វ៉ាស៊ីនតោន៖ កាលពីថ្ងៃសុក្រកន្លងមកនេះ លោកប្រធានាធិបតីដូណាល់ត្រាំ (Donald Trump) បានគម្រាមថា នឹងដាក់ពន្ធបន្ថែមលើផលិតផលចិនទាំងអស់ដែលនាំចូលមកកាន់សហរដ្ឋអាមេរិក ធ្វើឲ្យភាពតានតឹងជាមួយនឹងប្រទេសចិនកាន់តែធ្ងន់ធ្ងរឡើងខណៈដែលនៅកំពុងចរចាជាមួយនឹងកាណាដានិងសហភាព អ៊ឺរ៉ុប (EU)។…
វ៉ាស៊ីនតោន៖ កាលពីថ្ងៃសុក្រកន្លងមកនេះ លោកប្រធានាធិបតីដូណាល់ត្រាំ (Donald Trump) បានគម្រាមថា នឹងដាក់ពន្ធបន្ថែមលើផលិតផលចិនទាំងអស់ដែលនាំចូលមកកាន់សហរដ្ឋអាមេរិក ធ្វើឲ្យភាពតានតឹងជាមួយនឹងប្រទេសចិនកាន់តែធ្ងន់ធ្ងរឡើងខណៈដែលនៅកំពុងចរចាជាមួយនឹងកាណាដានិងសហភាព អ៊ឺរ៉ុប (EU)។
ប្រសាសន៍របស់លោកបានបង្កឲ្យទីផ្សារភាគហ៊ុនអាមេរិកធ្លាក់ចុះខណៈដែលមានកង្វល់ទាក់ទិននឹងផលប៉ះពាល់ផ្នែកសេដ្ឋកិច្ច។
គួរបញ្ជាក់ដែរថា សហរដ្ឋអាមេរិកបានដាក់ពន្ធលើផលិតផលចិនប្រមាណ ៥០ប៊ីលានដុល្លាររួចមកហើយ ប៉ុន្តែលោកប្រធានាធិបតីត្រាំបានឲ្យដឹងថាការដាក់ពន្ធលើផលិតផលចិនប្រមាណ ២០០ប៊ីលានបន្ថែមទៀតកំពុងស្ថិតក្រោមការពិចារណា ហើយអាចនឹងមានប្រសិទ្ធិភាពក្នុងពេលឆាប់ៗ។
ប៉ុន្មានម៉ោងមុនពេលលោកប្រធានាធិបតីខាងលើមានប្រសាសន៍ដូចនេះ លោក Larry Kudlow ដែលជាទីប្រឹក្សាសេដ្ឋកិច្ចរបស់ White House បាននិយាយថា ការចរចាជាមួយនឹងប្រទេសចិនកំពុងតែបន្តកើតមានឡើងដើម្បីកាត់បន្ថយភាពតានតឹងនៃជម្លោះ ហើយលោកជឿជាក់ថាអាចនឹងស្វែងរកដំណោះស្រាយបាន។
សូមរម្លឹកថា លោកប្រធានាធិបតីត្រាំធ្លាប់គម្រាមថានឹងដាក់ពន្ធលើផលិតផលចិនទាំងអស់ដែលនាំចូលដើម្បីដោះស្រាយបញ្ហាការលួចបច្ចេកវិទ្យាអាមេរិក និងការដាក់ឧបសគ្គលើផលិតផលនិងការវិនិយោគអាមេរិក។
យោងទៅតាមទិន្នន័យដែលបានចេញកាលពីថ្ងៃសៅរ៍បានបង្ហាញឲ្យដឹងថា ប្រទេសចិនមានអតិរេកពាណិជ្ជកម្មជាមួយនឹងសហរដ្ឋ អាមេរិកប្រមាណ ៣១.០៥ប៊ីលានដុល្លារឯណោះកាលពីខែសីហាកន្លងមកនេះ។
ក្រសួងពាណិជ្ជកម្មចិនបានឲ្យដឹងកាលពីថ្ងៃព្រហស្បត្តិ៍ដែរថា ប្រទេសចិនបានត្រៀមខ្លួនរួចជាស្រេចក្នុងការឆ្លើយតប។ យ៉ាងណាក្តី លោកនាយករដ្ឋមន្ត្រី Li Keqiang របស់ប្រទេសចិនបានឲ្យដឹងកាលពីថ្ងៃសុក្រថា ប្រទេសចិននឹងបន្តបើកទីផ្សារនិងបង្កើនភាពងាយស្រួលក្នុងការចូលទីផ្សារ និងបានបន្ថែមថាលោកសង្ឃឹមថាសហគ្រាសអាមេរិកនឹងជំរុញដល់ការវិនិយោគ៕
ចែករំលែកព័តមាននេះ