រាជធានីភ្នំពេញ ៖ អ្នកគាំទ្រមិនតិចជាង៥ម៉ឺននាក់ទេដែលនឹងចូលមើលការប្រកួតរវាង
ក្រុមជម្រើសជាតិកម្ពុជា(គោព្រៃ) និងក្រុមជម្រើសជាតិម៉ាឡេស៊ីក្នុងជំនួបមិត្តភាពកម្ដៅសាច់ដុំនៅលើទីលានពហុកីឡដ្ឋានជាតិអូឡាំពិក នាវេលាម៉ោង៦និង៣០នាទីល្ងាចថ្ងៃទី១០ កញ្ញានេះ បើយោងតាមការឱ្យដឹងពីមន្ត្រីសហព័ន្ធកីឡាបាល់ទាត់កម្ពុជា។
មន្ត្រីផ្នែកទីផ្សាររបស់សហព័ន្ធកីឡាបាល់ទាត់កម្ពុជា បានប្រាប់កោះសន្តិភាពកាលពីពេលថ្មីៗនេះថា ចំពោះសំបុត្រចូលទស្សនា កន្លែងមានដំបូលតម្លៃ១ម៉ឺនរៀលបានលក់អស់៣ថ្ងៃមុនការប្រកួត ចំណែកសំបុត្រតម្លៃ៥ពាន់រៀល កន្លែងអត់មានដំបូលទើបតែលក់អស់ប្រមាណ៧០%ប៉ុណ្ណោះ ។ ទោះបីយ៉ាងណាលោកថា សំបុត្រដែលនៅសេសសល់នឹងលក់អស់មិនខាន ព្រោះតាមទម្លាប់ អ្នកគាំទ្រមួយចំនួនចូលចិត្តសម្រុកទិញនៅពេលថ្ងៃប្រកួតតែម្ដងហើយអ្នកដែលមកទិញសំបុត្រចូលទស្សនាភាគច្រើនសុទ្ធសឹងតែជាយុវវ័យ។
ក្នុងចំណោមអ្នកមកទិញសំបុត្រចូលទស្សនាពេលសាកសួរពីចំណាប់អារម្មណ៍ពួកគេភាគច្រើនបញ្ចេញយោបល់ស្រដៀងគ្នាថា ពួកគេចង់ឃើញការប្រកួតរវាងក្រុមទាំងពីរខ្លាំងណាស់ជាពិសេសក្រុមជម្រើសជាតិកម្ពុជាតែម្ដងថា តើនឹងទទួលលទ្ធផលបែបណាពេលជួបក្រុមជម្រើសជាតិម៉ាឡេស៊ីដែលជាក្រុមខ្លាំងមួយនៅក្នុងតំបន់បន្ទាប់ពីក្រុមដែលមានរហស្សនាមគោព្រៃមួយនេះទទួលបានការបណ្ដុះបណ្ដាលដោយផ្ទាល់ពីលោក Keisuke Hondaដែលជាកីឡាករល្បីលំដាប់ពិភពលោករបស់ជប៉ុននោះ។
ពួកគេមានជំនឿថា តាមរយៈការបណ្ដុះបណ្ដាលនេះនឹងធ្វើឱ្យកម្រិតបច្ចេកទេស នៃការលេងរបស់ក្រុមជម្រើសជាតិកម្ពុជា មានការផ្លាស់ប្ដូរទម្រង់លេងបានល្អជាងមុនមិនខាន។
លោក ឆាំង ពិសិដ្ឋ មន្ត្រីសម្របសម្រួលរបស់សហព័ន្ធកីឡាបាល់ទាត់កម្ពុជា បានឱ្យដឹងផងដែរថា លោកមិនហ៊ានកំណត់លទ្ធផលចាញ់ឈ្នះទុកមុនបានទេ លោកគ្រាន់តែគិតថា ក្រុមជម្រើសជាតិកម្ពុជា នឹងមានការប្រែប្រួលទម្រង់លេងខ្លះ ព្រោះជាធម្មតាទេកាលណាបានហ្វឹកហាត់ជាមួយគ្រូបង្វឹកដែលមានឈ្មោះល្បី ពួកគេពិតជាខិតខំប្រឹងប្រែងមិនខានឡើយ ប៉ុន្តែគួរឱ្យស្ដាយដោយសារតែការហ្វឹកហាត់ជាមួយលោក Keisuke Honda មានរយៈពេលខ្លីពេក។
លោក ប្រាក់ សុវណ្ណារ៉ា គ្រូបង្វឹក១រូបប្រចាំសហព័ន្ធកីឡាបាល់ទាត់កម្ពុជា និងជាគ្រូឧទ្ទេសរបស់សហព័ន្ធកីឡាបាល់ទាត់អន្តរជាតិ(FIFA)បានលើកហេតុផលចំនួន២ថា៖
ទី១-ការប្រកួតរវាងក្រុមជម្រើសជាតិកម្ពុជានិងក្រុមជម្រើសជាតិម៉ាឡេស៊ីលើកនេះ គឺជាការប្រកួតលក្ខណៈមិត្តភាពដើម្បីវាស់ស្ទង់កម្រិតបច្ចេកទេសតែប៉ុណ្ណោះ ជាពិសេសដើម្បីត្រៀមលក្ខណៈប្រកួតពានរង្វាន់SUZUKI Cup នាពេលខាងមុខ ។
ដូច្នេះ គ្រូណាក៏ដូចគ្រូណាដែរ គេមិនសូវខ្វល់ពីលទ្ធផលនោះទេ ប៉ុន្តែសម្រាប់អ្នកគាំទ្រខ្មែរយើងវិញចង់ឃើញលទ្ធផលវិជ្ជមានភ្លាមៗតែម្ដង ។
លោកបានលើកជាឧទាហណ៍ពីក្រុមបាល់ទាត់ជម្រើសជាតិហ្វីលីពីនថា ស្ទើរតែគ្រប់ព្រឹត្តិការណ៍ប្រកួតជាលក្ខណៈមិត្តភាពគឺមិនសូវដែលឈ្នះគេនោះទេ ព្រោះក្រុមដែលគេប្រកួតជាមួយសុទ្ធសឹងតែជាក្រុមខ្លាំងៗ តែទីបំផុតចំណាត់ថ្នាក់របស់គេចេះតែកើនឡើង ។ ចំណែកក្រុមជម្រើសជាតិម៉ាឡេស៊ី ដែលមុនមកប្រកួតនៅស្រុកខ្មែរគេបានចាញ់ក្រុមចិនតៃប៉ិ២-០ប៉ុន្តែក្រុមចិនតៃប៉ិនេះមិនដែលលេងឈ្នះក្រុមជម្រើសជាតិកម្ពុជាទេ ។
មួយវិញទៀត ការប្រកួតជាច្រើនលើកកន្លងមកកម្ពុជាមិនដែលឈ្នះម៉ាឡេស៊ីនោះទេជាពិសេសក្នុងព្រឹត្តិការណ៍SUZUKI Cupនៅប្រទេសមីយ៉ាន់ម៉ា កាលពីឆ្នាំមុន កម្ពុជាយើងចាញ់ម៉ាឡេស៊ី២-១។
ទី២-លោក Keisuke Honda ទើបតែមកបង្ហាត់មិនទាន់បានមួយអាទិត្យស្រួលបួលផងទេ ដូច្នេះលោកគិតថាអ្វីៗនៅមិនទាន់រៀបរយបានល្អនៅឡើយ ។ ប៉ុន្តែអ្វីដែលសំខាន់សម្រាប់ការប្រកួតនាពេលនេះនោះគឺគ្រូបង្វឹកចង់ឃើញដោយផ្ទាល់ពីសមត្ថភាពនៃការលេងរបស់ក្រុមជម្រើសជាតិកម្ពុជា ងាយស្រួលក្នុងការកែទម្រង់លេង ។
ដូច្នេះអ្វីដែលលោកលើកឡើងនេះ ជាសារមួយប្រាប់ទៅអ្នកគាំទ្របាល់ទាត់ខ្មែរយើង ត្រូវមានការអត់ធ្មត់ទោះចាញ់ក្ដីឈ្នះក្ដី ព្រោះវាជាការប្រកួតកម្ដៅសាច់ដុំដើម្បីវាស់ស្ទង់កម្រិតបច្ចេកទេសប៉ុណ្ណោះ ។ ទោះបីយ៉ាងណា ក្រុមជម្រើសជាតិកម្ពុជាយើងនឹងកាន់តែទទួលបានបទពិសោធន៍ថ្មីៗបន្ថែមទៀតពេលជួបក្រុមខ្លាំងដូចជាក្រុមម៉ាឡេស៊ីនេះ។
ចំណែកលោក Keisuke Honda អ្នកចាត់ការទូទៅ និងជាគ្រូបង្វឹកថ្មីរបស់ក្រុមជម្រើសជាតិកម្ពុជា បានពោលពាក្យមួយឃ្លា ធ្វើឲ្យអ្នកគាំទ្រកម្ពុជាកាន់តែមានជំនឿចិត្តថែមទៀត មុនក្រុមគោព្រៃកម្ពុជា បើកទ្វារពហុកីឡដ្ឋានជាតិ ទទួលក្រុមជម្រើសជាតិម៉ាឡេស៊ី ។
លោកនិយាយថា ៖«បើខ្ញុំមិនមានជំនឿចិត្តលើខ្លួនឯងទេ ខ្ញុំមិនទទួលយកការងារនេះឡើយ»។
អតីតកីឡាករជម្រើសជាតិជប៉ុនរូបនេះ បានថ្លែងបែបនេះ ក្នុងសន្និសីទសារព័ត៌មានស្ដីពីការប្រកួតមិត្តភាពអន្ដរជាតិរវាងកម្ពុជា និងម៉ាឡេស៊ី នៅសណ្ឋាគារភ្នំពេញ នាព្រឹកថ្ងៃទី៩ ខែកញ្ញា ម្សិលមិញនេះ ។ ការលើកឡើងនេះ លោកចង់បញ្ជាក់ពីការប្ដេជ្ញាចិត្ត និងការត្រៀមខ្លួនជាស្រេច ដើម្បីអភិវឌ្ឍន៍វិស័យបាល់ទាត់កម្ពុជា និងទទួលយកគ្រប់បែបយ៉ាងក្នុងអំឡុងពេលលោកធ្វើជាអ្នកចាត់ការទូទៅក្រុមជម្រើសជាតិកម្ពុជា ។ ប៉ុន្ដែទន្ទឹមជាមួយគ្នាលោកក៏បានស្នើឲ្យអ្នកគាំទ្រមានការអត់ធ្មត់ និងកុំផ្ដោតលើលទ្ធផលពេកផងដែរ ។
គួរបញ្ជាក់ថា ក្រុមជម្រើសជាតិកម្ពុជា នឹងត្រូវជួបក្រុមម៉ាឡេស៊ី ក្នុងជំនួបមិត្តភាពនាល្ងាចនេះ ហើយក៏ជាការប្រកួតដំបូង ដែលលោក Keisuke Honda ដឹកនាំផងដែរ ដើម្បីធ្វើការវាស់ស្ទង់សមត្ថភាពកីឡាករក្នុងគោលដៅត្រៀមការប្រកួតពានរង្វាន់ AFF Suzuki Cup 2018 នាចុងឆ្នាំនេះ ៕
ចែករំលែកព័តមាននេះ