ប្រទេសរុស្ស៊ី ៖ រុស្ស៊ីចាប់ផ្ដើមហើយនាថ្ងៃទី១១ កញ្ញា សមយុទ្ធយោធាដ៏ធំបំផុតពុំធ្លាប់មានក្នុងប្រវត្តិសាស្ត្ររបស់ខ្លួន ដែលមានឈ្មោះថា VOSTOK- 2018 ដោយមានការចូលរួមរបស់ទាហានប្រមាណជា៣០០.០០០នាក់ រថយន្តយោធាគ្រប់ប្រភេទ៣៦.០០០គ្រឿង យន្តហោះ១០០០គ្រឿងនិងនាវាចម្បាំង៨០គ្រឿង។សមយុទ្ធនោះក៏មានការចូលរួមរបស់កងទ័ពចិននិងម៉ុងហ្គាលីផងដែរ។
ចាប់តាំងពីថ្ងៃទី១១ទៅ១៧ កញ្ញា ក្នុងក្របខណ្ឌនៃសមយុទ្ធយោធា VOSTOK- 2018 នេះ រុស្ស៊ីនឹងដាក់ពង្រាយកងទ័ពយ៉ាងច្រើននៅតំបន់ស៊ីបេរីខាងកើតនិងនៅចុងបូព៌ារុស្ស៊ី។ ព្រឹត្តិការណ៍នោះនឹងទស្សនាដោយប្រធានាធិបតីរុស្ស៊ី លោកវ្ល៉ាឌីមៀរ ពូទីននៅខាងក្រៅវេទិកាសេដ្ឋកិច្ចក្រុងវ្ល៉ាឌីវ៉ូស្តុក។
សមយុទ្ធយោធាដ៏ធំបំផុតនេះធ្វើឡើងក្នុងកាលៈទេសៈដែលមានភាពតានតឹងបំផុតជាមួយពួកលោកខាងលិច ដោយសារវិបត្តិនៅអ៊ុយក្រែន ជម្លោះនៅស៊ីរី ព្រមទាំងខណៈដែលពួកលោកខាងលិចលើកពីការចោទប្រកាន់ជាច្រើនថា រុស្ស៊ីចូលជ្រៀតជ្រែកក្នុងនយោបាយពួកលោកខាងលិច។
កងទ័ពរុស្ស៊ីបានប្រៀបធៀបសមយុទ្ធនោះ ទៅនឹងសមយុទ្ធធំឈ្មោះZAPAD-81 ដែលកាលពីឆ្នាំ១៩៨១ធ្វើឡើងដោយមានការចូលរួម របស់កងយោធានៃប្លុកវ៉ាសូវី រវាងពី១០០.០០០ទៅ១៥០.០០០នាក់នៅអឺរ៉ុបខាងកើត ដែលនោះជាសមយុទ្ធយោធាធំបំផុតពុំធ្លាប់រៀបចំធ្វើក្នុងសម័យកាលសូវៀត៕
ចែករំលែកព័តមាននេះ