កំណប់ទ្រព្យដែលបុរសស្ត្រីបានកប់ទុកល្អហើយដោយទាន សីល ដោយការសង្រួម និងដោយការទូន្មានខ្លួនក្នុងចេតិយ ក្នុងសង្ឃ ឬក្នុងមាតាបិតា ឬថាក្នុងបងប្រុសស្រី កំណប់ទ្រព្យនោះ ចាត់ថាជាកំណប់ទ្រព្យដ៏ប្រពៃ ដែលកប់ទុកល្អហើយ នរណាមិនគប្បីបំផ្លាញបានឡើយ ជាកំណប់ទ្រព្យដែលជាប់តាមខ្លួនទៅជារៀងរហូត កាលបុគ្គលត្រូវលះលោកនេះទៅហើយ ខ្លួនរមែងកាន់យកនូវកំណប់ទ្រព្យ គឺបុណ្យនោះទៅជាមួយ ។
កំណប់ទ្រព្យគឺបុណ្យ មិនទូទៅដល់ពួកជនដទៃ ជារបស់ដែលចោរលួចទៅមិនបាន ភ្លើងឆេះមិនរលាយ។ កំណប់ទ្រព្យគឺបុណ្យណាជាប់តាមខ្លួនបាន អ្នកប្រាជ្ញគួរសន្សំនូវកំណប់ទ្រព្យ គឺបុណ្យនោះដោយប្រពៃចុះ ។
កំណប់ទ្រព្យ គឺបុណ្យនោះឲ្យនូវសេចក្តីប្រាថ្នាគ្រប់យ៉ាងដល់ទេវតា និងមនុស្សទាំងឡាយ ពួកទេវតានិងមនុស្សទាំងឡាយប្រាថ្នានូវផលណាៗ ផលទាំងពួងនោះ រមែងសម្រេចដោយកំណប់ទ្រព្យ គឺបុណ្យនោះ ។
ភាពជាអ្នកមានសម្បុរផូរផង់ មានសំឡេងពីរោះ ទ្រង់ទ្រាយល្អ រូបល្អ ជាអធិបតី មានយសបរិវារ ផលទាំងអស់រមែងបានដោយកំណប់ទ្រព្យ គឺបុណ្យនោះ ។
បុញ្ញសម្បទាទាំងអស់នេះឲ្យសម្រេចប្រយោជន៍ដ៏ធំ ដោយប្រការដូច្នេះ ព្រោះហេតុនោះ អ្នកប្រាជ្ញទាំងឡាយ ទើបសរសើរនូវភាពនៃបុគ្គលជាអ្នកមានបុណ្យធ្វើទុកមកហើយ ។
ចែករំលែកព័តមាននេះ