ទីក្រុងសិង្ហបុរី ៖ យោងតាមទិន្នន័យថ្មីដែលបានពីក្រុមហ៊ុនCBRE បានឲ្យដឹងថា ការវិនិយោគទៅក្រៅប្រទេសដោយប្រទេសអាស៊ីបន្តមានភាពរឹងមាំ បើទោះជាការវិនិយោគលើអចលនទ្រព្យបរទេសដោយជនជាតិចិនមានការអន់ថយពិតមែនក្តី ។
កាលពីពាក់កណ្តាលឆ្នាំដំបូងនាឆ្នាំ២០១៨នេះ សកម្មភាពវិនិយោគទៅក្រៅប្រទេសសរុបស្មើនឹង២៥,៣ប៊ីលានដុល្លារ ដែលនាំមុខការវិនិយោគដោយជនជាតិសិង្ហបុរី ស្មើនឹង៣៦%នៃការវិនិយោគសរុបក្នុងតំបន់ ។ នៅឆ្នាំនេះ ទីក្រុងឡុងដ៍បន្តជាទីតាំងដែលមានប្រជាប្រិយភាពជាងគេសម្រាប់វិនិយោគិនអាស៊ី និងស្មើ២៦%នៃការវិនិយោគទៅក្រៅប្រទេសទាំងអស់ ។
វិនិយោគិនសិង្ហបុរីជ្រើសរើសអឺរ៉ុបជាទីតាំងសម្រាប់ផ្តល់ភាពចម្រុះ និងវិនិយោគប្រមាណ ៣,៤ប៊ីលានដុល្លារក្នុងតំបន់នេះកាលពីឆមាសទី១ ឆ្នាំ២០១៨ ។ វិនិយោគិនសិង្ហបុរីក៏សកម្មដែរក្នុងវិស័យដឹកជញ្ជូនអាមេរិក ដែលវិនិយោគប្រមាណ២,២៧ប៊ីលានដុល្លារ ។ បើទោះជាការវិនិយោគក្រៅប្រទេសដោយជនជាតិចិនមានការធ្លាក់ចុះពិតមែនក្តី វិនិយោគិនអាស៊ីនឹងបន្តមានភាពសកម្មនៅបរទេស ។
កាលពីឆមាសទី១នាឆ្នាំនេះ វិនិយោគិនចិនបានកាត់បន្ថយការទិញអចលនទ្រព្យនៅបរទេសនិងបានចាប់ផ្តើមបោះបង់ចោលជាពិសេសក្នុងសហរដ្ឋអាមេរិក និងអឺរ៉ុប ។
ក្រុមហ៊ុនអចលនទ្រព្យជាក្រុមវិនិយោគដែលសកម្មជាងគេ និងស្មើពាក់កណ្តាលនៃការវិនិយោគទៅក្រៅប្រទេសរបស់អាស៊ីថែមទៀត ។
លោកHenry Chin ប្រធានផ្នែកស្រាវជ្រាវប្រចាំអាស៊ីប៉ាស៊ីហ្វិកនៅក្រុមហ៊ុនCBRE បានឲ្យដឹងថា ៖« សរុបមក ពួកយើងគិតថាចំណាប់អារម្មណ៍ក្នុងការវិនិយោគរបស់វិនិយោគិនសិង្ហបុរី កូរ៉េខាងត្បូង និងហុងកុង ជាពិសេសនៅអឺរ៉ុប និងសហរដ្ឋអាមេរិក នឹងបន្តជាកត្តាជំរុញនៃការវិនិយោគទៅក្រៅប្រទេសរបស់អាស៊ីក្នុងរយៈពេលមធ្យមទៅវែង »៕
ចែករំលែកព័តមាននេះ