រាជធានីភ្នំពេញ ៖ នារីម្នាក់បើករថយន្តស៊េរីទំនើបមួយគ្រឿងក្នុងល្បឿនយ៉ាងលឿនដូចហោះមិនប្រយ័ត្នក៏ជ្រុលទៅបុករថយន្តមួយគ្រឿងទៀតម៉ាករ៉េងរ៉ូវើរ កាលពីវេលាម៉ោង១០យប់ ថ្ងៃទី១០ ខែកញ្ញា ឆ្នាំ២០១៨ ត្រង់ចំណុចតាមបណ្ដោយផ្លូវលេខ៣៣៧កែងនិងផ្លូវលេខ៥២៨ ស្ថិតក្នុងសង្កាត់បឹងកក់ទី១ ខណ្ឌទួលគោក។
តាមប្រភពព័ត៌មានពីកន្លែងកើតហេតុបានអោយដឹងថា នៅមុនពេលកើតហេតុ គេឃើញបុរស២នាក់ដោយបុរសម្នាក់ជាបើកបររថយន្តមួយគ្រឿងម៉ាករ៉េងរ៉ូវើរ ពណ៌ស ពាក់ស្លាកលេខ ភ្នំពេញ ២AP-៧៧៣៦ ធ្វើដំណើរតាមបណ្ដោយផ្លូវលេខ៣៣៧ ក្នុងទិសដៅពីកើតទៅលិច លុះមកដល់ចំណុចកើតហេតុក៏បានបើកបរឆ្លងកាត់ផ្លូវ៥២៨ ពេលនោះស្រាប់តែមានរថយន្តមួយគ្រឿងទៀតម៉ាក ម៉ាស្តា ពណ៌ក្រហម ពាក់ស្លាកលេខ ភ្នំពេញ ២AM-១១១៨ បើកបរដោយនារីម្នាក់។
ប្រភពព័ត៌មានបានបន្តទៀតថា រថយន្តម៉ាកម៉ាស្តាបើកបរក្នុងល្បឿនយ៉ាងលឿនដូចហោះ ធ្វើដំណើរតាមបណ្ដោយផ្លូវ៥២៨ ក្នុងទិសដៅពីត្បូងទៅជើងខ្វះការប្រុងប្រយ័ត្នក៏ជ្រុលទៅបុករថយន្តម៉ាករ៉េងរ៉ូវើរដែលបើកឆ្លងផ្លូវខាងលើចំពាក់កណ្ដាលពេញទំហឹង បណ្ដាលឲ្យរថយន្តរ៉េងរ៉ូវើរខ្ទាតទៅបុកនឹងដើមព្រីងមួយដើមនៅខឿនតាមចិញ្ចើមផ្លូវហើយដើមព្រីងនោះរលាត់សម្បកបន្តិចបន្តួច ចំណែករថយន្តម៉ាករ៉េងរ៉ូវើររងការខូចខាតក្រពឹតចំហៀងខាងឆ្វេង និងផ្នែកខាងក្រោយយ៉ាងដំណំ រីឯរថយន្តម៉ាកម៉ាស្តាបានរងការខូចខាតក្រពឹតផ្នែកខាងមុខស្ទើរទាំងស្រុង ពេលនោះនារីជាអ្នកបើកបររថយន្តម៉ាកម៉ាស្តាបានគេចខ្លួនបាត់ពីកន្លែងកើតហេតុ ។
ក្រោយពេលកើតហេតុ ក៏ឃើញមានតំណាងភាគីខាងរថយន្តម៉ាកម៉ាស្តាបានចេញមុខមក ដោះស្រាយជាមួយនិងភាគីខាងរថយន្តម៉ាករ៉េងរ៉ូវើរ ដោយព្រមយករថយន្តម៉ាករ៉េងរ៉ូវើរទៅជួសជុលឲ្យដើម្បីបញ្ចប់រឿងនៅនឹងកន្លែងកើតហេតុ៕
ចែករំលែកព័តមាននេះ