស័យសាសនា នឹងរួមចំណែកក្នុងការបង្កើនចំនួនភ្ញៀវទេសចរអន្តរជាតិតាមផែនការកំណត់របស់រាជរដ្ឋាភិបាល ៕
ចែករំលែកព័តមាននេះ