ខេត្តមណ្ឌលគិរី ៖ ដើម្បីឱ្យខេត្តមណ្ឌលគិរីប្រែមុខមាត់ថ្មី និងធ្វើឱ្យភ្ញៀវទេសចរណ៍ជាតិ អន្តរជាតិមកចាប់អារម្មណ៍ទស្សនាទ្វេដង អាជ្ញាធរខេត្តមណ្ឌលគិរី បានរៀបចំពិធីបញ្ចុះបឋមសិលាសាងសង់វិមានឯករាជ្យ នៅលើសួនឧទ្យានសែនមនោរម្យ អតីតប្រលានយន្តហោះចាស់ ស្ថិតនៅក្រុងសែនមនោរម្យ…
ខេត្តមណ្ឌលគិរី ៖ ដើម្បីឱ្យខេត្តមណ្ឌលគិរីប្រែមុខមាត់ថ្មី និងធ្វើឱ្យភ្ញៀវទេសចរណ៍ជាតិ អន្តរជាតិមកចាប់អារម្មណ៍ទស្សនាទ្វេដង អាជ្ញាធរខេត្តមណ្ឌលគិរី បានរៀបចំពិធីបញ្ចុះបឋមសិលាសាងសង់វិមានឯករាជ្យ នៅលើសួនឧទ្យានសែនមនោរម្យ អតីតប្រលានយន្តហោះចាស់ ស្ថិតនៅក្រុងសែនមនោរម្យ ក្រោមអធិបតីឯកឧត្តម ស្វាយ សំអ៊ាង អភិបាលនៃគណៈអភិបាលខេត្ត និងលោក ខៃ ប៉េងស៊ុន ក្រុមជាងសំណង់បែបបុរាណ ព្រមទាំងលោកប្រធាន អនុប្រធានមន្ទីរអង្គភាពជុំវិញខេត្ត កងកម្លាំងប្រដាប់អាវុធទាំងបី និងប្រជាពលរដ្ឋ នាព្រឹកថ្ងៃទី០៩ ខែកញ្ញា ឆ្នាំ២០១៨ ។
ឯកឧត្តម ស្វាយ សំអ៊ាង អភិបាលខេត្ត បានមានប្រសាសន៍ថា ការសាងសង់វិមានឯករាជ្យនៅលើសួនឧទ្យានសែនមនោរម្យដែលជាប្រវត្តិសាស្ត្រមួយនៅលើទឹកដីនៃខេត្តមណ្ឌលគិរី ក្នុងការរួមចំណែកបង្កើនសក្តានុពលវិស័យទេសចរ និងដើម្បីកែប្រែមុខមាត់ថ្មីរបស់ខេត្ត ឱ្យកាន់តែមានភាពរីកចម្រើនបន្ថែមទៀត ។
ឯកឧត្តមបញ្ជាក់ថា ការសាងសង់វិមានឯករាជ្យនេះចំណាយថវិកាប្រមាណជា៥០ម៉ឺនដុល្លារសហរដ្ឋអាមេរិក ដែលមានលក្ខណៈស្តង់ដារល្អប្រណិតជាងគេ បើប្រៀបធៀបតាមបណ្តាលខេត្តនានា ។ ឯកឧត្តមបានបន្ថែមថា រាជរដ្ឋាភិបាលកម្ពុជា ក្រោមការដឹកនាំរបស់សម្តេច អគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបន្តដឹកនាំឱ្យប្រទេសមានសុខសន្តិភាព និងមានការអភិវឌ្ឍលើគ្រប់វិស័យបន្ថែមទៀត ។
ទទឹមនឹងនេះដែរឯកឧត្តមអភិបាលខេត្តបានណែនាំ និងជម្រុញដល់មន្ទីរអង្គភាពក៏ដូចជា វិស័យឯកជន និងប្រជាពលរដ្ឋទាំងអស់ត្រូវចូលរួមសហការគ្នាសាងសង់វិមានឯករាជ្យនេះ ឱ្យទទួលបានជោគជ័យ ដើម្បីទុកឱ្យកូនចៅជំនាន់ក្រោយ ហើយបន្តអភិវឌ្ឍន៍ ខេត្តមណ្ឌលគិរី ឱ្យប្រែមុខមាត់ថ្មីបន្ថែមទៀត ។
លោក ខៃ ប៉េងស៊ុន ក្រុមជាងសំណង់បែបបុរាណបានឱ្យដឹងថា ការសាងសង់វិមានឯករាជ្យនៅខេត្តមណ្ឌលគិរី គឺមានទំហំផ្ទៃរង្វង់ចំនួន៥៨ម៉ែត្រ កម្ពស់២៤ម៉ែត្រ ។
សូមបញ្ជាក់ថា សួនឧទ្យានសែនមនោរម្យ ស្ថិតនៅក្រុងសែនមនោរម្យ សាងសង់លើផ្ទៃដីទំហំប្រមាណជា២០ហិកតា និងមានរៀបចំធ្វើរូបសេះ រូបផ្លែឃ្លោក រូបនាគ មានកន្លែងហាត់ប្រាណ កន្លែងតាំងពិពរណ៌ជាដើម និងរៀបចំលំអរសួនឧទ្យាននេះ ដោយដាំស្មៅស្លាបទា ដាំដើមឈើ និងរុក្ខជាតិសំខាន់ៗ ដែលបង្ហាញពីអត្តសញ្ញាណធនធានធម្មជាតិរបស់ខេត្ត ឲ្យសមស្របនឹងអាកាសធាតុ លើសពីនេះទៀតក៏បង្ហាញពីវប្បធម៌ជនជាតិដើមភាគតិចព្នង និងអត្តសញ្ញាណជាតិផងដែរ ៕
ចែករំលែកព័តមាននេះ