ជិត៦ពាន់នាក់នឹងប្រែក្លាយទៅជាមនុស្សថ្មី
- ភ្នំពេញ
រាជធានីភ្នំពេញ ៖ លោកស្រី មុំ ចាន់ដានី ប្រធានមន្ទីរសង្គមកិច្ច អតីតយុវជន និងយុវនីតិសម្បទារាជធានីភ្នំពេញ និងជាប្រធានមជ្ឈមណ្ឌលឱកាសខ្ញុំបានបញ្ជាក់ថា គិតមកដល់ថ្ងៃទី១០…
រាជធានីភ្នំពេញ ៖ លោកស្រី មុំ ចាន់ដានី ប្រធានមន្ទីរសង្គមកិច្ច អតីតយុវជន និងយុវនីតិសម្បទារាជធានីភ្នំពេញ និងជាប្រធានមជ្ឈមណ្ឌលឱកាសខ្ញុំបានបញ្ជាក់ថា គិតមកដល់ថ្ងៃទី១០ ខែកញ្ញា ឆ្នាំ២០១៨ អ្នកប្រើប្រាស់គ្រឿងញៀនចំនួន៥៨៦៥នាក់ ក្នុងនោះស្រីចំនួន៣៦២នាក់ ត្រូវបានមជ្ឈមណ្ឌលឱកាសខ្ញុំបន្សាប និងអប់រំឲ្យក្លាយទៅជាមនុស្សល្អទើបបញ្ជូនឲ្យពួកគាត់ត្រឡប់ទៅផ្ទះវិញ ។
ការបញ្ជាក់របស់លោកស្រី មុំ ចាន់ដានី បែបនេះនៅក្នុងពិធីសម្ពោធដាក់ឱ្យប្រើប្រាស់ជាផ្លូវការអគារមណ្ឌលសុខភាពឱកាសខ្ញុំមួយខ្នងមាន១១បន្ទប់ ស្ថិតក្នុងអធិបតីភាពលោក នួន ផារ័ត្ន អភិបាលរងរាជធានីភ្នំពេញដែលជាអំណោយរបស់រដ្ឋបាលរាជធានីភ្នំពេញនៅក្នុងមជ្ឈមណ្ឌលឱកាសខ្ញុំក្នុងសង្កាត់ឃ្មួញ ខណ្ឌសែនសុខ រាជធានីភ្នំពេញ កាលពីថ្ងៃទី១១ ខែកញ្ញា ឆ្នាំ២០១៨ ។
លោកស្រី មុំ ចាន់ដានី បានឲ្យដឹងទៀតថា បច្ចុប្បន្ននៅក្នុងមជ្ឈមណ្ឌលឱកាសខ្ញុំមានអ្នកញៀនគ្រឿងញៀនកំពុងតែបន្សាប និងអប់រំកែប្រែមានចំនួន១៩៦៣នាក់ ស្រី១៣៣នាក់ ដោយគិតត្រឹមថ្ងៃ១០ ខែកញ្ញា ឆ្នាំ២០១៨ ។
លោកស្រីបញ្ជាក់ថា ដោយមានការយកចិត្តទុកដាក់គិតគូរខ្ពស់ដល់បងប្អូនដែលកំពុងរងគ្រោះដោយការប្រើប្រាស់គ្រឿងញៀន និងដោយពិនិត្យឃើញថា មណ្ឌលសុខភាពជាតម្រូវការចាំបាច់ដែលអាចធានាដល់ការព្យាបាលប្រកបដោយគុណភាពខ្ពស់ដល់ជនរងគ្រោះដែលកំពុងទទួលសេវាព្យាបាល និងស្ដារនីតិសម្បទាផងនោះ រដ្ឋបាលរាជធានីភ្នំពេញបានផ្ដល់ការសាងសង់អគារមណ្ឌលសុខភាពឱកាសខ្ញុំចំនួន១ខ្នង កម្ពស់១ជាន់ មាន១១បន្ទប់ កាលពីថ្ងៃ២១ ខែកុម្ភៈ ឆ្នាំ២០១៧ និងស្ថាបនារួចរាល់កាលពីថ្ងៃ២៥ ខែមករា ឆ្នាំ២០១៨ ដែលត្រូវបានសម្ពោធដាក់ឱ្យប្រើប្រាស់នៅពេលនេះ ។
លោក នួន ផារ័ត្ន អភិបាលរងរាជធានីភ្នំពេញបានលើកឡើងថា បងប្អូនដែលរងគ្រោះដោយគ្រឿងញៀនទាំងអស់ត្រូវខិតខំបន្ដប្រឹងប្រែងបន្សាបឱ្យបានដើម្បីឲ្យក្លាយទៅជាមនុស្សល្អ និងធ្វើការងារបម្រើផលប្រយោជន៍សង្គមជាតិ ។
លោកបញ្ជាក់ថា បញ្ហាគ្រឿងញៀនបានធ្វើឱ្យស្រទាប់យុវជនរបស់យើងមួយចំនួនបានលង់ខ្លូន អ្នកញៀនគ្រឿងញៀនប្រៀបបានទៅនឹងច្រែះស៊ីដែកបាតកប៉ាល់ទឹក បើយើងមិនរកវិធីការពារទេ ច្រែះនោះនឹងស៊ីដែកបណ្តាលឲ្យលិចកប៉ាល់តែម្តង ៕
ចែករំលែកព័តមាននេះ