រាជធានីភ្នំពេញ ៖ នគរបាលនាយកដ្ឋានសេដ្ឋកិច្ច ក្រសួងមហាផ្ទៃ និងសមត្ថកិច្ចនាយកដ្ឋានកាំកុងត្រូលនៃក្រសួងពាណិជ្ជកម្ម កាលពីថ្ងៃទី៩ មករា ឆ្នាំ២០១០ បានធ្វើការដុតបំផ្លាញចោលសត្វក្រួចរាប់ម៉ឺនក្បាល និងស្រាម៉ាកសូនី១០០ឆ្នាំរាប់រយដបដែលឈ្មួញទុច្ចរិតនាំចូលពីប្រទេសវៀតណាម ក្នុងគោលបំណងលក់លើទីផ្សារកម្ពុជា ។
ទាក់ទិននឹងការដុតបំផ្លាញទំនិញខូចគុណភាពខាងលើនេះ លោកវរសេនីយ៍ទោឡុង ស្រេង ប្រធានការិយាល័យរដ្ឋបាល និងសរុប របស់នាយកដ្ឋាននគរបាលសេដ្ឋកិច្ច ក្រសួងមហាផ្ទៃបានឱ្យដឹងថា កាលពីវេលាយប់ថ្ងៃទី៩ មករា ប្រភពព័ត៌មានបានរាយការណ៍ថា មានឈ្មួញមួយក្រុមឃុបឃិតគ្នាដឹកទំនិញខុសច្បាប់ក្លែងស្លាកសញា និងគ្មានគុណភាព តាមរថយន្ដហ៊ីយ៉ាន់ដាយមួយគ្រឿងចេញពីច្រករបៀងស្អំ ក្នុងស្រុកពញាក្រែក ខេត្ដកំពង់ចាម ។ ពេលទទួលបានរបាយការណ៍នោះ នាយកដ្ឋានជំនាញសេដ្ឋកិច្ចដែលមានលោកឧត្ដមសេនីយ៍ទោស៊ាង ប៊ុនលាង ជាប្រធានបានរាយការណ៍ជូនលោកនាយឧត្ដមសេនីយ៍ផ្កាយមាស៤ នេត សាវឿន អគ្គស្នងការនគរបាលជាតិ និងលោកឧត្ដមសេនីយ៍ឯកម៉ក់ ជីតូ ប្រធាននាយកដ្ឋានកណ្ដាលនគរបាល យុត្ដិធម៌ក្រសួងមហាផ្ទៃបានចាត់តាំងកំលាំងជា បន្ទាន់ ដើម្បីបើកការបង្ក្រាបលើករណីនេះ ដោយមានការដឹកនាំផ្ទាល់ពីសំណាក់លោក ឧត្ដមសេនីយ៍ត្រីគឿន ភារម្យ អនុប្រធាន នាយកដ្ឋាន ។
លោកវរសេនីយ៍ទោឡុង ស្រេង បានឱ្យដឹងទៀតថា នៅវេលាម៉ោង៣ទៀបភ្លឺថ្ងៃទី៩ មករា រថយន្ដហ៊ីយ៉ាន់ដាយដែលពាក់ស្លាកលេខកំពង់ចាម 3A 0666 បានធ្លាយ មកដល់ផ្សារចាស់ ក្រោយពីពេលទំលាក់ផ្លែឈើនៅផ្សារដើមគរួចមក ទើបត្រូវកំលាំងដែលដឹកនាំដោយលោកឧត្ដមសេនីយ៍ គឿន ភារម្យ ចាប់ និងនាំទៅកាន់ក្រសួងមហាផ្ទៃ ក្នុងនោះមានអ្នកបើកបរឈ្មោះសុខ ហួរ ហៅតាអ៊ុក អាយុ៥២ឆ្នាំម្នាក់ផង ចំណែកម្ចាស់ទំនិញចាប់មិនបានទេ ។
រហូតដល់វេលាម៉ោង៨ព្រឹក ដោយមាន បទបញ្ជាពីលោកនាយឧត្ដមសេនីយ៍អគ្គស្នងការនគរបាលជាតិបានបង្កើតគណៈកម្មការ មួយ ដើម្បីធ្វើការត្រួតពិនិត្យទំនិញក្នុងរថយន្ដនោះដោយមានសមត្ថកិច្ចនាយកដ្ឋានកាំកុងត្រូលចូលរួមផងដែរ ។ ពេលធ្វើការ ឆែកឆេរនោះបានរកឃើញសត្វក្រួចដែល គេក្លាស្សេចំនួន៦៩កេស ស្មើនឹង២.៧៦០គីឡូ ក្រាមខូចគុណភាព និងស្រាម៉ាក JOHNNIE WALKER BLACK LABEL ១០០ឆ្នាំ ទឹកខ្មៅចំនួន៤៧កេស ស្មើនឹង២៨២ដប ដែលឈ្មួញបង្កប់ក្នុងរថយន្ដដោយដាក់ផ្លែឈើពីលើដើម្បីបំភាន់ភ្នែកសមត្ថកិច្ច ។ ក្រោយពីត្រួតពិនិត្យរកឃើញថា ទំនិញដែលឈ្មួញនាំចូលដូចជាស្រា សូនីខុសច្បាប់ និងសត្វក្រួច ខូចគុណភាពនោះគណៈកម្មការចំរុះបានសំរេចយកក្រួចទៅដុតបំផ្លាញចោលនៅចំណុចគំនរចាក់សំរាមបឹងជើងឯកនារសៀល ថ្ងៃទី៩ មករានោះតែម្ដង ។
លោកឡុង ស្រេង បានឱ្យដឹងទៀតថា គណៈកម្មការសំរេចបែបនេះ ពីព្រោះទំនិញនាំចូលខុសស្ដង់ដា និងល្មើសសារាចរលេខ០៧របស់ក្រសួងពាណិជ្ជកម្ម ហើយក៏ជាការរំលោភលើកម្មសិទ្ធិបញាអ្នកដទៃទៀតផង ដូចជាស្រាសូនី២៨២ដប គេចវេះពីការបង់ ពន្ធនាំចូល និងសត្វក្រួចជាង២តោនសុទ្ធតែ ខូចគុណភាពដែលសត្វស្លាបប្រភេទនេះត្រូវបានបាចជីអ៊ុយរ៉េដាក់ពីលើដើម្បីរក្សាទុកបានយូរថ្ងៃ ផ្ទុយទៅវិញ ឈ្មួញមិនបានគិតគូរពីផលប៉ះពាល់ដល់សុខភាពអ្នកយកទៅទទួលទាននោះឡើយ ។
លោកឡុង ស្រេង បន្ដថា យើងដុតចោលតែក្រួចទេ ឯស្រាសូនីរក្សាទុកបញ្ជូនទៅតុលាការពេលក្រុមហ៊ុនដែលនាំចូលផ្ដាច់មុខដាក់ពាក្យបណ្ដឹងពីការលួចនាំចូលដោយខុសច្បាប់ ។ ទោះបីជាបែបណាឈ្មួញដែលនាំចូលមិនទាន់ស្គាល់អត្ដសញាណនៅឡើយទេ តែអ្នកបើករថយន្ដដែលចាប់ខ្លួនជាអ្នកស្គាល់ ៕
ចែករំលែកព័តមាននេះ