កូនប្រុសម្ចាស់សិប្បកម្មថា ស្ងប់អារម្មណ៍ខ្លះហើយ ប៉ុន្តែភ័យខ្លាចខ្លះ ព្រោះ…
- កំពង់ឆ្នាំង
ខេត្តកំពង់ឆ្នាំង ៖ ជុំវិញករណីជនរងគ្រោះត្រូវជនសង្ស័យបាញ់សម្លាប់យ៉ាងព្រៃផ្សៃនៅមុខផ្ទះដែលកំពុងតែរស់ដោយការភ័យខ្លាច ព្រោះតែចាប់ឃាតករជាជនដៃដល់មិនទាន់បាននោះ ពេលនេះពួកគេបានស្ងប់អារម្មណ៍ខ្លះហើយ ដោយសារថ្មីៗនេះសមត្ថកិច្ចចាប់ឃាត់ខ្លួនជនសង្ស័យម្នាក់ដែលសង្ស័យពាក់ព័ន្ធនឹងការបាញ់សម្លាប់ជនរងគ្រោះជាថៅកែសិប្បកម្មទឹកសុទ្ធកាលពីយប់ថ្ងៃទី១៦ ឧសភា ២០១៨កន្លងទៅនេះ។ បើតាមយុវជនឈ្មោះ ម៉ុយ…
បើតាមយុវជនឈ្មោះ ម៉ុយ ប៊ុនធឿន ជាកូនប្រុសជនរងគ្រោះធ្លាប់ផ្ដល់ការសម្ភាសន៍កាលពីកន្លងទៅ រៀបរាប់ពីការភ័យខ្លាចរបស់ក្រុមគ្រួសារខ្លួននោះបានទូរស័ព្ទប្រាប់ភ្នាក់ងារយើងជាថ្មីកាលពីថ្ងៃទី០៩ កញ្ញា ឆ្នាំ២០១៨នេះថា «ពេលនេះគ្រួសាររបស់គេបានស្ងប់អារម្មណ៍ខ្លះហើយ ដោយសារចាប់ជនសង្ស័យម្នាក់ដែលសង្ស័យថាបាញ់សម្លាប់ឪពុករបស់ខ្លួនកាលពីខែឧសភាកន្លងទៅនេះ» ។
ជាមួយគ្នានេះយុវជនខាងលើក៏ថ្លែងអំណរគុណដល់សមត្ថកិច្ចទាំងអស់ដែលសហការគ្នាចាប់ជនសង្ស័យយកទៅផ្ដន្ទាទោសតាមផ្លូវច្បាប់ ដើម្បីផ្ដល់ភាពយុត្តិធម៌ដល់ឪពុករបស់ខ្លួនដែលស្លាប់ទៅ។ យ៉ាងនេះក្តីយុវជននេះប្រាប់ថា «ក្រុមគ្រួសាររបស់គាត់ក៏នៅមានការភ័យខ្លាចខ្លះៗដែរ ដោយសារអាវុធដែលយកមកបាញ់ប្រហារឪពុករបស់ខ្លួននៅមិនទាន់រកឃើញនៅឡើយ»។
យោងតាមរបាយការណ៍សន្និដ្ឋានរបស់សមត្ថកិច្ចនគរបាលខេត្តបញ្ជាក់ថា ជនសង្ស័យក្នុងករណីឃាតកម្មខាងលើឈ្មោះ ឆោម ឆន ភេទប្រុស អាយុ៥៨ឆ្នាំ រស់នៅភូមិស្រែតាជៃ ឃុំអភិវឌ្ឍន៍ ស្រុកទឹកផុស ជាជនសង្ស័យក្នុងបទឃាតកម្មគិតទុកជាមុនដែលប្រព្រឹត្តឡើងកាលពីម៉ោង៧និង៥០នាទីយប់ថ្ងៃទី១៦ ឧសភា ២០១៨ នៅផ្ទះសិប្បកម្មផលិតទឹកសុទ្ធ បណ្តាលឱ្យបុរសជាម្ចាស់សិប្បកម្មស្លាប់នៅមុខផ្ទះរបស់ខ្លួនស្ថិតក្នុងភូមិត្រពាំងជ្រៃ ឃុំខ្លុងពពក ស្រុកទឹកផុស ត្រូវបានឃុំខ្លួនកាលពីថ្ងៃទី១២ សីហា ២០១៨។
សូមរំឮកថា ម្ចាស់សិប្បកម្មទឹកសុទ្ធឈ្មោះ ប៊ិន ហឿន អាយុ៦១ឆ្នាំ ត្រូវជនពុំស្គាល់មុខដោយបានបិទមុខជិត ស្លៀកពាក់ខោអាវប៉ារ៉ា ប្រើកាំភ្លើង អាកា 47 ចូលបាញ់ប្រហារ ចំនួន៣គ្រាប់ បណ្តាលឱ្យស្លាប់ក្រោមរថយន្តដឹកទឹកសុទ្ធរបស់ខ្លួននៅចំពីមុខផ្ទះតែម្តង។ ក្រោយកើតហេតុសមត្ថកិច្ចចុះធ្វើការស្រាវជ្រាវរកឃើញម៉ូតូ១គ្រឿងម៉ាកយ៉ាម៉ាហាហ្វ្រេស ពណ៌ផ្ទៃមេឃ និងគ្រាប់កាំភ្លើងអាកា៤គ្រាប់ដាក់នៅក្នុងការ៉ុងដែលប្លុងចោល កណ្តាលវាលស្រែឆ្ងាយពីកន្លែងកើតហេតុជាង១ពាន់ម៉ែត្រ ដែលសមត្ថកិច្ចកំណត់ថា ជាម៉ូតូរបស់ជនដៃដល់៕
ចែករំលែកព័តមាននេះ