ខេត្តកណ្ដាល ៖ ជនសង្ស័យម្នាក់បានធ្វើសកម្មភាពលួចយកម៉ូតូ១គ្រឿង ដែលម្ចាស់ចតទុកនៅមុខផ្ទះ ភ្លេចដកសោចេញ បន្ទាប់មកបានយកទៅដាក់បញ្ចាំនៅកុងស៊ី មួយកន្លែងម្ដុំផ្សារជម្ពូវ័ន បានប្រាក់ចំនួន៥០០ដុល្លារ ហើយបានគេចខ្លួន១អាទិត្យ ទើបចូលផ្ទះក៏ត្រូវបាននគរបាលព្រហ្មទណ្ឌ…
ខេត្តកណ្ដាល ៖ ជនសង្ស័យម្នាក់បានធ្វើសកម្មភាពលួចយកម៉ូតូ១គ្រឿង ដែលម្ចាស់ចតទុកនៅមុខផ្ទះ ភ្លេចដកសោចេញ បន្ទាប់មកបានយកទៅដាក់បញ្ចាំនៅកុងស៊ី មួយកន្លែងម្ដុំផ្សារជម្ពូវ័ន បានប្រាក់ចំនួន៥០០ដុល្លារ ហើយបានគេចខ្លួន១អាទិត្យ ទើបចូលផ្ទះក៏ត្រូវបាននគរបាលព្រហ្មទណ្ឌ ស្រុកអង្គស្នួល និងប៉ុស្តិ៍ព្រៃពួចចាប់ខ្លួនតែម្ដង ។
ហេតុការណ៍នោះបានកើតឡើងតាំងពីវេលាម៉ោង៩និង៥នាទីយប់ថ្ងៃទី៣១ ខែសីហា ឆ្នាំ២០១៨ មកម្ល៉េះ នៅក្នុងភូមិព្រៃមៀន ឃុំព្រៃពួចស្រុកអង្គស្នួល ខេត្តកណ្ដាល បន្ទាប់មកជននេះត្រូវបាននគរបាលចាប់ខ្លួនកាលពីថ្ងៃទី០៧ ខែកញ្ញា ឆ្នាំ២០១៨ ។
នគរបាលបានឲ្យដឹងថា ជនសង្ស័យឈ្មោះ ឆេង ចាន់ធីម អាយុ២០ឆ្នាំ មុខរបរមិនពិតប្រាកដ មានទីលំនៅក្នុងភូមិកើតហេតុខាងលើ ចំណែកម៉ូតូម៉ាកស៊ុយហ្ស៊ុយគីនិច ស៊េរីឆ្នាំ២០១៨ ពណ៌សលាយខៀវ គ្មានស្លាកលេខ ។ ដែលជាកម្មសិទ្ធិរបស់យុវជនម្នាក់ឈ្មោះ កំសាន្ត សាវឡុង អាយុ១៩ឆ្នាំ ជនជាតិខ្មែរ មុខរបរកម្មកររោងចក្រ មានទីលំនៅក្នុងភូមិជាមួយគ្នាខាងលើនោះដែរ ។
ប្រភពដដែលបានបន្តថា នៅមុនពេលកើតហេតុជនរងគ្រោះបានជិះម៉ូតូទៅឈប់នៅមុខផ្ទះស្ត្រីម្នាក់ ដែលជាអ្នកភូមិជាមួយគ្នាឈ្មោះ ឌី តត រួចហើយបានដើរចូលទៅក្នុងផ្ទះដោយមិនបានដកសោចេញឡើយ ។ លុះមួយសន្ទុះក្រោយមកជនសង្ស័យបានចូលទៅធ្វើសកម្មភាពលួចយកម៉ូតូជិះគេចខ្លួន ប៉ុន្តែខណៈនោះមានស្រីម្នាក់ទៀតឈ្មោះ ឌី ស្រីតូច អាយុ២៤ឆ្នាំ មុខរបរកម្មការីនីរោងចក្រកំពុងតែបោសសំរាម នៅក្នុងផ្ទះក្បែរនោះប្រទះឃើញទាន់ ។
នគរបាលបានបញ្ជាក់បន្ថែមទៀតថា ពេលឃើញបែបនេះស្ត្រីឈ្មោះ ឌី ស្រីតូចបានស្រែកឲ្យឈប់ដែរ តែឈ្មោះ ឆេង ចាន់ធីម មិនព្រមឈប់ឡើយ ហើយបានជិះម៉ូតូគេចខ្លួនបាត់ស្រមោលតែម្ដង ។ បន្ទាប់មកក៏បានប្រាប់ទៅបុរសរងគ្រោះពីមុខសញ្ញាចោរលួចម៉ូតូទើបជនរងគ្រោះប្ដឹងសុំឲ្យនគរបាលជួយអន្តរាគមន៍ ចំណែកជនសង្ស័យបានយកម៉ូតូដែលលួចបានទៅបញ្ចាំនៅកុងស៊ីមួយ ស្ថិតនៅជិតផ្សារជម្ពូវ័ន សង្កាត់ចោមចៅ៣ ខណ្ឌពោធិ៍សែនជ័យ បានប្រាក់ចំនួន៥០០ដុល្លារ រួចដើរលេងស៊ីចាយរយៈពេល១អាទិត្យ ក្រោយមក គឺនៅថ្ងៃទី០៧ ខែកញ្ញា ទើបត្រឡប់ចូលផ្ទះវិញ ក៏ត្រូវបាននគរបាលចាប់ខ្លួនសួរនាំ និងកសាងសំណុំរឿងបញ្ជូនទៅតុលាការតែម្ដង ៕
ចែករំលែកព័តមាននេះ