រាជធានីភ្នំពេញ ៖ ក្រសួងអប់រំ យុវជន និងកីឡា នឹងបើកសន្លឹកកិច្ចការមុខវិជ្ជាគណិតវិទ្យារបស់បេក្ខជនមួយចំនួន ដែលតវ៉ាមិនសុខចិត្តចំពោះពិន្ទុដែលប្រកាស ដោយក្រសួងកន្លងមកនេះ ។ នេះបើតាមការសម្រេចរបស់…
រាជធានីភ្នំពេញ ៖ ក្រសួងអប់រំ យុវជន និងកីឡា នឹងបើកសន្លឹកកិច្ចការមុខវិជ្ជាគណិតវិទ្យារបស់បេក្ខជនមួយចំនួន ដែលតវ៉ាមិនសុខចិត្តចំពោះពិន្ទុដែលប្រកាស ដោយក្រសួងកន្លងមកនេះ ។ នេះបើតាមការសម្រេចរបស់ លោករដ្ឋមន្ត្រីក្រសួងអប់រំ យុវជន និងកីឡា ។
លោក ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា បានឲ្យកោះសន្តិភាពដឹងតាមប្រព័ន្ធតេឡេក្រាម កាលពីល្ងាចថ្ងៃទី១០ ខែកញ្ញាថា «ក្រសួងនឹងពិនិត្យសន្លឹកកិច្ចការសិស្សដោយធ្វើកោសល្យវិច័យលើសន្លឹកកិច្ចការគណិតវិទ្យា របស់បេក្ខជនដែលតវ៉ាមួយចំនួន» ។ ការលើកឡើងរបស់លោករដ្ឋមន្ត្រីនេះ បន្ទាប់ពីមានបេក្ខជនដែលជាសិស្សនិងគ្រូមួយចំនួន ស្នើឲ្យក្រសួងពិនិត្យសន្លឹកកិច្ចការគណិតវិទ្យា ដោយសារពួកគេមិនទទួលយកពិន្ទុដែលក្រសួងប្រកាសនោះទេ ។ លទ្ធផលរបស់ពួកគេបានធ្លាក់មុខវិជ្ជាគណិតវិទ្យា ដែលជាការនឹកស្មានមិនដល់ និងមិនអាចទទួលយកបាន ។
បេក្ខជនមួយក្រុម កាលពីរសៀលថ្ងៃទី១០ខែកញ្ញា បានប្រមូលផ្តុំគ្នានៅមុខក្រសួងអប់រំយុវជន និងកីឡា ដើម្បីស្នើសុំឲ្យក្រសួងបើកសន្លឹកកិច្ចការរបស់ខ្លួនធ្វើការផ្ទៀងផ្ទាត់ពិន្ទុឡើងវិញ ។ ក្រៅពីបេក្ខជនតវ៉ា នៅលើបណ្តាញសង្គមហ្វេសប៊ុកវិញ ទាំងលោកគ្រូអ្នកគ្រូដែលបង្ហាត់បង្រៀនមុខវិទ្យាគណិតវិទ្យា បាននាំគ្នាសរសេរដោយសម្តែងការកើតទុក្ខមិនសុខចិត្តចំពោះលទ្ធផលពិន្ទុមុខវិជ្ជាគណិតវិទ្យាផងដែរ ។ ទាំងគ្រូនិងបេក្ខជន បានស្នើឱ្យក្រសួងពិនិត្យសន្លឹកកិច្ចការមុខវិជ្ជាគណិតវិទ្យាឡើងវិញ ។
ទោះបីជាលោករដ្ឋមន្ត្រីប្រកាសថា នឹងបើកសន្លឹកកិច្ចការរបស់បេក្ខជនតវ៉ាមួយចំនួន យ៉ាងណាក្តី តែលោកមិនបានបញ្ជាក់់ឲ្យដឹងពីកាលបរិច្ឆេទនៃការបើកសន្លឹកកិច្ចការនៅពេលណានោះទេ។ មជ្ឈដ្ឋានមួយចំនួនកំពុងចាប់អារម្មណ៍ពីការតវ៉ារបស់បេក្ខជន ដែលមិនធ្លាប់មានកន្លងមកនេះ ដោយសារក្នុងចំណោមបេក្ខជនដែលមិនសុខចិត្តចំពោះលទ្ធផលនិទ្ទេសដែលគេបានទទួលនោះ គឺសិស្សពូកែទទួលបានមេដាយមាសផ្នែកគណិតវិទ្យា បែរជាទទួលនិទ្ទេស F (ធ្លាក់) លើមុខវិជ្ជាគណិតវិទ្យាទៅវិញ ហើយបេក្ខជនផ្សេងៗទៀតដែលច្បាស់ថាពួកគេបានធ្វើវិញ្ញាសាគណិតវិទ្យាត្រូវច្រើន បែរជាទទួលបាននិទ្ទេស F ដូចៗគ្នា និងធ្វើឱ្យមានអារម្មណ៍ថាអាចជាការភ័ន្តច្រឡំក្នុងបូកស្រង់ពិន្ទុ ។
ជាមួយគ្នានេះ បេក្ខជនដែលបន្តតវ៉ាក៏បានទាមទារឲ្យក្រសួងអប់រំ សើរើពិនិត្យកិច្ចការរបស់ខ្លួនឡើងវិញ និងអ្នកខ្លះបានសុំឱ្យរៀបចំការប្រឡងលើកទី២ ដូចឆ្នាំ២០១៤ ។ព្រឹកថ្ងៃទី១១ ខែកញ្ញា បេក្ខជនប្រឡងសញ្ញាបត្របាក់ឌុបប្រមាណ៥០នាក់ បាននាំគ្នាទៅកាន់ក្រសួងអប់រំ ដោយបន្តប្រមូលផ្តុំគ្នាទទូចដល់លោករដ្ឋមន្ត្រី ហង់ ជូនណារ៉ុន មេត្តាសើរើវិញ្ញាសាគណិត រូបវិទ្យា និងភាសាខ្មែរ ដែលពួកគេជឿថាធ្វើត្រូវតែបែរជាធ្លាក់(និទ្ទេសF) ។បេក្ខជនម្នាក់ឈ្មោះ វ៉ា នីកា ភេទស្រី អាយុ១៨ឆ្នាំ មកពីវិទ្យាល័យច្បារអំពៅ បានសរសេរក្នុងលិខិតដាក់ជូនលោករដ្ឋមន្ត្រីថា «វិញ្ញាសាភាសាខ្មែរនិងគណិតវិទ្យា ខ្ញុំធ្វើបានស្ទើរគ្រប់ចំណុចទាំងអស់ ហើយអ្វីដែលសំខាន់ដូចលទ្ធផលដែលចេញមក មិនអាចវិញ្ញាសាភាសាខ្មែរនិងគណិតវិទ្យារបស់នាងខ្ញុំ ដូចអ្វីដែលក្រសួងអប់រំបោះពុម្ពផ្សាយឡើយ» ។
បេក្ខជនរូបនេះ បានស្នើសុំអនុញ្ញាតឱ្យមានការត្រួតពិនិត្យសាជាថ្មីឡើងវិញលើសន្លឹកកិច្ចការមុខវិជ្ជាភាសាខ្មែរនិងគណិតវិទ្យារបស់នាង ដែលអាចមានការភ័ន្តច្រឡំលើការដាក់ពិន្ទុ ឬក៏អាចជាកំហុសបច្ចេកទេសកុំព្យូទ័រដោយប្រការណាមួយជាក់ជាមិនខានឡើយ ។ បេក្ខជនឈ្មោះ សុខ ច័ន្ទយុទ្ធពល ភេទប្រុស មកពីខេត្តបាត់ដំបង និយាយថា រូបគេធ្វើវិញ្ញាសាគណិតវិទ្យាបានល្អបំផុត នៅពេលប្រឡងផ្ទៀងចម្លើយត្រូវស្ទើរ១០០% តែនៅពេលចេញលទ្ធផលបាននិទ្ទេសF(ធ្លាក់)ទៅវិញ។បេក្ខជនរូបនេះនិយាយថា «ខ្ញុំមកតវ៉ានេះ ដើម្បីសូមស្នើឲ្យក្រសួងអប់រំសើរើមុខវិជ្ជាគណិតវិទ្យានេះតែម្តង ។ ករណីនេះមិនមែនកើតឡើងចំពោះតែខ្ញុំម្នាក់ទេ វាបានកើតឡើងចំពោះសិស្សច្រើនដែរ ។ ករណីនេះប៉ះពាល់ដល់ទឹកចិត្តសិស្សដែលបានខិតខំប្រឹងប្រែងរៀនសូត្រ» ។
ចំណែកបេក្ខជនឈ្មោះ ឆាយ៉ា ភេទប្រុសមកពីវិទ្យាល័យ ហ៊ុន សែន ឈូក ខេត្តកំពតដែលធ្លាប់បានទទួលមេដាយមាសផ្នែកគណិតវិទ្យា បែរជាធ្លាក់មុខវិជ្ជាគណិតនេះទៅវិញ ហើយដោយការមិនសុខចិត្តក៏បានមកតវ៉ាឲ្យសើរើឡើងវិញលើសន្លឹកកិច្ចការប្រឡងរបស់គេដែរ ។ បេក្ខជនដែលជាសិស្សពូកែរូបនេះនិយាយថា «ខ្ញុំមកដល់ក្រសួងដើម្បីដាក់ពាក្យតវ៉ា ព្រោះមុខវិជ្ជាគណិតវិទ្យានេះខ្ញុំពូកែ បែរជាលទ្ធផលបាននិទ្ទេសF
(ធ្លាក់)ទៅវិញមិនសមទេ ។ គេថាមានសិស្សពូកែច្រើនផ្នែកគណិត តែបែរជាធ្លាក់មុខវិជ្ជានេះទៅវិញ និងសូមឲ្យក្រសួងធ្វើចំណាត់ការឲ្យបានលឿនតាមដែលអាចធ្វើទៅបាន ព្រោះការចូលរៀននៅមហាវិទ្យាល័យជិតមកដល់ហើយ» ។
គួរបញ្ជាក់ថា គិតត្រឹមវេលាម៉ោង៩និង៣០នាទីព្រឹកថ្ងៃដដែល ក្រសួងអប់រំនៅមិនទាន់កំណត់ថា ពេលណាឬថ្ងៃណាត្រូវបើកសន្លឹកកិច្ចការគណិតវិទ្យាដែលមានការតវ៉ានេះនៅឡើយទេ ។ ចំពោះការតវ៉ារបស់បេក្ខជនធ្លាក់មុខវិជ្ជារូបវិទ្យា និងភាសាខ្មែរនោះ ក៏ក្រសួងអប់រំនៅមិនទាន់ឆ្លើយតបនៅឡើយដែរ ។ ប៉ុន្តែតាមបេក្ខជនដែលមកតវ៉ាថា នឹងមានអ្នកមកតវ៉ានៅក្រសួងអប់រំជាបន្តបន្ទាប់ទៀត ដើម្បីឲ្យមានការពិនិត្យលើការស្រង់ពិន្ទុពីសន្លឹកកិច្ចការដែលពួកគេកើតទុក្ខមិនសុខចិត្ត ។យោងតាមសេចក្តីប្រកាសព័ត៌មានរបស់
ក្រសួងអប់រំយុវជន និងកីឡា នៅថ្ងៃទី៩ ខែកញ្ញា បានឲ្យដឹងថា បេក្ខជនប្រឡងជាប់សញ្ញាបត្រមធ្យមសិក្សាទុតិយភូមិ(បាក់ឌុប) សម័យប្រឡងថ្ងៃទី២០២១ ខែសីហា ឆ្នាំ២០១៨ នៅទូទាំងប្រទេសមានចំនួន៧៥.០៥៩នាក់ ត្រូវជា៦៦,២១% ក្នុងចំណោមបេក្ខជនមកប្រឡងជាង១១មុឺននាក់ ដែលកាលពីឆ្នាំ២០១៧ បេក្ខដែលជាប់មាន៦៣,៨៤% ។
បេក្ខជនជាប់និទ្ទេសA មានចំនួន២៩០នាក់ និទ្ទេសBចំនួន១.៥៣២នាក់ និទ្ទេសCចំនួន ៤.៦៣១នាក់ និទ្ទេសDចំនួន១៣.៩៩៩នាក់ និងនិទ្ទេស Eចំនួន៥៤.៦០៧នាក់ ។សម្រាប់រាជធានីភ្នំពេញមានតួលេខខ្ពស់ជាងគេ ដោយនិទ្ទេសAមានចំនួន១៣៥នាក់ និងជាបន្តបន្ទាប់ ខេត្តសៀមរាប២១នាក់ ខេត្តកណ្តាល១៦នាក់ ខេត្តបាត់ដំបង១៥នាក់ ខេត្តតាកែវ១៥នាក់ ខេត្តកំពង់ចាម១៣នាក់ ខេត្តកំពត១១នាក់ ខេត្តត្បូងឃ្មុំ៩នាក់ ខេត្តកំពង់ធំ៩នាក់ ខេត្តកំពង់ឆ្នាំង៩នាក់ ខេត្តបន្ទាយមានជ័យ៩នាក់ ខេត្តព្រៃវែង៨នាក់ ខេត្តក្រចេះ៦នាក់ ខេត្តពោធិ៍សាត់៤នាក់ ខេត្តស្វាយរៀង៣នាក់ ខេត្តកំពង់ស្ពឺ៣នាក់ ខេត្តព្រះសីហនុ៣នាក់ និងខេត្តរតនគិរី១នាក់ ។
ចំណែកខេត្តដែលពុំមានបេក្ខជនជាប់និទ្ទេសAមាន ខេត្តកោះកុង ខេត្តកែប ខេត្តមណ្ឌលគិរីខេត្តឧត្តរមានជ័យ ខេត្តព្រះវិហារ ខេត្តប៉ៃលិន និងខេត្តស្ទឹងត្រែង ។ជាមួយគ្នានេះ បេក្ខជនចំនួន១៧នាក់ត្រូវបានកំណត់ឲ្យធ្លាក់ដោយស្វ័យប្រវត្តិ ដោយសារប្រព្រឹត្តខុសឆ្គងផ្ទុយពីបទប្បញ្ញត្តិនិងកម្រិតវិន័យ ។ សូមបញ្ជាក់ថា ការប្រឡងបាក់ឌុបកាលពីថ្ងៃទី២១-២១ ខែសីហា ឆ្នាំ២០១៨ មានមណ្ឌលប្រឡងនៅគ្រប់រាជធានី-ខេត្តសរុបចំនួន១៩៦បន្ទប់ចំនួន៤.៦៥៥ និងបេក្ខជនចុះឈ្មោះក្នុងបញ្ជីសរុប១១៥.២៦៨នាក់ ក្នុងនោះ ៩០.១២០នាក់ជាបេក្ខជនចំណេះទូទៅ ១៧.០៣១នាក់ ជាបេក្ខជនស្វៃរិន ៤.៤២៥នាក់ជាបេក្ខជនបំពេញវិជ្ជានិង៣.៦៩២នាក់ ជាបេក្ខជនស្វៃរិនបំពេញវិជ្ជា ។ ចំណែកបេក្ខជនអវត្តមាន មានចំនួន១.៩០៣នាក់ ៕
ចែករំលែកព័តមាននេះ