បាងកក ៖ មន្ត្រីបសុសត្វនៅព្រំប្រទល់និងនៅព្រលានយន្តហោះ មានការប្រុងប្រយ័ត្នខ្ពស់ប្រឆាំងនឹងការរត់ពន្ធជ្រូក ខណៈដែលមានការព្រួយបារម្ភអំពីការរីករាលដាលជំងឺគ្រុនផ្តាសាយជ្រូកអាហ្វ្រិកនៅក្នុងប្រទេសចិន។ លោក Sorawis Thaneto អគ្គនាយកនាយកដ្ឋានអភិវឌ្ឍន៍បសុសត្វ បានបញ្ជាឲ្យស្ថានីយបោសសម្អាត…
បាងកក ៖ មន្ត្រីបសុសត្វនៅព្រំប្រទល់និងនៅព្រលានយន្តហោះ មានការប្រុងប្រយ័ត្នខ្ពស់ប្រឆាំងនឹងការរត់ពន្ធជ្រូក ខណៈដែលមានការព្រួយបារម្ភអំពីការរីករាលដាលជំងឺគ្រុនផ្តាសាយជ្រូកអាហ្វ្រិកនៅក្នុងប្រទេសចិន។
លោក Sorawis Thaneto អគ្គនាយកនាយកដ្ឋានអភិវឌ្ឍន៍បសុសត្វ បានបញ្ជាឲ្យស្ថានីយបោសសម្អាត រក្សាភ្នែកមុតស្រួចឃ្លាំមើលអ្នកជួញដូរសត្វជ្រូក និង សត្វជ្រូករស់ផ្ទាល់តែម្តង ដោយសារតែពួកជ្រូកទាំងនោះអាចមានជំងឺនេះ។ លោកបាននិយាយថាសត្វជ្រូកដែលត្រូវបានរឹបអូសត្រូវតែបំផ្លាញភ្លាមៗ។
នាយកដ្ឋាននេះបានបង្កើតឡើងនូវគណៈ កម្មាធិការមួយ ដែលមានមន្ត្រីអប់រំកសិករនិងតំណាងឧស្សាហកម្មជ្រូក ដើម្បីកំណត់វិធានការការពារវីរុសជ្រូកដែលធ្វើឲ្យស្លាប់។ ជំងឺនេះកើតមាននៅទ្វីបអាហ្វ្រិក ហើយត្រូវបានគេរកឃើញជាលើកដំបូងនៅក្នុងប្រទេសចិនកាលពីខែមុននៅភាគឦសាននៃខេត្តឡាវ និងដែលជាប់ព្រំដែនប្រទេសកូរ៉េខាងជើងនិងសមុទ្រលឿង។ បន្ទាប់មកវាបានរីករាលដាលដល់ខេត្ត៥ទៀត នៅក្នុងប្រទេសចិនដោយមានជ្រូកចំនួនជាង ២៤០០០ក្បាលត្រូវបានគេសម្លាប់ ដើម្បីបញ្ឈប់ការរីករាលដាលរបស់ជំងឺនេះ។
យ៉ាងណាមិញ នៅមិនទាន់មានវ៉ាក់សាំងប្រឆាំងនឹង ជំងឺនេះនៅឡើយទេ ប៉ុន្តែវីរុសមិនបង្កឲ្យមានបញ្ហាសុខភាពដល់មនុស្សឡើយ។ នៅក្នុងប្រទេសថៃនាយកដ្ឋានបានបញ្ជាឲ្យហាមឃាត់ការនាំចូលជ្រូករស់និងងាប់ ពីប្រទេសចិនភ្លាមៗ បន្ទាប់ពីវីរុសបានបង្ហាញខ្លួននៅទីនោះ ដើម្បីទប់ស្កាត់ការធ្វើឲ្យខូចដល់ការចិញ្ចឹមជ្រូកក្នុងប្រទេស។
យោងតាមតួលេខចុងក្រោយបំផុតពីការិយាល័យសេដ្ឋកិច្ចកសិកម្ម បានឲ្យដឹងថា ប្រទេសថៃមានសត្វជ្រូកចំនួន ១៣.៥លានក្បាល ក្នុងកសិដ្ឋានពាណិជ្ជកម្ម ដែលប្រហែល ២៥%នៅក្នុងខេត្ត Ratchaburi និងខេត្ត Nakhon Pathom នៅឆ្នាំ ២០១៥។
អង្គការកសិកម្មស្បៀងអាហារ FAO ដែលព្រួយបារម្ភអំពីការរីករាលដាលនៃជំងឺគ្រុនផ្តាសាយជ្រូកទៅកាន់តំបន់អាស៊ី ក៏បានរៀបចំកិច្ចប្រជុំបន្ទាន់រយៈពេលបីថ្ងៃ នៅទីក្រុងបាងកកនៅសប្តាហ៍នេះ៕
ចែករំលែកព័តមាននេះ