រាជធានីភ្នំពេញ៖កញ្ញាបូរ័ត្ន ប៊ុនសុភាវី ហ្វ្រេស៊ី ចំណាត់ថ្នាក់លេខ១បានភ្ជាប់ពាក្យហើយ។ ខណៈកំពុងចាប់ផ្តើមលូតលាស់ក្នុងអាជីពសិល្បៈ តើបុរសជាគូដណ្តឹងបើកចិត្តឲ្យនាងនៅបន្តអាជីពដែលចៀសមិនផុតពីមានការអោបថើប ប៉ះកាយនេះទេ ?
ទទួលចំណាត់ថ្នាក់លេខ១ ក្នុងការប្រកួត Freshies កាលពីឆ្នាំ២០១៦ និងទើបតែលូតលាស់ក្នុងពិភពសិល្បៈ ស្រាប់តែបូរ័ត្ន ប៊ុនសុភាវី បានភ្ជាប់ពាក្យជាមួយនឹងបុរសអ្នកជំនួញកាលពីថ្ងៃអាទិត្យទី៩ កញ្ញា ២០១៨។ សុភាវី មានក្តីរីករាយចំពោះពិធីបែបប្រពៃណី បង្ហាញពីភាពប្រាកដប្រជានៃក្តីស្នេហារបស់នាងនេះ ។ ពិធីភ្ជាប់ពាក្យរបស់នាងបានធ្វើឡើងដោយមានញាតិមិត្តទាំងសងខាងច្រើនចូលរួម ។
បូរ័ត្ន ប៊ុនសុភាវី ឲ្យដឹងថាបុរសជាគូដណ្តឹងមិនហាមឃាត់នាងបន្តអាជីពសិល្បៈទេ ។ បើទោះជាអនាគតស្វាមីមិនប្រកាន់អាជីពសិល្បៈក្តី តែបូរ័ត្ន ប៊ុនសុភាវី ថានាងនឹងប្រយ័ត្នបំផុតជាមួយការងារថតសម្តែង ពិសេសការថតមានឈុតឆាកបែបស្នេហាដើម្បីចៀសវាងភាពមិនសមរម្យជានារីមានគូរួចហើយ ។
គ្មានអ្នកណាម្នាក់មិនចាប់អារម្មណ៍ទេ ដោយសារតែបូរ័ត្ន ប៊ុនសុភាវី ទើបតែបានលើកពានរង្វាន់ជាFreshies លេខ១ និងចាប់ផ្ដើមសំបូរការងារសម្ដែង គួរតែបិទបាំងរឿងស្នេហា ដើម្បីកុំឲ្យធ្លាក់កូដ បែរជានាងបើកចំហពិធីភ្ជាប់ពាក្យ ដែលមិនខុសពីប្រកាសជាសាធារណៈថា នាងមិនមែនទំនេរ និងមិនខ្វល់ពីការថមថយទីផ្សារសិល្បៈ ។ ពិធីបំពាក់ចិញ្ចៀនរបស់សុភាវី មិនមានអ្នកសិល្បៈចូលរួមច្រើនទេ ប៉ុន្តែសម្រាប់មិត្តភក្តិ និងសាច់ញាតិបងប្អូន គឺមានច្រើន។
កញ្ញាបូរ័ត្ន ប៊ុនសុភាវី និយាយថា គូដណ្ដឹងរបស់នាងបានស្រលាញ់ និងមើលចិត្តគ្នាតាំងពីឆ្នាំ២០១៥ មុនពេលនាងចូលប្រលងហ្វ្រេស៊ីទៅទៀត ។ ដោយសារតែនាង និងបុរសជាគូស្នេហ៍កាន់តែយល់ចិត្តគ្នា ទើបចាស់ទុំផ្សំផ្គុំ និងរៀបចំពិធីភ្ជាប់ពាក្យ ។ គូដណ្ដឹងរបស់នាង មានឈ្មោះសៅ ណារ៉ុង អាយុ២៦ឆ្នាំ ជាអ្នកជំនួញម្នាក់ ដោយគ្រួសាររបស់លោកជាអ្នករកសីុ ដែលមានជីវភាពល្អប្រសើរ ។
កញ្ញាបូរ័ត្ន ប៊ុនសុភាវី និយាយថា «ហេតុផលដែលនាងខ្ញុំស្រលាញ់គ្នា មិនមែនព្រោះតែស្ថានភាពគ្រួសារនោះទេ គឺដោយសារតែគូដណ្ដឹងមិនមែនជាមនុស្សប្រច័ណ្ឌនឹងការងារសិល្បៈ និងតែងផ្ដល់តម្លៃជានិច្ចឲ្យនាង ខ្ញុំចាប់តាំងពីនាងខ្ញុំបានក្លាយជាហ្វ្រេស៊ី ។
ក្នុងនោះកត្តាគ្រួសាររបស់លោក ស្រលាញ់ និងផ្ដល់តម្លៃអោយខ្ញុំក្នុងនាមជាតារាម្នាក់ ក៏ជាអ្វីដែលធ្វើឲ្យនាងខ្ញុំជឿជាក់ថាការចាប់ដៃគ្នារបស់នាងខ្ញុំ និងគូស្នេហ៍ នឹងគ្មានឧបសគ្គកើតឡើងនោះដែរ ។
ខ្ញុំនឹងបើកចំហស្នេហា មិនខ្វល់ពីរឿងធ្លាក់កូដនោះទេ ដោយមានការជឿជាក់យ៉ាងមុតមាំថា នឹងមានជំហានសិល្បៈល្អប្រសើរផង នៅក្រោយដំណឹងភ្ជាប់ពាក្យ »។
បូរ័ត្ន ប៊ុនសុភាវី និងគូដណ្ដឹង នៅមិនទាន់កំណត់ថ្ងៃរៀបការនៅឡើយទេ ដោយរង់ចាំមើលពេលវេលា និងសន្សំលុយរៀងខ្លួនឲ្យបានច្រើនបន្តិចសិន ៕
ចែករំលែកព័តមាននេះ