មនុស្សយើងគ្រប់គ្នាស្គាល់ហើយពាក្យថា មេត្តា ប៉ុន្តែប្រហែលជាតិចណាស់ដែលដឹងពីប្រភពនៃពាក្យនេះចេញមកពីណា ហើយប្រែន័យពិតប្រាកដយ៉ាងណានោះ ។
មេត្តានេះជាធម៌របស់អ្នកប្រាជ្ញ មានន័យថា អ្នកណាកាន់មេត្តាបាន អ្នកនោះហើយជាអ្នកប្រាជ្ញ។ មេត្តានេះជាភាសាបាលីប្រែថា មេត្រី, សេចក្តីរាប់រក, សេចក្តីរាប់អានគ្នា, សេចក្តីប្រណី, បំណងចង់ឱ្យអ្នកដទៃបានសេចក្តីសុខ ចម្រើនដូចខ្លួនដែរ, មានមេត្តា, ផ្សាយមេត្តាថា ខ្ញុំចង់បានសុខស្ងប់យ៉ាងណាមិញ សូមឱ្យអ្នកទាំងឡាយបានសុខស្ងប់ដូចខ្ញុំចង់បាននុះដែរទៅ ។
មេត្តានេះជាធម៌សំខាន់មួយក្នុងលោក និងជាបារមីមួយក្នុងចំណោមបារមីទាំង៣០សម្រាប់ចម្លងសត្វលោកទៅកាន់បរមសុខ។ អ្នកមានមេត្តារមែងទទួលបានអានិសង្ស១០ប្រការគឺៈ ១-ដេកលក់ជាសុខ ២-ភ្ញាក់ឡើងជាសុខ ៣-មិនយល់សប្តិអាក្រក់ ៤-ជាទីស្រឡាញ់របស់ពួកមនុស្ស ៥-ជាទីស្រឡាញ់របស់ពួកអមនុស្ស ៦-ពួកទេវតាតែងរក្សា ៧-ភ្លើងក្ដី ថ្នាំពិសក្ដី គ្រឿងសស្ត្រាវុធក្ដី មិនអាចមកជិតកាយ ធ្វើនូវអន្តរាយណាមួយឡើយ ៨-ចិត្តរមែងតាំងមាំដោយឆាប់ ៩-សម្បុរមុខស្រស់ថ្លា ១០-ជាអ្នកមិនវង្វេងក្នុងពេលធ្វើកាយកិរិយា ។
បុគ្គលណាបានសេពគប់ បានចម្រើន បានតម្កល់ស៊ប់ បានប្រព្រឹត្តរឿយៗ បានសន្សំទុកល្អហើយ អានិសង្សទាំង១០ប្រការនេះ រមែងកើតប្រាកដដល់បុគ្គលនោះ ។
ចែករំលែកព័តមាននេះ