ខេត្តពោធិសាត់ ៖ សេចក្តីរាយការណ៍បឋមឲ្យដឹងថា កាលពីវេលាម៉ោងជាង៥ល្ងាចថ្ងៃទី៧ កញ្ញា មានករណីអំពើហិង្សា ប្តីវាយប្រពន្ធរហូដល់ស្លាប់ គ្រាន់តែប្រពន្ធសុំទៅស៊ីឈ្នូលដកដំឡូងឲ្យគេ ហេតុការណ៍នេះបានកើតឡើងនៅចំណុចភូមិអង្គ្រង ឃុំសំរោង ស្រុកភ្នំក្រវាញ ខេត្តពោធិសាត់ ។
ជនសង្ស័យឈ្មោះ ឈន ឆេង ភេទប្រុស អាយុ៥១ឆ្នាំ ត្រូវជាប្តី ចំណែកជនរងគ្រោះដែលស្លាប់ឈ្មោះ ម៉ៃ ហ៊ិន អាយុ៥៤ឆ្នាំ ត្រូវជាប្រពន្ធ រស់នៅភូមិ-ឃុំខាងលើ ។
ក្រោយពីសម្លាប់ប្រពន្ធ ជនសង្ស័យបានព្យាយាមរត់គេចខ្លួន ប៉ុន្តែកន្លះម៉ោងក្រោយមកត្រូវបានសមត្តកិច្ចចាប់ខ្លួននៅចំណុចមុខរដ្ឋបាលព្រៃឈើភូមិដំណាក់ឈើក្រំ ឃុំសំរោង ស្រុកភ្នំក្រវាញ ។
នៅចំពោះមុខសមត្ថកិច្ច ជនសង្ស័យបានសារភាពថា មុនកើតហេតុ ប្រពន្ធបានសុំខ្លួនថា ទៅស៊ីឈ្នួលដកដំឡូងឲ្យគេ ព្រោះតែក្រុមគ្រួសារមានជីវភាពក្រីក្រ ។ ពេលឮប្រពន្ធនិយាយយ៉ាងដូច្នោះ ខ្លួនមានគំនិតហាមឃាត់មិនឲ្យទៅ ដោយគិតថា ទី១-ខ្មាសអ្នកស្រុក និងទី២-មិនចង់ឲ្យប្រពន្ធឃ្លាតឆ្លាយពីខ្លួន ។
តាមសំដីចុងក្រោយនេះ ជនសង្ស័យហាក់ដូចជាមានគំនិតប្រច័ណ្ឌប្រពន្ធផងដែរ បានជាមិនចង់ឲ្យប្រពន្ធទៅឆ្ងាយពីខ្លួន ។ ចម្លើយជនសង្ស័យបន្តថា នៅពេលខ្លួនបានហាមឃាត់ប្រពន្ធមិនឲ្យចេញទៅស៊ីឈ្នួលដកដំឡូងឲ្យគេ ក៏មានការឈ្លោះប្រកែកគ្នាខ្លាំងៗ ពេលនោះខ្លួនបានស្លុះទៅវាយប្រពន្ធជាច្រើនដៃចំកណ្តាលមុខ បណ្តាលឱ្យប្រពន្ធដួលដេកទៅដី សន្លប់បាត់ស្មារតី គួបផ្សំជំងឺលើសឈាមផងក៏ដាច់ខ្យល់ស្លាប់បាត់ទៅ ។
នៅពេលដឹងថា ប្រពន្ធស្លាប់ហើយនោះ ជនសង្ស័យជាប្តីបានព្យាយាមរត់គេចខ្លួន តែព្រលឹងប្រពន្ធអន្ទងឲ្យវិលវល់ មិនឲ្យគេចផុតពីសំណាញ់ច្បាប់ ។
ជនសង្ស័យត្រូវបានសមត្ថកិច្ចកសាងសំណុំរឿងបញ្ជូនទៅកាន់សាលាដំបូងខេត្តតាមនីតិវិធី ក្រោមការចោទប្រកាន់ពីបទឃាតកម្ម ៕
ចែករំលែកព័តមាននេះ