ខន្តីហ្នឹងហើយជាគ្រឿងអលង្ការរបស់អ្នកប្រាជ្ញ ព្រោះខន្តីនេះអាចញ៉ាំងផលប្រយោជន៍ឲ្យសម្រេចបានគ្រប់យ៉ាង និងមានតម្លៃដ៏មហាសាល អ្នកមានសេចក្តីខន្តីទោះជាមានរឿងអ្វីកើតឡើង ទឹកមុខនៅតែស្រស់ញញឹមជាធម្មតា គឺមិនញុំាងចិត្តឱ្យពុះកញ្ជ្រោលទៅតាមសភាពការណ៍នោះឡើយ ។
បន្តទៅនេះជាអត្ថប្រយោជន៍នៃការខន្តីគឺៈ ខន្តីធ្វើឲ្យរួចពីក្រញាំតណ្ហា មិនលុះក្នុងអំណាចនៃចំណង់, ខន្តីគឺសេចក្តីអត់ធន់ធ្វើឲ្យមានរបៀបរៀបរយ មានវិន័យត្រឹមត្រូវ, សេចក្តីអត់ធន់ អាចបញ្ឈប់សេចក្តីក្រោធបានភ្លាម, ការអត់ធន់ ធ្វើឲ្យតម្កល់ខ្លួនបានក្នុងផ្លូវល្អ, ការអត់ធន់ ជាដៃគូមិនអាចអត់បានក្នុងការងារ, អត់ធន់ក្នុងរឿងដែលគួរអត់ធន់ គឺត្រូវអត់ធន់ចំពោះមុខនាទី អត់ធន់ក្នុងការបរិភោគ ការដេក ការរៀនសូត្រជាដើម, អត់ធន់ក្នុងរឿងដែលមិនគួរអត់ធន់ ដូចជាយើងធ្វើល្អហើយតែត្រូវគេនិន្ទា ធ្វើល្អដល់គេត្រូវប្រទូស្តតបវិញ និយាយពិត ធ្វើដោយស្មោះ មិនគួរអ្វីដែលយើងត្រូវអត់ធន់នោះឡើយ ការអត់ធន់បែបនេះលំបាកជាទីបំផុត តែបើបុគ្គលធ្វើបានឈ្មោះថា ល្អដ៏ក្រៃលែង ផលនឹងកើតមានជាក់ជាមិនខាន, សេចក្តីអត់ធន់ ធ្វើឲ្យបានជាមនុស្សមានចិត្តធ្ងន់ ធន់នឹងកិច្ចការគ្រប់យ៉ាង, សេចក្តីអត់ធន់ ជាគ្រឿងឃុំគ្រងរបស់ចិត្ត, ការអត់ធន់ នាំឲ្យមានមិត្តល្អៗជាបរិវារ និងសេចក្តីអត់ធន់ ជាកំពូលនៃគុណធម៌ ។
សូមលើកយកឧទាហរណ៍មកបញ្ជាក់បន្តិចថា តាមធម្មតាដែកដែលគេយកទៅដុតឱ្យឆ្អិនឆ្អៅ ហើយយកមកលត់ យកមកដំឱ្យទៅជាឧបករណ៍ផ្សេងៗ រមែងរឹងជាដែកថែប និងមានតម្លៃខ្ពស់ យ៉ាងណាបុគ្គលដែលអត់ធន់បានល្អ ក៏ជាមនុស្សរឹងប៉ឹង និងមានគុណតម្លៃដ៏មហាសាលក៏យ៉ាងនោះដែរ ។
ចែករំលែកព័តមាននេះ