មានតែភិក្ខុទ្រទ្រង់អភិធម្មប៉ុណ្ណោះទើបឈ្មោះថាធម្មកថិក
នៅក្នុងវចនានុក្រមសម្ដេចព្រះសង្ឃរាជ ជួន ណាតលោកបានពន្យល់ពាក្យថាធម្មកថិកដោយបង្ហាញនូវវិគ្គហៈថា ធម្មំ កថេតីតិ >(ជា) ធម្មកថិកោ អ្នកណាពោលនូវធម៌ អ្នកនោះ ឈ្មោះថា…
នៅក្នុងវចនានុក្រមសម្ដេចព្រះសង្ឃរាជ ជួន ណាតលោកបានពន្យល់ពាក្យថាធម្មកថិកដោយបង្ហាញនូវវិគ្គហៈថា ធម្មំ កថេតីតិ >(ជា) ធម្មកថិកោ អ្នកណាពោលនូវធម៌ អ្នកនោះ ឈ្មោះថា ធម្មកថិក គឺអ្នកសម្ដែងវែកញែកនូវធម៌ ។
ប៉ុន្តែនៅក្នុងសទ្ទានុក្រមបាលីក៏បានពន្យល់បញ្ជាក់ផងដែរថា ភិក្ខុអ្នកទ្រទ្រង់ព្រះអភិធម្មឈ្មោះថាព្រះធម្មកថិក ដូចមានភាសិតបាលីថា អភិធម្មិកភិក្ខូយេវ កិរ ធម្មកថិកោ នាម បានឮថាមានតែភិក្ខុអ្នកទ្រទ្រង់នូវព្រះអភិធម្មប៉ុណ្ណោះ ទើបឈ្មោះថា ព្រះធម្មកថិក ក្រៅពីនេះសូម្បីលោកអ្នកពោលនូវធម៌ ក៏មិនមែនបាននាមថាធម្មកថិកដែរ ។ ព្រោះហេតុអ្វី ? ព្រោះថា ភិក្ខុអ្នកមិនទ្រទ្រង់នូវព្រះអភិធម្មទាំងនោះ កាលណាពោលនូវធម៌ តែង ពោលតាមលំដាប់កម្ម និងផល លំដាប់វិបាក អាចនឹងធ្វើលំដាប់ធម៌ឲ្យច្រឡូកច្រឡំគ្នា ញុំាងអ្នកស្តាប់ឱ្យយល់ខុសចាកធម៌ដើម ។
ចំណែកភិក្ខុអ្នកទ្រទ្រង់ព្រះអភិធម្មវិញ ទោះជាពោលធម៌ច្រើន ពិស្តារវិចិត្រយ៉ាងណាក៏ដោយ ក៏មិនឲ្យលំដាប់ធម៌ទាំងនោះច្រឡូកច្រឡំឡើយ ។ ព្រោះហេតុដូច្នោះហើយ បានជាលោកពោលថា ភិក្ខុអ្នកទ្រទ្រង់ព្រះអភិធម្មពោលធម៌ ឬមិនបានពោលក៏ដោយ តែក្នុងកាលដែលគេសួរបញ្ហា ធម៌អាថ៌ហើយក៏នឹងពោលដោះស្រាយបញ្ហានោះបានយ៉ាងប្រណីត ។
ព្រោះហេតុនោះទើប ព្រះបរមសាស្តាទ្រង់ត្រាស់ថា មានតែភិក្ខុអ្នកទ្រទ្រង់នូវព្រះអភិធម្មប៉ុណ្ណោះ ទើបបាននាមថា ជាធម្មកថិកពិតប្រាកដ ហើយទ្រង់ប្រទាននូវស័ព្ទសាធុការពរ ។
ចែករំលែកព័តមាននេះ