ខេត្តមណ្ឌលគិរី ៖ ដើម្បីជាការចូលរួមចំណែកជួយដោះស្រាយនូវទុក្ខលំបាករបស់ប្រជាពលរដ្ឋដែលមានជីវភាពខ្វះខាត និងកំពុងត្រូវការជំនួសជាបន្ទាន់នោះសាខាកាកបាទក្រហមកម្ពុជាខេត្តមណ្ឌលគិរី ដែលដឹកនាំដោយលោក រឿង ផៃរិទ្ធិ ប្រធានហេរញ្ញឹកគណៈកម្មាធិការសាខាកាកបាទក្រហមកម្ពុជាខេត្ត ។
រួមទាំងសមាជិក សមាជិកា និងអនុសាខាស្រុកបានចុះសួរសុខទុក្ខ និងបាននាំយកអំណោយមនុស្សធម៌មួយចំនួនរបស់សាខាកាកបាទក្រហមខេត្តមណ្ឌលគិរីផ្តល់ជូនដល់ប្រជាពលរដ្ឋ ជនចាស់ជរា គ្រួសារក្រីក្រ អ្នកផ្ទុកជំងឺអេដស៍ និងកុមាររងគ្រោះដោយសារ គ្រោះថ្នាក់ចរាចរណ៍ចំនួន១២គ្រួសារ ស្ថិតនៅឃុំស្រែខ្ទុម ស្រុកកែវសីមា ថ្ងៃទី០៧ ខែកញ្ញា ឆ្នាំ២០១៨ ។
លោក រឿង ផៃរិទ្ធិ បានមានប្រសាសន៍ពាំនាំនូវការផ្តាំផ្ញើសួរសុខទុក្ខពីសំណាក់សម្តេចកិតិ្តព្រឹទ្ធ បណ្ឌិត ប៊ុនរ៉ានី ហ៊ុនសែន ប្រធានកាកបាទក្រហមកម្ពុជាក៏ដូចជា ឯកឧត្តម ស្វាយ សំអ៊ាង ប្រធានគណៈកម្មាធិការសាខាកាកបាទក្រហមកម្ពជាខេត្តដែលជានិច្ចកាលសម្តេចតែងតែយកចិត្តទុកដាក់គិតគូរពីសុខុមាលភាពជូនប្រជាពលរដ្ឋទូទៅដោយមិនប្រកាន់និន្នាការនយោបាយអ្វីឡើយ ។
លោកបន្ថែមថា កាកបាទក្រហមកម្ពុជាមានគ្រប់ទីកន្លែងសម្រាប់គ្រប់ៗគ្នាដោយមិនទុកនរណាម្នាក់ចោលនោះឡើយ ។ ជាក់ស្តែងគ្រួសារក្រីក្រជនចាស់ជរាអ្នកផ្ទុកជំងឺអេដស៍ និងកុមាររងគ្រោះដោយសារគ្រោះថ្នាក់ចរាចរណ៍ចំនួន១២គ្រួសារ ដែលជួបការខ្វះខាតនាពេលនេះដោយក្នុងមួយគ្រួសារទទួលបានអង្គរ២៥គីឡូក្រាម ក្រមា សារុង ភួយ កន្ទេល ទឹកត្រី ត្រខ មី និងថវិកា៦ម៉ឺនរៀល ។ ដោយឡែកអ្នកផ្ទុកជំងឺអេដស៍១គ្រួសារ បន្ថែមថវិកា២០ម៉ឺនរៀលក្នុងនោះអនុសាខាស្រុកបានបន្ថែមក្នុង១គ្រួសារ១ម៉ឺនរៀលផងដែរ ។
លោក រឿង ផៃរិទ្ធិ ក៏បានផ្តាំផ្ញើដល់បងប្អូនប្រជាពលរដ្ឋទាំងអស់ត្រូវចេះរៀបចំអនាម័យក្នុងការរស់នៅឱ្យបានស្អាត តាមរយៈហូបស្អាត ផឹកស្អាត ចៀសវាងកើតមានជំងឺផ្សេងៗ និងត្រូវមានការប្រុងប្រយ័ត្នចំពោះគ្រោះធម្មជាតិ ។ ជាងនេះទៅទៀត លោកបានណែនាំដល់ប្រជាពលរដ្ឋទាំងអស់ត្រូវចេះចិញ្ចឹមសត្វ និងដាំដុះដំណាំរួមផ្សំផ្សេងៗ ដើម្បីលើកកម្ពស់ជីវភាពរស់នៅឱ្យមានលក្ខណៈសមរម្យផងដែរ ៕
ចែករំលែកព័តមាននេះ