ខេត្តស្ទឹងត្រែង ៖ ចំណីអាហារមួយចំនួនហួសកាលបរិច្ឆេទប្រើប្រាស់ត្រូវមន្ត្រីសាខាកាំកុងត្រូលខេត្តស្ទឹងត្រែងបានចាត់វិធានការដកហូតយកទៅបំផ្លាញចោលដើម្បីរក្សាសុខភាព អ្នកបរិភោគ ។
សកម្មភាពចុះពិនិត្យទំនិញនៅតាមបណ្តាហាងលក់ដូររបស់បងប្អូនអាជីវករនៅក្រុងស្ទឹងត្រែងថ្ងៃទី១០ ខែកញ្ញា ឆ្នាំ២០១៨ លោក គឹម ប្រុស ប្រធានសាលាខាកាំកុងត្រូលប្រចាំខេត្តបានបញ្ជាក់ថា ការធ្វើបែបនេះយើងការពារសុខភាពអ្នកបរិភោគជាពិសេសកុមារតូចៗនៅពេលទៅសាលារៀនព្រោះចំណីអាហារទាំងនេះហួសកាលបរិច្ឆេទប្រើប្រាស់វាបង្កឱ្យប៉ះពាល់សុខភាព ពេលបរិភោគវា ។
លោកថា មន្ត្រីសាខាកាំក្រុងត្រូលបានចុះអប់រំជារឿយៗមកហើយតែយើងមិនអាចធ្វើបានគ្រប់ជ្រុងជ្រោយឡើយសំខាន់គឺបងប្អូនអាជីវករ និងប្រជាពលរដ្ឋត្រូវរួមគ្នាស្វែងយល់ពីការប្រើប្រាស់ចំណីអាហារដោយខ្លួនឯង ព្រោះទំនិញខ្លះមានស្លាកសញ្ញា លេខ ថ្ងៃខែឆ្នាំផលិត បើពិនិត្យឃើញថា វាជិតផុតឬហួសកំណត់ ឬគ្មានសញ្ញាសំគាល់ សូមកុំទិញបរិភោគ ។
លោក លាង សោភា អ្នកលក់ចំណីអាហានេះដែរបានទទួលស្គាល់ថា កន្លងមកធ្លាប់មានកុមារស្លាប់ដោយសាតែចំណីអាហារនេះម្នាក់រួចមកហើយ នៅភូមិឃុំព្រះរំកិល ស្រុកថាឡាបរិវ៉ាត់ ដោយសារតែបរិភោគចាហួយដូង និងទឹកក្រូចធ្វើឱ្យរាគក្អួតព្យាបាលមិនទាន់ ។
លោកសំពូមពរឲ្យមន្ត្រីសាខាកាំកុងត្រូលឧស្សាហ៍ចុះឲ្យបានជាញឹកញាប់ដើម្បីសុខភាពប្រជាពលរដ្ឋយើង ព្រោះអីបច្ចុប្បន្នមានទំនិញក្លែងបន្លំច្រើន ហើយពួកគាត់អ្នកលក់ដូរក៏រួមគ្នាប្រុងប្រយ័ត្នដែរក្រោយពីទទួលបានការណែនាំនេះ ។
លោក សាង ចាន់ស្រីមុំ អាជីវករលក់ទំនិញនៅជិតផ្សារគីឡូ២បានទទួលស្គាល់ថា បញ្ហាចំណីអាហារគ្មានកាលបរិច្ឆេទប្រើប្រាស់ ឬសញ្ញាសំគាល់នេះជាបញ្ហាមួយបង្ហាញពីភាពគ្រោះថ្នាក់បំផុតពីព្រោះកាលណាចំណីអាហារនៅសេសសល់យូរវាបំលែងរសជាតិទៅជាជូរផ្អូម ។
សូមបញ្ជាក់ថា ក្នុងសកម្មភាពចុះពិនិត្យនេះមន្ត្រីសាខាកាំកុងត្រូលដកហូតបានទឹកដោះគោអាដេខូចគុណភាព១៤៨៨ដប ទឹកអាខ្វរៀរ៧៨ដប ទឹកវីតា៤៨ដប ទឹកក្រូចហ្វាន់តា១យួរ និងនំស្រួយចំនួន២០កញ្ជាប់ផងដែរ ។ ក្រោយការដកហូតទំនិញខូចគុណភាពនោះមន្ត្រីសាខាកាំកុងត្រូលបាននាំយកទៅរក្សាទុកដើម្បីត្រៀមដុតបំផ្លាញចោលនាពេលខាងមុខ ៕
ចែករំលែកព័តមាននេះ