កុំធ្វេសប្រហែស កុំប្រមាទឱ្យសោះត្រូវខិតខំសន្សំបុណ្យកុសលឡើង ការងារសុចរិតមានច្រើនណាស់ដែលយើងត្រូវធ្វើ ត្រូវសន្សំទុករាល់ថ្ងៃ មិនមែនក្រៅតែពីការងាររកចិញ្ចឹមជីវិតហើយក៏ត្រូវចប់ដែរនោះឡើយ គឺនៅមានការងារដែលត្រូវធ្វើ ឬត្រូវបង្កើតឡើងតាមដួងចិត្តជាច្រើនទៀតដែលយើងត្រូវអនុវត្ត
ត្រូវធ្វើ ត្រូវអប់រំរាល់ថ្ងៃដោយគ្មានពេលសម្រាកឡើយ ។ តែមិនដូច្នោះទេមនុស្សពួកខ្លះពេលទំនេរមិនគិតសន្សំបុណ្យកុសល បែរជាទៅអង្គុយនិយាយដើមគេ ពិតជាមិនល្អសោះ ។
មែនហើយការងារអាក្រក់ច្រើនណាស់ ដែលអ្នកធ្វើហើយតែមិនបានគិតថា វាជាអំពើបាបនោះឧទាហរណ៍ដូចជា ការមានចិត្តបៀតបៀនគេ ការឈ្នានីសគេ ការនិយាយដើមគេ ដែលករណីនេះមានមនុស្សជាច្រើន ពេលទំនេរក៏ទៅអង្គុយនិយាយពីនេះខ្លះ ពីនោះខ្លះ អ្នកនេះមិនល្អយ៉ាងនេះ អ្នកនោះអាក្រក់យ៉ាងនោះជាដើម នេះគឺជាការងារដ៏អាក្រក់មួយ តែអ្នកមិនបានគិតថាវាបាបទេ ព្រោះអ្នកគិតថាមិនបានទៅធ្វើផ្ទាល់ដៃ ឬទៅសម្លាប់គេ ។
តាមពិតទៅអំពើបាបមិនមែនទាល់តែអ្នកទៅសម្លាប់ជីវិតគេនោះទេ មិនបានសម្លាប់គេក៏បានបាបដូចគ្នាដូចជា យើងមានគំនិតមិនល្អ ការទៅនិយាយដើមគេ ការបៀតបៀនគេ ឈ្នានីសគេ ព្យាបាទគេ…ទាំងនេះសុទ្ធតែជាអំពើបាបពិតៗ ពោលគឺនរណានៅមានអកុសលមូល លោភៈ ទោសៈ មោហៈ បាបនឹងមាននៅក្នុងបុគ្គលនោះ ហើយអពមង្គលក៏កើតឡើងក្នុងពេលដំណាលគ្នាដែរ ។
ព្រះពុទ្ធទ្រង់មិនសរសើរការងារណា ដែលជាការងារមិនប្រក្រតី ការងារមានទោសនាំមកនូវសេចក្តីវិនាស នាំមកនូវអពមង្គលនោះឡើយ ។
ចែករំលែកព័តមាននេះ