ខេត្តកំពត ៖ តាមសេចក្តីរាយការណ៍ពីនគរបាលការិយាល័យចរាចរណ៍ផ្លូវគោកនៃស្នងការដ្ឋាននគរបាលបានឲ្យដឹងថា មានករណីគ្រោះចរាចរដ៏រន្ធត់មួយបានកើតឡើងកាលពីវេលាម៉ោង ១១និង៥០នាទីយប់ថ្ងៃទី៩ ខែកញ្ញាឆ្នាំ ២០១៨ នៅត្រង់ចំណុចក្បាលស្ពានថ្មព្រែកកំពង់បាយ ស្ថិតក្នុងភូមិកំពង់បាយខាងត្បូង សង្កាត់កំពង់បាយ ក្រុងកំពត ខេត្តកំពត បង្កឡើងរវាងរថយន្តបុកជាមួយម៉ូតូ ក្នុងទិសដៅស្របគ្នាពីលិចទៅកើត ( ត្រង់ចំណុចផ្លូវបំបែកជាបួន) បណ្តាលឱ្យបុរសម្នាក់បានស្លាប់ ។
ជនរងគ្រោះដែលស្លាប់ឈ្មោះ ន ណន ភេទប្រុស អាយុ៤០ឆ្នាំ មានទីលំនៅភូមិកំពង់បាយខាងត្បូង សង្កាត់កំពង់បាយ ក្រុងកំពត។
ប្រភពដដែលឲ្យដឹងទៀតថា មុនពេលកើតហេតុ គេឃើញជនរងគ្រោះជិះម៉ូតូមួយគ្រឿងចុះពីលើស្ពានព្រែកកំពង់បាយ ក្នុងទិសដៅពីលិចទៅកើត លុះមកដល់ចំណុចផ្លូវបំបែក ក៏មានរថយន្តមួយគ្រឿងមិនស្គាល់ម៉ាក បើកបរយ៉ាងលឿនចុះពីលើស្ពានក្នុងទិសដៅស្របគ្នា ហើយបានបុកម៉ូតូពេញទំហឹង បណ្តាលឲ្យដួលម៉ូតូ ធ្វើឱ្យអ្នកបើកបរម៉ូតូដួលបោកក្បាលនឹងថ្នល់ស្លាប់ភ្លាមៗយ៉ាងអាណោចអាធ័មនៅនឹងកន្លែងកើតហេតុ ហើយម៉ូតូបានរងការខូចខាតយ៉ាងធ្ងន់ធ្ងរ ចំណែករថយន្តបង្កបានបង្កើនល្បឿនបើកគេចបាត់ស្រមោលតែម្តង ។
ក្រោយពីសមត្ថកិច្ចធ្វើការពិនិត្យវាស់វែងរួច សពត្រូវបានប្រគល់ឲ្យក្រុមគ្រួសារយកទៅធ្វើបុណ្យតាមប្រពៃ
ណី ចំណែកម៉ូតូត្រូវបានសមត្ថកិច្ចយកទៅរក្សាទុកនៅការិយាល័យចរាចរផ្លូវគោក រង់ចាំប្រគល់ឲ្យក្រុមគ្រួសារយកទៅផ្ទះវិញ ៕
ចែករំលែកព័តមាននេះ